اردن کے چار فوجی ہلاک عراقی دارالحکومت بغداد کے قریب ایک فوجی چوکی کے نزدیک امریکی فوجیوں نے جمعرات کی شام اردن سے تعلق رکھنے والے چار فوجیوں کو مبینہ طور پرگولی مار کر ہلاک کردیا ہے۔ یہ فوجی ایک ٹیکسی میں بغداد سے امان کی جانب جا رہے تھے۔ ایک عینی شاہد کے مطابق یوں معلوم ہوتا تھا جیسے گاڑی کا ڈرائیور یہ فوجی چوکی نہیں دیکھ سکا۔ گاڑی جب چوکی کے نزدیک پہنچی تو امریکی فوجیوں نے فائرنگ کردی جس سے ڈرائیور اور گاڑی میں سوار دیگر تین مسافر موقع پر ہی ہلاک ہوگئے۔ تاہم اس واقعے کے بارے میں کچھ متضاد اطلاعات بھی ہیں۔ خبر رساں ادارے اے ایف پی کے مطابق امریکی فوجیوں نے ان الزامات کو رد کرتے ہوئے کہا ہے کہ اردن کے فوجی جس گاڑی میں سوار تھے وہ خود ہی ایک امریکی ٹینک سے جاٹکرائی جس کے نتیجے میں یہ ہلاکتیں ہوئی ہیں۔ اردن کے سرکاری ٹیلیویژن کے مطابق اردن کی وزارتِ خارجہ نے کہا ہے کہ حکومت اس معاملے پر کی جانے تحقیقات پر کڑی نظر رکھے ہوئے ہے۔ اس واقعے کے فوراً بعد عراق میں اردن کے خصوصی نمائندے اور اردن کے سفارتخانے کی ایک ٹیم جاءِ وقوعہ پر پہنچ گئی۔ جمعہ کی صبح ہلاک شدگان کی لاشوں کا پوسٹ مارٹم کیا جائے گا تاکہ یہ معلوم ہوسکے کہ ان کی موت کا اصل سبب کیا تھا۔ | 
یہ صفحہ دوست کو ای میل کیجیئے
پرِنٹ کریں
