یہ صفحہ دوست کو ای میل کیجیئے		پرِنٹ کریں

ایرانی وکیل اور انسانی حقوق کی کارکن شیرین عبادی

اس سال کا نوبل انعام برائے امن ایران سے تعلق رکھنے والی ایک خاتون وکیل اور انسانی حقوق کی سرگرم کارکن کو دینے کا اعلان ہوا ہے۔

پانچ رکنی نوبل کمیٹی کے اس فیصلے کا اعلان جمعہ کی صبح کیا گیا۔

شیرین عبادی ایران میں ایک معروف وکیل ہیں اور وہ ملک کی پہلی خاتون جج تھیں۔ تاہم انیس سو اناسی کے اسلامی انقلاب کے بعد ان کو اس عہدے سے استعفیٰ دینا پڑا ۔

نوبل کمیٹی نے اپنے بیان میں شیرین عبادی کو ایک جرات مند انسان قرار دیا اور کہا کہ وہ ہمیشہ بلا خوف نا انصافی کے خلاف آواز اٹھاتی رہی ہیں۔

شیرین عبادی نے انعام جیتنے کی خبر سننے پر کہا کہ ’میں مسلمان ہوں اور آپ مسلمان ہوتے ہوئے بھی جمہویت کے حامی ہو سکتے ہیں۔‘

انعام کے بارے میں انہوں نے کہا کہ ’یہ ایران میں حقوق انسانی اور خاص طور پر بچوں کے حقوق کے لئے بہت مفید ثابت ہوگا۔ کاش میں اس جد و جہد میں کچھ کام آسکوں۔‘

انعام کی تقریب ناروے کے دارالحکومت اوسلو میں دس دسمبر کو منعقد ہوگی۔ انعام کی رقم دس ملین سویڈش کرونا یعنی تقریباً ڈیڑھ ملین ڈالر ہے۔