یہ صفحہ دوست کو ای میل کیجیئے		پرِنٹ کریں

صدارتی گارڈز پر زنا کا الزام ہے

بھارت میں صدارتی محل کے چار فوجی محافظوں کو دہلی یونیورسٹی کی ایک طالبہ کی آبروریزی کے الزام میں گرفتار کر لیا گیا ہے۔

صدارتی محل کے ان چاروں محافطوں کو بدھ کے روز عدالت میں پیش کیا گیا جہاں سے انہیں جیل بھیج دیا گیا۔

ان چاروں فوجی محافظوں کا تعلق صدر عبدالکلام کے گارڈز کے اعلی سوار دستوں سے تھا۔

زنا کی یہ واردات پیر کو مبینہ طور پر دارالحکومت نئی دہلی کے سفارتی علاقے کے ایک پارک میں کی گئی۔

پولیس کے ایک اعلی اہلکار منوج لال نے بی بی سی کو بتایا کہ یہ لڑکی جو کہ دہلی یونیورسٹی کی طالبہ اپنے ایک دوست کے ساتھ پارک میں گھوم رہی تھی کہ اس پر ان گارڈز نے حملہ کر دیا۔

انہوں نے کہا کہ ایک گارڈ نے لڑکے کو پکڑا لیا جب کہ اس کے دوسرے ساتھیوں نے دن دھاڑے لڑکی کی آبروریزی کی۔

پولیس نے کہا کہ طبی کی رپورٹ سے اس بات کی تصدیق ہوئی ہے کہ لڑکی کو ہوس کا نشانہ بنایا گیا۔

فوج نےبھی ان کے خلاف تفتیش شروع کردی ہے۔