یہ صفحہ دوست کو ای میل کیجیئے		پرِنٹ کریں

کراچی میں پولیس کو الرٹ کر دیا گیا ہے

پولیس کے مطابق پاکستان کے شہر کراچی میں مسلح افراد نے ایک بس پر فائرنگ کر کے اس میں سوار کم از کم چھ افراد کو ہلاک اور پانچ کو زخمی کر دیا ہے۔

اطلاعات کے مطابق بس میں شیعہ مسلک سے تعلق رکھنے والے تقریباً بیس کے قریب افراد سوار تھے اور وہ جمعہ کی نماز ادا کرنے جا رہے تھے۔

ابتدائی اطلاعات میں ہلاک ہونے والوں کی تعداد سات بتائی گئی تھی۔

زخمی ہونے والے ایک شخص عترت حسین نے بی بی سی کو بتایا کہ جیسے ہی بس رکی اور لوگ اس سے باہر نکلنے لگے تو دونوں طرف سے حملہ آوروں نے اس پر فائرنگ شروع کر دی۔

ڈپٹی انسپکٹر جنرل آف پولیس طارق جمیل نے بتایا کہ اس موقع پر حملہ آوروں کے متعلق کچھ بھی نہیں کہا جا سکتا لیکن بظاہر یہ حملہ فرقہ وارانہ دہشت گردی کا واقعہ لگتا ہے۔

ابھی تک کسی نے اس فائرنگ کی ذمہ داری قبول نہیں کی ہے۔

حالیہ برسوں میں شیعہ سنی فرقہ وارانہ فسادات میں سینکڑوں لوگ ہلاک ہو چکے ہیں۔

کراچی پولیس کے مطابق کراچی میں ہونے والا دہشت گرد حملہ ایک بہت ہی منظم حملہ تھا۔

بس میں شیعہ اور سنی دونوں سوار تھے لیکن حملہ اس وقت کیا گیا جب سنی ایک مسجد کے نزدیک بس سے اتر گئے۔

پولیس کے مطابق حملہ آوروں نے دو موٹر سائیکلوں پر بس کا پیچھا کیا اور درجنوں گولیاں بس پر برسانے کے بعد وہاں سے فرار ہو گئے۔

پولیس کا کہنا ہے کہ عبادت کے لئے جانے والے سبھی افراد خلائی تحقیق کے ادارے سپارکو کے ملازم تھے۔

ایک شیعہ جماعت نے کالعدم سنی گروہوں پر اس حملے کا الزام لگایا ہے۔

تحریکِ اسلامیہ کے علاقائی سربراہ حسن ترابی نے اے ایف پی کو بتایا کہ حملہ ’لشکرِ جھنگوی اور سپاہ صحابہ پاکستان نے کروایا ہے جو القاعدہ کے مقامی کارکن ہیں۔‘

انہوں نے کہا کہ انہیں خدشہ ہے کہ اس طرح کے مزید حملے کیے جائیں گے۔