یہ صفحہ دوست کو ای میل کیجیئے		پرِنٹ کریں

سرحد کے ساتھ ساتھ بارودی سرنگیں بچھائی گئی ہیں

ترکی سے یونان میں داخل ہوتے ہوئے سات غیر قانونی تارکینِ وطن پیر کو سرحد کے ساتھ بچھائی گئی بارودی سرنگیں پھٹنے کے باعث ہلاک ہو گئے ہیں۔

خبر رساں ایجنسی اے ایف پی کا کہنا ہے کہ ہلاک ہونے والوں کا تعلق پاکستان سے ہو سکتا ہے۔ تاہم خبر رساں ایجنسی اے پی کے مطابق یونانی حکام ان کا تعلق وسطی ایشیا سے بتاتے ہیں۔

یہ حادثہ یونان کی شمال مشرقی سرحد پر پیش آیا جہاں یہ بدقسمت لوگ حفاظتی باڑ کاٹ کر بارودی سرنگوں کے علاقے میں داخل ہو گئے۔

یونان کے ایک فوجی ترجمان کے مطابق یہ ساتوں آدمی دریائے ایورز پار کر کے سرحدی علاقے میں داخل ہو گئے جہاں واضح طور پر نشان لگے ہیں کہ یہاں بارودی سرنگیں ہیں۔

گزشتہ ماہ بھی چوبیس افراد دریا میں ڈوب گئے تھے

مقامی وقت کے مطابق نو بجکر دس منٹ پر سرحدی محافظوں نے ایک زبردست دھماکہ سنا اور جب بارودی سرنگوں کی صفائی کرنے والے وہاں پہنچے تو انہیں لاشوں کے ٹکڑے ملے۔

انیس سو چھیانوے سے لے کر ابتک یونان کی سرحد کے ساتھ بچھائی جانے والی بارودی سرنگیں پھٹنے سے چالیس کے قریب غیر قانونی تارکینِ وطن ہلاک جبکہ تیس سے زائد زخمی ہو چکے ہیں۔

ستمبر میں چوبیس افراد دریائے ایورز پار کرتے ہوئے ڈوب گئے تھے۔ ہلاک ہونے والوں میں زیادہ کا تعلق پاکستان سے بتایا جاتا ہے۔