یہ صفحہ دوست کو ای میل کیجیئے		پرِنٹ کریں

صدر بش نے کہا ہے کہ اگر ایران جوہری پروگرام بند نہیں کرتا تو عالمی مذمت کے لئے تیار رہے

امریکی صدر جارج بش نے ایران کو پھر خبردار کیا ہے کہ اگر اس نے اپنا جوہری پروگرام ترک نہ کیا تو اسے ’ہر طرف سے‘ مذمت کا سامنا ہوگا۔

صدر بش کا بیان ان اطلاعات کے بعد آیا ہے جن کے مطابق اقوامِ متحدہ کے انسپکٹروں نے دعویٰ کیا ہے کہ انہیں ایران میں اس سطح کا اعلی طور پر افزودہ کیا گیا یورینیم ملا ہے جو ہتھیاروں میں استعمال ہونے والے یورینیم کے مساوی ہے۔

صدر بش نے کہا کہ اگر یہ طے ہوگیا کہ ایران جوہری ہتھیار تیار کر رہا ہے تو اسے عالمی سطح پر مذمت کا سامنا کرنا ہوگا۔

نیویارک میں اس ہفتے کے اوائل میں عالمی رہنماؤں سے اپنی ملاقاتوں کا حوالہ دیتے ہوئے صدر بش نے کہا کہ لوگ ایران کے جوہری ہتھیاروں کے پروگرام کے خطرات سے باخبر ہیں۔

امریکی صدر نے یہ بھی کہا کہ وہ جمعہ اور ہفتے کو امریکی صدر ولادیمیر پوٹن سے اپنی سربراہ ملاقات میں ایران کے جوہری ہتھیاروں کے پروگرام کا معاملہ بھی زیرِ بحث لائیں گے۔

سفارتکاروں کا کہنا ہےکہ تہران کے جنوب میں گزشتہ ماہ یورنیم کی کچھ مقدار ملی تھی۔

بین الاقوامی جوہری ایجنسی آئی اے ای اے کے ایک اہلکار کے مطابق یہ واضح نہیں ہے کہ کیا ایران سے ملنے والا وہ یورنیم جس کا درجہ ہتھیاروں میں استعمال ہونے والے یورینیم کے برابر ہے، ایران میں ہی تیار کیا گیا تھا۔

آئی اے ای اے کے اہلکار آجکل ایران میں جوہری ہتھیاوں کے پروگرام کا ثبوت تلاش کر رہے ہیں۔

آئی اے ای اے نے ایران سے کہہ رکھا ہےکہ وہ اکتیس اکتوبر تک امریکہ کے ان دعووں کو غلط ثابت کردے کہ وہ جوہری پروگرام پر عمل پیرا ہے۔

تہران کا کہنا ہے کہ اس کا جوہری پروگرام پر امن مقاصد کے لئے ہے اور وہ صرف ایسا یورنیم تیار کرنا چاہتا ہے جس کی افزودگی کا درجہ کم ہے اور جو بموں میں استعمال نہیں ہو سکتا۔

ایران یہ بھی کہتا ہے کہ گزشتہ ماہ جہاں سے یورنیم ملا تھا وہ جوہری توانائی تیار کرنے کے پروگرام کا مقام نہیں ہے بلکہ وہاں آلات رکھے جاتے ہیں۔

پیر کو ایران نے کہا تھا کہ وہ تیس اکتوبر کے الٹی میٹم کی وجہ سے عالمی ادارے سے تعاون کم کر دے گا۔ اگر یہ ثابت ہوگیا کہ ایران آئی اے ای اے کے ساتھ معاہدوں کی خلاف ورزی کر رہا ہے تو پھراقوامِ متحدہ کی جانب سے اس پر اقتصادی اور سیاسی پابندیاں لگ سکتی ہیں۔