یہ صفحہ دوست کو ای میل کیجیئے		پرِنٹ کریں

فرانس عراق میں اقتدار کی جلد منتقلی چاہتا ہے

فرانس کے صدر ژاک شراک نے کہا ہے کہ وہ عراق میں کثیرالملکی فوج کی تعیناتی کے لئے اقوام متحدہ سے منظوری حاصل کرنےکی امریکی کوششوں کو ویٹو نہیں کریں گے۔

تاہم فرانس کے صدر نے کہا ہے کہ وہ کسی ایسی قرارداد کی بھی حمایت نہیں کریں گے جس میں اقتدار کی منتقلی کا نظام الاوقات اور اقوام متحدہ کے کردار کی بات نہیں ہوگی۔

فرانس کے صدر نے یہ بات اپنے امریکی ہم منصب جارج بش سے ملاقات اور اقوام متحدہ کے اہم اجلاس میں شرکت سے تھوڑی دیر پہلے امریکی اخبار نیو یارک ٹائمز سے بات کرتے ہوئے کی۔

ژاک شراک نے پہلی بار عراق میں دو مرحلوں میں اقتدار کی منتقلی کی بات کی جس میں پہلے علامتی طور اقتدار امریکہ سے عراق کی گورننگ کونسل کے حوالے کیا جائے گا اور اس کے بعد نو مہینوں میں اقتدار کی حقیقی منتقلی عمل میں آئے گی۔