یہ صفحہ دوست کو ای میل کیجیئے		پرِنٹ کریں

واشنگٹن میں حکام نے بتایا ہے کے امریکی فوج نے خیلج گوانتانامو میں روحانی مشیر کے طور پر کام کرنے والے ایک مسلمان فوجی کو گرفتار کیا ہے۔

گرفتاری کی وجوہات نہیں بتائی گئیں لیکن خیال ہے کہ ان کو جاسوسی کے شبہ میں گرفتار کیا گیا ہے۔

گرفتار کئے جانے والے کیپٹن یوسف لی جیل کے سینکڑوں مسلمان قیدیوں کے مشیر کے طور پر کام کرتے تھے۔ ان قیدیوں پر القاعدہ اور طالبان سے تعلق کا الزام ہے۔

یوسف کو دس روز قبل فلوریڈا میں گرفتار کیا گیا تھا۔ یوسف لی نے جن کا پرانا نام جیمز لی تھا دس سال قبل اسلام قبول کیا تھا۔

چینی نژاد یوسف لی ویسٹ پوائنٹ فوجی ایکیڈممی کے تربیت یافتہ ہیں۔ انہوں نے چار سال شام میں گزارے جہاں انہوں ں نے عربی سیکھی اور اسلام کی سوجھ بوجھ حاصل کی۔

یوسف کو گزشتہ سال گوانتانامو کی جیل میں قیدیوں کے ساتھ کام کرنے کے فرائض سونپے گئے۔

یوسف پر فرد جرم نہیں لگائی گئی اور نہ ہی فوج ان کی گرفتاری کی وجوہات بتا رہی ہے۔ لیکن غیر سرکاری طور پر ملنے والی اطلاعات کے مطابق ایف بی آئی نے ان سے خفیہ دستاویز برآمد کی ہیں جن میں گوانتانامو جیل کے نقشے اور قیدیوں کی بیرکوں کے بارے میں معلومات شامل ہیں۔

یوسف لی سمیت جیل میں تین مسلمان مشیر کام کر رہے ہیں جن کا کام قیدیوں کی مذہبی ضروریات کا خیال رکھنے کے علاوہ جیل کے عملے کو اسلامی رسومات اور عبادات کے بارے میں بتانا ہے۔