یہ صفحہ دوست کو ای میل کیجیئے		پرِنٹ کریں

بھارت میں حال میں کوکا کولا کے خلاف بڑے پیمانے پر مہم چلی تھی

جنوبی بھارت کے ایک گاؤں کی پنچایت نے کوکا کولا سے دو ہفتے کے اندر وضاحت طلب کی ہے کہ کیوں نہ گاؤں میں اس کی فیکٹری بند کر دی جائے؟

گاؤں والوں اور کچھ تنظیموں نے اور بی بی سی کے ایک ریڈیو پروگرام میں الزام لگایا گیا تھا کہ ریاست کیرالا میں کوکا کولا کے پلانٹ سے زہریلا مادہ پیدا ہوتاہے اور پلانٹ کی وجہ سے زیر زمین پانی بھی ختم ہو رہا ہے۔

کوکا کولا نے ان الزامات کی سختی سے تردید کی ہے۔ اس تنازعہ نے پیرومتی گاؤں کی پنچایت اور دنیا کی ایک بڑی کمپنی کو آمنے سامنے کھڑا کر دیا ہے۔

ہندوستان کوکا کولا نے چار سال قبل اس گاؤں میں فیکٹری قائم کی تھی۔ اس کے بعد سے اطلاعات کے مطابق مقامی لوگ شکایت کرتے رہے ہیں کے فیکٹری میں پانی کے زیادہ استعمال کی وجہ سے زیر زمین پانی نہ صرف کم ہوگیا ہے بلکہ استعمال کے قابل بھی نہیں رہا۔

جولائی میں بی بی سی کے فیس دی فیکٹ پروگرام میں کہا گیا تھا کہ بوتلوں کی صفائی کے وقت بڑی مقدار میں زہریلا مادہ پیدا ہوتا ہے۔ کوکا کولا کا کہنا ہے کہ اس کی تمام فیکٹریاں حفظان صحت کے تقاضوں پر پورا اترتی ہیں اور اگر کوئی مادہ بھی ہوتا ہے تو وہ قانون میں طے شدہ مقدار مطابق ہے۔

پنچایت نے کوکا کولا کو پندرہ دن کا نوٹس دیا ہے اور اگر وہ کوکا کولا کے جواب سے مطمئن نہ ہوئی تو یہ معاملہ کیرالا ہائی کورٹ میں جائے گا۔

بھارت میں کوکا کولا اور پیپسی کولا کے خلاف حال ہی میں چلنے والی مہم کے نتیجے میں بہت سے لوگوں نے اس کا استعمال یا تو بند کر دیا ہے یا پھر ختم۔