یہ صفحہ دوست کو ای میل کیجیئے		پرِنٹ کریں

گارجین نے خبر دی ہے کہ سعودی عرب ایٹم بم بنانے پر غور کر رہاہے

سعودی عرب نے ان خبروں کی سختی سے تردید کی ہے کہ وہ ایٹم بم بنانے یا حاصل کرنے کی کوشش کر رہا ہے۔

برطانیہ سے شائع ہونے والے ایک مقتدر جریدے گارڈین نے جمعرات کو یہ خبر دی تھی کہ سعودی عرب کی حکومت دفاعی حکمت عملی کے ایک نئے مسودے پر غور کر رہی ہے جس میں ایٹم بم حاصل کرنےکی تجویز دی گئی ہے۔

لندن میں سعودی سفارت خانے نے ایک بیان میں اس خبر کی تردید کرتے ہوئے کہا کہ سعودی حکومت ایٹم بم بنانے یا حاصل کرنے کی کسی تجویز پر غور نہیں کر رہی۔

اس بیان میں کہا گیا کہ سعودی عرب کا کوئی جوہری پروگرام نہیں اور نہ ہی اس کو حاصل کرنے کا کوئی منصوبہ زیرِ غور ہے۔

برطانوی خبر رساں ادارے نے سفارتی ذرائع کے حوالے سے کہا کہ ویانا میں انٹرنیشنل اٹامک انرجی ایجنسی کے پاس ایسی کوئی اطلاع نہیں جس سے گارڈین میں چھپنے والی خبر کی تصدیق ہو سکے۔

درین اثناء انٹرنیشنل اٹامک انرجی ایجنسی نے کہا کہ اس کے پاس اس بات کا بھی کوئی ثبوت نہیں کے شام ایٹمی عدم پھلاؤ کے بین الاقوامی پابندیوں کی خلاف ورزی کر رہا ہے۔ امریکہ نے حال ہی میں شام پر یہ الزام عائد کیا ہے کہ وہ مہلک ہتھیاروں کے حصول کے لیے کوشاں ہے۔