یہ صفحہ دوست کو ای میل کیجیئے		پرِنٹ کریں

اینڈریو گلیگن کا دستی کمپیوٹر اب بہت اہم ہوتا جا رہا ہے

جمعرات کے روز کمپیوٹر کے ایک ماہر نے ہٹن انکوائری کو بتایا کہ بی بی سی کے دفاعی امور کے نامہ نگار اینڈریو گلیگن کے زیر استعمال رہنے والے دستی کمپیوٹر میں درج کی گئی ایک یاداشت میں وزیر اعظم کے مشیر اطلاعات الیسٹر کیمپبل کا نام نہیں ہے۔

کمپیوٹر کے ماہر ایڈورڈ وائلڈنگ کے اس بیان سے اس تاثر کو تقویت ملتی ہے کہ ہو سکتا ہے الیسٹر کیمپبل کا ذکر ڈیوڈ کیلی نے نہ کیا ہو اور اینڈریو گلیگن نے اسے اپنی طرف سے شامل کر دیا ہو۔

اینڈریو گلیگن نے یہ کمپیوٹر عراقی اسلحہ کے ماہر ڈاکٹر کیلی کے ساتھ اپنی گفتگو کے اہم نکات درج کرنے کے لئے استعمال کیا تھا۔

لیکن بی بی سی دفاعی امور کے نامہ نگار اینڈریو گلیگن نے اس بات کی تردید کی ہے کہ انہوں نے کمپیوٹر میں لکھے جانے والے نوٹس ڈاکٹر کیلی سے ملاقات کے بعد درج کئے ہیں۔

ایڈورڈ وائلڈنگ نے کمپیوٹر کے معائنے کے بعد بتایا کہ ایسا دکھائی دیتا ہے کہ جیسے کوئی نئی یاداشتی نوٹس لکھنے کی کوشش کرتا رہا ہو اور یہ جانچنے کی کوشش کرتا رہا ہو کہ آیا یاداشتی نوٹسوں کی تاریخ اور وقت کو تبدیل کیا جا سکتا ہے یا نہیں۔

مسٹر وائلڈنگ نے بتایا کہ دستی کمپیوٹر میں موجود یاداشتی نوٹسوں میں سے ایک اس مسودے سے مختلف ہے جو انکوائری کے سامنے پیش جمع کرایا گیا ہے۔

اس یاداشتی نوٹ میں الیسٹر کیمپبل کا ذکر نہیں جبکہ باقی یاداشتوں میں ان کا نام درج ہے۔

ایک اور ماہر کمپیوٹر پروفیسر انتھونی سامز نے انکوائری کو بتایا کہ اس سلسلے میں بہترین شہادت اینڈریو گلیگن کی لیپ ٹاپ کمپیوٹر کے بیک اپ سسٹم میں ہوگی۔

لیکن انکوائری کو یہ بھی بتایا گیا کہ اینڈریو گلیگن ذاتی معلومات کی وجہ سے اپنا لیپ ٹاپ پروفیسر سامز کے حوالے کرنے میں ہچکچاہٹ کا مظاہرہ کر رہے ہیں۔

جب اینڈریو گلیگن کے وکیل نے ان سے ماہر کمپیوٹر کی رپورٹ کے بارے میں دریافت کیا تو انہوں نے کہا کہ اپنے دستی کمپیوٹر پر تاریخ اور وقت تبدیل کرنے کا کوئی تجربہ نہیں کیا۔