یہ صفحہ دوست کو ای میل کیجیئے		پرِنٹ کریں

ہتھیاروں کے برطانوی ماہر ڈاکٹر ڈیوڈ کیلی کی موت کی تحقیقات انتہائی اعلی سطح پر ہو رہی ہیں

منگل کے روز ہٹن انکوائری کمیٹی کے دوسرے مرحلے میں تحقیق کار جج لارڈ ہٹن کے سامنے ڈاکٹر ڈیوڈ کیلی کے اہل خانہ کے وکیل نے کہا کہ وزارت دفاع نے ڈاکٹر کیلی سے ناروا سلوک کیا۔

ہٹن تحقیقاتی کمیٹی ان اسباب کی تہہ تک پہنچنے کی کوشش کر رہی ہے جو عراق کے لئے ہتھیاروں کے برطانوی ماہر ڈاکٹر ڈیوڈ کیلی کی موت پر منتج ہوئے۔

وزارت دفاع میں انٹیلیجنس کے ایک اعلی اہلکار مارٹن ہاورڈ نے اپنے اوپر ہونے والی جرح میں ناروا سلوک کے الزام کو بے بنیاد قرار دیا۔ اور کہا کہ حکومت نے کسی مرحلہ پر بھی ان کا نام خفیہ طور پر افشا کرنے کی کوشش نہیں کی۔

جرح کے اہم گواہ

منگل: پیتھولوجسٹ ڈاکٹر ہنٹ؛ اور مارٹن ہاورڈ، وزارت دفاع میں انٹیلیجنس کے نائب سربراہ بدھ: اینڈریو گلیگن، بی بی سی کے دفاعی نامہ نگار؛ اور رچرڈ سیمبروک، بی بی سی کے نیوز ڈائریکٹر جمعرات: رچرڈ ہیٹ فیلڈ، وزارت دفاع میں شبعہ ملازمت کے ڈائریکٹر؛ اور وزارت دفاع کے مستقل سیکرٹری سر کیون ٹیبِٹ پیر، بائس ستمبر: وزیر دفاع جیف ہون؛ اور سابق میڈیا چیف ایلسٹیئر کیمپبل منگل، تیئیس ستمبر: وزیراعظم کے سرکاری ترجمان ٹام کیلی اور گاڈرِک سمتھ؛ جان سکارلٹ، چیئرمین جوائنٹ انٹیلیجنس کمیٹی؛ گیوین ڈیویس، چیئرمین، بی بی سی بدھ، چوبیس ستمبر: وزارت دفاع میں ڈاکٹر کیلی کے افسر برائن ویلز جمعرات، پچیس ستمبر: اختتامی کارروائی

انکوائری کے سامنے ساٹھ سے زیادہ گواہ پیش ہوئے ہیں۔ اب دوسرے مرحلے میں کیلی کے اہل خانہ، بی بی سی اور سرکاری وکلاء ان گواہوں پر جرح کریں گے۔

اس سے قبل منگل کے روز انکوائری کمیٹی نے ڈاکٹر نکولس ہنٹ کا بیان سنا جنہوں نے ڈاکٹر کیلی کی لاش کا طبی معائنہ کیا تھا۔

ڈاکٹر ہنٹ نے انکوائری کو بتایا کہ ڈاکٹر کیلی کی بائیں کلائی پر پانچ زخم تھے جن کی نوعیت خود لگائے جانے والے زخموں کی سی تھی۔ اس کے علاوہ ان کے جسم پر کوئی اور زخم نہیں تھا۔

البتہ ان کے بدن پر موجود خراشیں اس بات کا پتہ دیتی ہیں کہ وہ جس مقام پر مردہ پائے گئے تھے وہاں تک وہ لڑکھڑاتے اور گھسٹتے ہوئے پہنچے ہوں گے۔