یہ صفحہ دوست کو ای میل کیجیئے		پرِنٹ کریں

ایران کو جلد ہی چند اہم فیصلے کرنا ہوں گے

امریکی دفترِ خارجہ نے ایران کو متنبہ کیا ہے کہ اگر اس نے جوہری توانائی کے بین الاقوامی ادارے آئی اے ای اے سے تعاون نہ کیا تو اس سے ثابت ہوجائے گا کہ ایران جوہری ہتھیاروں کے خفیہ منصوبے پر کام کر رہا ہے۔

یہ تنبیہ آئی اے ای اے کی اس قرار داد کے بعد جاری کی گئی ہے جس میں ایران کو اکتیس اکتوبر تک کی مہلت دی گئی ہے جس میں اسے یہ ثابت کرنا ہوگا کہ وہ جوہری ہتھیاروں کے منصوبے پر کام نہیں کررہا۔

جمعہ کے روز منظور کی جانے والی قرارداد میں یہ واضح نہیں ہے کہ اس تنبیہ کی خلاف ورزی کے کیا نتائج ہوں گے تاہم اس میں سلامتی کونسل کی مداخلت کے امکان پر روشنی ڈالی گئی ہے۔

امریکی دفترِ خارجہ کے ایک ترجمان نے کہا ہے کہ اگر ایران نے بروقت اقدامات نہ کئے تو اس سے واضح ہوجائے گا کہ وہ کچھ چھپا رہا ہے۔

تہران میں بی بی سی کے نامہ نگار جم میر کا کہنا ہے کہ ایران کو جلد ہی چند بے انتہا اہم فیصلے کرنا ہوں گے کیونکہ اس کے پاس وقت کم ہے۔