یہ صفحہ دوست کو ای میل کیجیئے		پرِنٹ کریں

آج سے دو برس قبل گیارہ ستمبر کو جب یرغمال ہوائی جہاز امریکہ کے شہر نیو یارک کے جڑواں ٹاوروں سے ٹکرائے گئے تو یہ کہنا غلط نہ ہوگا کہ اس واقعہ نے دنیا کو بہت حد تک تبدیل کر دیا۔

اس واقعہ نے ان بہت سے مسلمانوں اور خاص طور پر پاکستانیوں کو بھی بہت حد تک تبدیل کر دیا جو امریکہ میں رہتے ہیں اور جنہیں گیارہ ستمبر دو ہزار ایک کے بعد امریکیوں نے بہت عجیب طرح سے دیکھنا شروع کردیا۔

امریکہ میں ہونے والے ان حملوں کے بعد بہت سے مسلمانوں کو گرفتار کر لیا گیا۔

اور گیارہ ستمبر کے بعد سے امریکہ میں رہنے والے مسلمان ہر اس نئے اقدام کا بوجھ برداشت کرنے پر مجبور ہیں جنہیں حکام یہ کہہ کر نافذ کرتے ہیں کہ قومی سلامتی کے لیے ایسا کرنا ضروری ہے۔

اس سال کے اوائل میں امریکی حکومت نے غیر ملکیوں کے لئے ایک نئے پروگرام کا آغاز کیا جس کے مطابق پچیس مسلمان ممالک کے ہر مرد کو حکام کے پاس رجسٹر کرانا لازمی ٹھہرا۔

ان لوگوں کا انٹرویو کیا جاتا ہے، ان کی انگلیوں کے نشان لئے جاتے ہیں اور ان کی تصاویر اتاری جاتی ہیں۔

جب لوگ مجھ سے پوچھتے ہیں کہ تم کہاں کے ہو تو میں انہیں یہ نہیں بتایا کہ میں پاکستانی ہوں

مقصود احمد

اس امریکی مہم کاایک نتیجہ یہ نکلا کہ حکام کو معلوم ہوگیا کہ کئی مسلمان افراد امریکہ میں غیر قانونی طور پر رہائش پذیر تھے۔ پس ہزاروں افراد کو اب امریکہ بدری کا سامنا ہے۔ جب کہ سینکڑوں کو پہلے ہی ان کے ملک واپس بھیجا جا چکا ہے۔ ان میں سے اکثریت پاکستانیوں کی ہے۔

امریکی ’عتاب‘ کا خوف اتنا زیادہ تھا کہ ان بہت سے پاکستانیوں نے بھی جن کے پاس تمام قانونی دستاویزات تھیں، عافیت اسی میں سمجھی کہ یا وہ پاکستان لوٹ جائیں یا پھر امریکہ چھوڑ کر کینڈا کی طرف نقل مکانی کریں۔

ایسے واقعات کے دو سال کے بعد اب نیویارک میں مقیم وکیل خالد اعظم کہتے ہیں کہ اس سے ایک بات یہ ہوئی ہے کہ امریکی حکومت اور عوام کو معلوم ہو گیا ہے کہ امریکہ کے خلاف جرائم کے سلسلے میں تمام مسلمانوں کو موردِ الزام ٹھہرانا درست نہیں ہے۔

وہ کہتے ہیں کہ مسلمانوں نے بھی قدرے اپنے انداز بدلے ہیں اور وہ پہلے کی نسبت امریکی ثقافت کے رنگ میں زیادہ ڈھلے ہیں جس سے نہ صرف اعتماد کی فضا بحال ہوئی ہے بلکہ فاصلے بھی کم ہوئے ہیں۔

تاہم وکیل خالد اعظم کا خیال ہے کہ ابھی مسلمانوں کو اور بہت کچھ کرنے کی ضرورت ہے۔

مسلمانوں کی زندگیوں میں آنے والی تبدیلی کا ایک پہلو یہ ہے کہ ان پر نسل کی بنیاد پر حملوں میں اضافہ ہوا ہے۔

ہیومن رائٹس واچ کے مطابق دو ہزار ایک سے دو ہزار دو کے درمیان نفرت کا شکار ہونے والے اکثر مسلمان تھے۔

مقصود احمد نیویارک میں تعمراتی کام کرتے ہیں۔ ان کا کہنا ہے کہ کام کے دوران وہ اپنی قومی اور مذہبی شناخت چھپاتے ہیں۔ ’جب لوگ مجھ سے کہتے ہیں کہ تم کہاں کے رہنے والے ہو تو میں انہیں یہ نہیں بتایا کہ میرا تعلق پاکستان سے ہے۔‘

اگرچہ بہت سے پاکستانی امریکہ چھوڑ کر واپس چلے گئے ہیں لیکن کئی ایسے بھی ہیں جو یہاں سے جانا نہیں چاہتے۔ ان کے پاس اس کی توجہیہ یہ ہے کہ پاکستان جا کر ان کے بچے وہاں کی طرزِ معاشرت کو اپنا نہیں سکیں گے۔