یہ صفحہ دوست کو ای میل کیجیئے		پرِنٹ کریں

اسرائیلی وزیراعظم بھارت کا دورہ مختصر کرکے وطن واپس پہنچ گئے ہیں

اسرائیلی وزیراعظم ایریل شیرون نے اسرائیلی کابینہ کا اجلاس طلب کیا ہے تاکہ یروشلم اور تل ابیب میں ہونے والے خودکش بم حملوں پر رد عمل ظاہر کرنے کی حکمت عملی طے کی جاسکے۔

ان حملوں کے بعد وزیراعظم شیرون اپنا دورۂ بھارت مختصر کرکے وطن واپس پہنچے تھے۔ کسی حد تک تو اسرائیل نے ان حملوں پر رد عمل شدت پسند تنظیم حماس کے رہنماؤں پر حملوں میں تیزی پیدا کرکے ظاہر کر ہی دیا ہے۔ اسرائیل نے پہلی بار حماس کے کسی رہنما کی رہائش گاہ کو حملے کا نشانہ بنایا ہے۔ جواب میں حماس نے تنبیہ کی ہے کہ وہ بھی اسرائیلیوں کی رہائش گاہوں پر ہی حملے کرے گی۔ یہ صورتحال پہلے ہی خطرناک ہے اور اس صورتحال میں اسرائیلی وزیراعظم کے پاس باقی رہ جانے والے راستے اور بھی زیادہ خطرناک ہوسکتے ہیں۔

امریکہ پہلے ہی اسرائیلی وزیراعظم ایریل شیرون کو تنبیہ کرچکا ہے کہ وہ فلسطینی صدر یاسر عرفات کو ملک بدر نہ کرے۔ بش انتظامیہ کو خدشہ ہے کہ یاسر عرفات کی جلا وطنی نہ صرف فلسطین میں بلکہ پورے خطے میں شدید ردعمل کا باعث بن سکتی ہے۔ ایک اور طریقہ یہ بھی ہوسکتا ہے کہ یاس عرفات کا محاصرہ مزید سخت کردیا جائے مثال کے طور پر رملّہ میں واقع ان کے صدر دفتر کے ٹیلی فون کاٹ دیئے جائیں یا لوگوں کو وہاں داخل ہونے سے روک دیا جائے۔ ایک اور راستہ یہ بھی ہے کہ اسرائیل حماس کے مضبوط قلعے غزہ پر پوری شدت سے حملہ کردے۔

مگر ایک ایسی صورتحال میں جہاں سارے فریقین یعنی امریکہ، اسرائیل اور فلسطینیوں میں سے کسی کے بھی پاس تشدد در تشدد کا سلسلہ روک دینے کا کوئی طریقہ یا راستہ موجود نہیں وہاں اسرائیل کو حاصل یہ تمام راستے یا طریقے شاید کوئی معنی نہیں رکھتے۔

اسرائیلی وزیرخارجہ سلوان شلوم نے فلسطینی صدر یاسر عرفات کو جلاوطن کئے جانے کا مطالبہ کیا ہے۔ ان کا کہنا ہے کہ اسرائیلی کابینہ میں ان کے کئی ساتھی اس مطالبے سے متفق ہیں۔ بدھ کو اسرائیلی طیاروں نے حماس کے رہنما کی رہائش گاہ پر حملہ کرکے ان کے بیٹے اور ذاتی محافظ کو ہلاک کردیا تھا۔