یہ صفحہ دوست کو ای میل کیجیئے		پرِنٹ کریں

اسامہ بن لادن کو پہاڑی علاقے میں دکھایا گیا ہے

عربی ٹیلی ویژن چینل الجزیرہ نے ایک نئی وڈیو نشر کی ہے جس میں القاعدہ کے رہنما اسامہ بن لادن اور ان کے نائب ایمن الظواہری کو دکھایا گیا ہے اور امریکی ٹھکانوں پر مزید حملوں کی دھمکی دی گئی ہے۔

الجزیرہ کا کہنا ہے کہ یہ مناظر غالباً اپریل کے اواخر یا مئی کے آغاز میں فلمائے گئے ہیں۔ اس وڈیو کے ساتھ جو آڈیو ٹیپ ہے اس میں اسامہ کے نائب الظواہری کا ایک بیان ریکارڈ ہے۔

آڈیو ٹیپ سے نشر کیے گئے اس بیان میں امریکی ٹھکانوں پر مزید حملوں کی دھمکی دی گئی ہے۔ نامہ نگاروں کا کہنا ہے کہ اسامہ بن لادن کی یہ نئی وڈیو ٹیپ گیارہ ستمبر کے حملوں کے دو سال پورے ہونے کے موقع پر جاری کی گئی ہے۔

اس ٹیپ میں الظواہری کی آواز میں متنبہ کیا گیا ہے کہ ’اللہ کی مدد سے ہم ہر اس شخص کا ہاتھ کاٹ دیں گے جو ہمیں چھونے کی کوشش کرتا ہے، تم خود کو اپنے جرم کی سزا بھگتنے کے لئے تیار کرلو۔‘

بی بی سی کے دفاعی امور کے نامہ نگار فرینک گارڈنر کا کہنا ہے کہ یہ ٹیپ اس لئے بھی اہم ہے کہ گزشتہ ایک سال میں پہلی بار اسامہ بن لادن کی وڈیو سامنے آئی ہے۔

آڈیو ٹیپ میں الظواہری نے عراقی عوام سے اپیل کی ہے کہ ’اللہ پر بھروسہ کریں، اور امریکیوں کو اس طرح شکار کریں جس طرح شیر اپنا شکار کرتا ہے، اور عراقی سرزمین کو ان کے لئے قبرستان بنادیں۔‘

اپنے پیغام میں الظواہری نے فلسطینیوں سے کہا ہے کہ وہ اسرائیلیوں کے خلاف مزاحمت جاری رکھیں اور ہتھیار نہ ڈالیں کیونکہ ’صرف جہاد ہی فلسطین کی آزادی کا راستہ ہے۔‘

اپنے بیان میں الظواہری نے کہا ہے کہ القاعدہ کے حالیہ حملے چھوٹی موٹی نوعیت کے تھے لیکن امریکہ کے ساتھ اصل جنگ ابھی شروع ہونی ہے۔

یہ واضح نہیں ہے کہ وڈیو میں دکھائی جانے والی یہ پہاڑیاں کہاں کی ہیں۔ اسامہ اور الظواہری کو وڈیو میں افغانی شلوار قمیض پہنے ہوئے دکھایا گیا ہے۔