نو منتخب امریکی صدر جو بائیڈن: ’ایک ایسا صدر بنوں گا جو لوگوں کو تقسیم کرنے کے بجائے متحد کرے‘

لائیو کوریج

1. 8 نومبر 2020بی بی سی اردو کی امریکی صدارتی انتخاب کی کوریج کا اختتام، یہ صفحہ اب مزید اپ ڈیٹ نہیں ہوگا

   امریکی صدارتی انتخاب میں متوقع نتائج کے مطابق جو بائیڈن کو امریکہ کا 46واں صدر منتخب کر لیا گیا ہے اور وہ اگلے سال 20 جنوری کو اپنے عہدے کا حلف اٹھائیں گے۔

   موجودہ صدر ڈونلڈ ٹرمپ نے اب تک شکست تسلیم کرنے کا اعلان نہیں کیا ہے اور جو بائیڈن کی جیت کے اعلان کے بعد سے کوئی عوامی پیغام بھی نہیں دیا ہے۔

   بی بی سی اردو کی جانب سے اب امریکی صدارتی انتخاب کی لائیو کوریج کا اختتام ہوا چاہتا ہے اور یہ صفحہ اب مزید اپ ڈیٹ نہیں ہوگا۔

   صدارتی انتخاب اور اس کے حوالے سے ہمارے مختلف مضامین ہماری ویب سائٹ پر موجود ہیں۔

   • امریکی صدارتی انتخاب: کب کیا ہوا؟
   • امریکی صدارتی انتخاب: 'ایسا صدر بنوں گا جو لوگوںکو تقسیم کرنے کے بجائے انھیں متحد کرے: جو بائیڈن
   • امریکی صدارتی انتخاب 2020 کے نتائج: جو بائیڈن امریکہکے 46ویں صدر منتخب، اب آگے کیا ہو گا؟
   • امریکی صدارتی انتخاب 2020: امریکہ کے نو منتخب صدرجو بائیڈن کون ہیں؟
   • کملا ہیرس: امریکہ میں نئی تاریخ رقم کرنے والی پہلی خاتون اور غیرسفید فام نائب صدر کون ہیں؟
   • امریکی صدارتی انتخاب 2020: اہم معاملات پر نو منتخبامریکی صدر جو بائیڈن کا کیا مؤقف ہے؟

2. 8 نومبر 2020بریکنگ, ’ایک ایسا صدر بنوں گا جو لوگوں کو تقسیم کرنے کے بجائے انھیں ملائے‘

   امریکہ کے نو منتخب صدر جو بائیڈن نے قوم سے اپنے پہلے خطاب میں کہا کہ وہ وعدہ کرتے ہیں کہ وہ ایک ایسے صدر ہوں گے جو تفرقہ پھیلانے کے بجائے لوگوں کو آپس میں ملائے، جو نیلی ریاست (ڈیموکریٹس) یا لال ریاست (رپبلکن) نہیں دیکھے گا بلکہ پورا امریکہ دیکھے گا اور اپنا پورا دل و جان لگا کر اپنی قوم کے اعتماد جیتنے کی کوشش کرے گا۔

   ریاست ڈیلاوئیر کے شہر ولمنگٹن کے چیز سینٹر سے خطاب کرتے ہوئے نو منتخب صدر جو بائیڈن نے مزید کہا کہ وہ بہت شکر گزار ہیں کہ ان پر بھروسہ اور اعتماد کیا گیا جس کی مدد سے وہ امریکی صدارتی انتخابات کی تاریخ میں سات کروڑ چالیس لاکھ سے زیادہ ووٹ حاصل کر کے سب سے زیادہ ووٹ لینے والے صدر بن گئے۔

3. 8 نومبر 2020بریکنگ, امریکہ کے نو منتخب صدر جو بائیڈن کا قوم سے بحیثیت صدر پہلا خطاب

   امریکی صدارتی انتخاب کے فاتح جو بائیڈن نے منتخب ہونے کے بعد اپنا پہلا خطاب دے رہے ہیں۔

   اس سے قبل نو منتخب نائب صدر کملا ہیرس نے بھی اپنا خطاب دیا تھا جس میں ان کا کہنا تھا کہ وہ وہ اس عہدے پر فائز ہونے والی پہلی خاتون ضرور ہیں لیکن آخری نہیں۔

   انھوں نے عوام کا شکریہ ادا کرتے ہوئے کہا کہ یہ امریکہ کے لیے ایک نئے دن کا آغاز ہے۔

4. 8 نومبر 2020آج ٹرمپ کا خطاب متوقع نہیں

   ڈونلڈ ٹرمپ نے امریکہ کے مقامی وقت کے مطابق صبح ساڑھے گیارہ بجے فلاڈیلفیا میں پریس کانفرنس کرنے کا اعلان کیا تھا تاہم بائیڈن کی کامیابی کے کچھ ہی گھنٹوں میں شاید انھوں نے اپنا یہ ارداہ بدل لیا اور توقع نہیں کی جا رہی کہ وہ اب تقریر کریں گے۔

   تاہم ٹوئٹر پر اب سے تھوڑی دیر قبل انھوں نے اپنی ٹویٹس میں ایک بار پھر بغیر کسی ثبوت کے صدارتی انتخاب میں دھاندلی کا الزام عائد کیا ہے۔

5. 8 نومبر 2020ٹرمپ نے ایک اور مقدمہ دائر کر دیا

   گذشتہ کچھ دنوں میں ٹرمپ بغیر کوئی ثبوت پیش کیے بغیر کئی بار صدارتی انتخاب میں بے ضابطگیوں کے الزام عائد کر چکے ہیں۔

   اب ان کی انتخابی دفتر نے ایریزونا میں ایک اور مقدمہ دائر کر دیا ہے جس میں الیکشن کے روز ڈالے گئے ووٹوں کو غلط طریقے سے مسترد کرنے کا الزام لگایا گیا ہے۔

6. 8 نومبر 2020ایران اور روس کا میڈیا خاموش

   ایران کے ٹی وی چینلز نے جو بائیڈن کی فتح پر کوئی اہم تبصرہ نہیں کیا، جو ایران کے اس دعوے کا عکاس ہے کہ ایران کو اس سے کوئی فرق نہیں پڑتا کہ امریکہ کی قیادت کون کرتا ہے۔

   ایران کے رہبرِ اعلیٰ آیت اللہ علی خامنہ ای نے ایک ٹویٹ دوبارہ پوسٹ کی ہے، جو انھوں نے انتخابی دن پر شیئر کی تھی، جس میں انھوں نے اس دوڑ کو ’لبرل جمہوریت کا بدصورت چہرہ‘ قرار دیا تھا۔

   ایک ٹی وی چینل نے کچھ ایرانی لوگوں کی رائے لی جس میں یہی کہا گیا ہے کہ بائیڈن اور ٹرمپ کے مابین کوئی فرق نہیں اور ایرانیوں کو امریکی سیاستدانوں پر کوئی اعتماد نہیں رکھنا چاہیے بلکہ صرف اپنے آپ پر انحصار کرنا چاہیے۔‘

   دوسری جانب روسی میڈیا بھی اس حوالے سے خاموش نظر آ رہا ہے۔ مشہور چینل ون کے شام کے سب سے اہم بلیٹن میں یہ خبر چوتھے نمبر پر چلائی گئی ہے۔

7. 8 نومبر 2020بائیڈن اور کملا کے لیے مبارکباد کے پیغام

   جو بائیڈن کو دنیا بھر سے مبارکباد کے پیغام وصول ہو رہے ہیں لیکن ان کے سب سے بڑے حمایتی ان کے گھروں میں ہیں۔

   بائیڈن کی فتح کے اعلان کے فوری بعد ان کی اہلیہ اور بیٹی نے ٹوئٹر پر مستقبل کے صدر کے ساتھ اپنی تصاویر شیئر کیں۔

   نو منتخب نائب صدر کملا ہیرس کے شوہر اور ان کی بہن نے بھی ٹوئٹر پر کملا کو مبارکباد دیتے ہوئے فیملی کی تصاویر شیئر کی ہیں۔

8. 8 نومبر 2020بریکنگ, جو بائیڈن مقامی وقت کے مطابق رات آٹھ بجے خطاب کریں گے

   امریکہ کے نو منتخب صدر جو بائیڈن مقامی وقت کے مطابق رات آٹھ بجے (پاکستانی وقت کے مطابق صبح چھ بجے) خطاب کریں گے۔ ان کے ساتھ نو منتخب نائب صدر کملا ہیرس بھی ہوں گی۔

   یہ تقریب امریکی ریاست ڈیلاویئر کے شہر ولمنگٹن میں ہو گی۔ اس موقع پر بائیڈن کی اہلیہ جبکہ کملا ہیرس کے شوہر بھی ان کے ساتھ موجود ہوں گے۔

9. 8 نومبر 2020ٹرمپ: ’یہ الیکشن میں جیتا اور مجھے 71،000،000 ووٹ ملے‘

   ڈونلڈ ٹرمپ نے اپنی تازہ ٹویٹ محیں ایک بار پھر دھاندلی کے الزامات کو دہرایا ہے۔

   انھوں نے اپنی ٹویٹ میں لکھا: ’مبصرین کو گنتی کے کمروں میں اجازت نہیں دی گئی تھی۔ یہ الیکشن میں جیتا اور مجھے 71،000،000 قانونی ووٹ ملے۔ بری چیزیں ہوئیں ہیں جنھیں ہمارے مبصرین کو دیکھنے کی اجازت نہیں تھی۔ ڈاک کے ذریعے وصول ہونے والے لاکھوں ووٹ ان لوگوں کو بھیجے گئے، جنھوں نے وہ مانگے ہی نہیں تھے۔‘

   اس سے اگلی ایک ٹویٹ میں انھوں نے دوبارہ دہرایا: ’71،000،000 قانونی ووٹ۔ صدارتی دفتر میں موجود کسی صدر کے لیے اب تک کے سب سے زیادہ ووٹ۔‘

10. 8 نومبر 2020پروکلین سے نو منتحْب صدر کے لیے پیغام ’ شکریہ جو‘

    جہاں جو بائیڈن کی فتح کا جشن مناتے ہوئے ان کے کئی حمایتی سڑکوں پر نکل آئے تو وہیں ڈیموکریٹ سینٹر چک شمر بھی بروکلین کی سڑکوں پر نظر آئے۔

    سینٹر چک شمر نے اپنے ہاتھ میں فون اٹھا رکھا تھا اور ان کے ساتھ کال پر جو بائیڈن تھے اور اس دوران نو منتخب صدر کے حمایتیوں نے چیختے ہوئے انھیں شکریہ کہا۔

11. 8 نومبر 2020اوباما: بائیڈن تمام ’غیر معمولی چیلنجز‘ کا سامنا کرنے کے لیے تیار ہیں

    امریکہ کے سابق صدر براک اوباما نے کہا ہے کہ ان کے سابق نائب صدر تمام ’غیر معمولی چیلنجز‘ کا سامنا کرنے کے لیے تیار ہیں جن میں ایک وبائی مرض، غیر مساوی معیشت اور انصاف کا نظام، خطرے سے دوچار جمہوریت اور ماحول کو درپیش چیلنجز شامل ہیں۔

    براک اوباما نے جو بائیڈن کی فتح پر بیان جاری کرتے ہوئے کہا ہے کہ بائیڈن ان امریکیوں کے لیے بھی کام کریں گے جنھوں نے ان کی حمایت نہیں کی۔

    براک اوباما نے جو بائیڈن اور کملا ہیرس کو مبارکباد دینے کے لیے فون بھی کیا ہے۔

12. 8 نومبر 2020بائیڈن کی فتح کے اعلان کے وقت ٹرمپ گالف کھیل رہے تھے

    اطلاعات کے مطابق صدارتی دوڑ میں بائیڈن کی فتح کے اعلان کے وقت ڈونلڈ ٹرمپ ورجینا کلب میں گالف کھیل رہے تھے۔

    ایسوسی ایٹڈ پریس کے مطابق اعلان کے بعد بائیڈن کے حمایتی خوشی جبکہ ٹرمپ کے حمایتی غم کا اظہار کرنے کلب پہنچ گئے۔

13. 8 نومبر 2020بائیڈن امریکہ کے 46ویں نومنتخب صدر: بی بی سی اردو کا واشنگٹن سے خصوصی فیس بک لائیو

14. 7 نومبر 2020برطانیہ کے وزیر اعظم بورس جانسن کی جو بائیڈن کو مبارکباد

    برطانیہ کے وزیر اعظم بورس جانسن نے بھی امریکہ کے منتحب ہونے والے نئے صدر جو بائیڈن اور نائب صدر کمالا ہیرس کو کامیابی پر مبارکباد دی ہے۔

    ٹویٹ کرتے ہوئے ان کا کہنا تھا کہ کملا امریکہ کی پہلی خاتون نائب صدر بنی ہیں جو کہ ایک ’یادگار لمحہ‘ ہے۔

    ان کا کہنا تھا کہ وہ بائیڈن انتظامیہ کے ساتھ قریبی تعلقات اور ایک ساتھ مل کر کام کرنے کے لیے پرامید ہیں۔

15. 7 نومبر 2020جو بائیڈن کی فتح پر حامی ووٹرز کا ردعمل تصاویر میں

16. 7 نومبر 2020دنیا کے سیاسی رہنماؤں کا جو بائیڈن کی فتح پر ردعمل

    جو بائیڈن کی امریکی صدارتی انتخاب میں کامیابی کی خبر آتے ہی دنیا کے مخلتف سیاسی رہنماؤں نے فوراً ٹوئٹر پر اپنا ردعمل دیتے ہوئے انھیں کامیابی پر مبارکباد دی ہے۔

    کینیڈا کے وزیر اعظم جسٹن ٹروڈو نے انھیں اور نائب صدر کمالا ہیرس کو مبارکباد دیتے ہوئے کہا کہ ہم دونوں ممالک قریبی دوست، اتحادی اور ساتھی ہیں، ہم عالمی سطح پر ایک خاص تعلق میں ہیں، میں آپ دونوں کے ساتھ اس تعلق میں مزید بڑھاوا دینے کے لیے پر امید ہوں۔‘

    جبکہ اس کے ساتھ ساتھ ائرلینڈ کے رہنما، سکاٹ لینڈ کے فرسٹ منسٹرنکولا سٹرجن نے بھی ٹوئٹ کرتے ہوئے انھیں مبارکباد دی۔ جبکہ برطانیہ کی لیبر پارٹی اور اپوزیشن کے رہنما کیئر سٹارمر سمیت دیگر رہنماؤں نے بھی جو بائیڈن کو کامیابی پر مبارکباد دی۔

17. 7 نومبر 2020بریکنگ, 77 سالہ بائیڈن امریکہ کے معمر ترین نومنتخب صدر ہیں

18. 7 نومبر 2020کملا ہیرس: امریکہ کی پہلی خاتون اور غیر سفیدفام نائب صدر

19. 7 نومبر 2020’الیکشن ابھی ختم نہیں ہوا‘: ڈونلڈ ٹرمپ

    صدر ٹرمپ جو بظاہر اس وقت اپنے ورجینیا کے ریزورٹ میں گالف کھیل رہے تھے جب جو بائیڈن کی کامیابی کی پیش گوئی کی گئی نے اس خبر پر ردعمل دیتے ہوئے کہا ہے کہ ’ہم سب جانتے ہیں کہ کیسے جو بائیڈن غلط طریقے سے فاتح قرار دیے جانے میں عجلت کر رہے ہیں اور کیوں ان کے میڈیا کے ساتھ اس میں ان کی بھرپور مدد کر رہے ہیں۔ وہ نہیں چاہتے کہ سچائی سب سے سامنے آئے۔‘

    ان کی جانب سے جاری کردہ بیان میں کہا گیا ہے کہ ’سادہ سی حقیقت یہ ہے کہ الیکشن ابھی ختم نہیں ہوا۔‘ انھوں نے واضح طور پر اس جانب اشارہ کرتے ہوئے کہا کہ ابھی تک الیکشن حکام نے ووٹوں کی گنتی کی تصدیق نہیں کی ہے اور یہ تمام اعلانات نیوز میڈیا کی جانب سے ہیش گوئیوں کے ہیں۔

    تاہم ہم یہ واضح کر دیں کہ کسی انتخاب کے بعد یہ معمول کی بات ہے کہ میڈیا جیتنے والے امیدوار کے فتح کی پیش گوئی اس ووٹوں کے تجزیہ کی بنیاد پر کرتا ہے جن کی گنتی کا عمل مکمل ہو چکا ہوں۔

20. 7 نومبر 2020بائیڈن کی ٹیم کا بیان: ’امریکہ کے متحد ہونے کا وقت ہے‘

    امریکہ کے نے منتخب ہونے والے صدر جو بائیڈن کی سیاسی ٹیم نے ان کی فتح کی پیش گوئی کے فوراً بعد بیان جاری کرتے ہوئے کہا ہے کہ وہ 25 برسوں میں پہلے امید وار ہیں جنھوں نے صدارتی عہدے سبکدوش ہونے والے صدر کو شکست دی ہو۔

    اس بیان میں جو بائیڈن کا امریکی عوام کے نام پیغام جاری کرتے ہوئے کہا گیا کہ ’امریکی عوام کی جانب سے مجھ پر اور نائب صدر کمالا ہیرس پر اعتماد کرنے پر مشکور ہوں‘

    بیان میں کہا گیا کہ ’امریکی عوام نے بہت سی رکاوٹوں کے باوجود ریکارڈ تعداد میں ووٹ ڈالے جس کی ماضی میں مثال نہیں ملتی ہے۔‘

    اب جبکہ انتحابی مہم ختم ہو گئی ہے لہذا اپنے سیاست اختلاف بھلا کر اور ایک ساتھ ایک قوم کی طرح قریب آنے کا وقت آ گیا ہے۔ یہ امریکہ کے لیے متحد ہونے کا وقت ہے۔ ہم متحدہ ریاست ہائے امریکہ ہیں اور ایسا کچھ نہیں ہے جو ہم متحد ہو کر نہ کر سکیں۔