آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
ٹی ٹوئنٹی کرکٹ ورلڈ کپ میں اپنے افتتاحی میچ میں انڈیا کے خلاف فتح کے بعد منگل کو پاکستان نے اپنے دوسرے میچ میں نیوزی لینڈ کو پانچ وکٹ سے ہرا دیا۔ کریئر کی بہترین بولنگ کرنے والے حارث رؤف اور شاندار بیٹنگ سے میچ ختم کرنے والے آصف علی نے جیت میں مرکزی کردار ادا کیا۔
عابد حسین and شجاع ملک
آج کے دن کے دونوں میچوں کی کوریج مکمل ہونے کے بعد اب یہ صفحہ مزید اپ ڈیٹ نہیں کیا جائے گا۔
ٹی ٹوئنٹی ورلڈ کپ کے حوالے سے بی بی سی اردو کی مزید کوریج، مضامین اور تجزیہ پڑھنے کے لیے قارئین ہمارے خصوصی سیکشن پر کلک کریں۔
بدھ کے روز ٹی ٹوئنٹی ورلڈ کپ میں مزید دو میچز کھیلے جائیں گے۔
ابو ظہبی کے میدان میں پہلا میچ بنگلہ دیش اور انگلینڈ کا ہوگا جبکہ شام کو اسی میدان پر سکاٹ لینڈ کا مقابلہ نمیبیا سے ہوگا۔
منگل کو ورلڈ کپ کے دو میچ کھیلے گئے جس میں سے ایک گروپ ون کا اور دوسری گروپ ٹو کا میچ تھا۔
دن کے پہلے میچ میں گروپ ون کی ٹیمیں جنوبی افریقہ اور ویسٹ انڈیز کا ٹاکرا تھا اور ان دونوں کے لیے یہ میچ بہت اہم تھا کیونکہ دونوں نے اپنے پہلے میچ میں شکست کھائی تھی۔
تاہم ویسٹ انڈیز کی ٹیم نے اس بار بھی اچھا نہ کھیلا اور 20 اوورز میں صرف 143 رنز بنا سکی۔
جنوبی افریقہ کی ٹیم نے دبئی کے میدان پر یہ ہدف باآسانی 19ویں اوور میں صرف دو وکٹوں کے نقصان پر پورا کر لیا۔
اس جیت کے ساتھ ان کے دو میچوں میں دو پوائنٹس ہیں اور نیٹ رن ریٹ مثبت 0.179 ہے۔ ویسٹ انڈیز اب دو میچز کے بعد صفر پوائنٹ ہیں اور ان کا نیٹ رن ریٹ منفی 2.55 ہے۔
دوسری جانب شارجہ میں کھیلے گئے دوسرے میچ میں پاکستان نے ایک بہت دلچسپ مقابلے کے بعد نیوزی لینڈ کو پانچ وکٹوں سے شکست دے دی اور دو میچوں میں چار پوائنٹس حاصل کر کے سرفہرست ہو گیا ہے۔
پاکستان کا نیٹ رن ریٹ اب مثبت 0.738 ہے اور ان کا اگلا میچ 29 اکتوبر کو افغانستان کے خلاف دبئی میں ہے۔
نیوزی لینڈ کی ٹیم کا یہ پہلا میچ تھا اور اب ان کا نیٹ رن ریٹ منفی 0.738 ہے۔ کیویز اب اپنا اگلا میچ 31 اکتوبر کو انڈیا کے خلاف کھیلیں گے۔
پاکستان کے کپتان بابر اعظم نے میچ کے بعد اپنے خیالات کا اظہار کرتے ہوئے کہا کہ وہ اس جیت سے ملنے والے حوصلے کو آگے لے کر جائیں گے۔
انھوں نے شاہین آفریدی اور حارث رؤف کی بولنگ کی خصوصی طور پر تعریف کی اور کہا کہ انھوں نے بہت متاثر کن کارکردگی دکھائی۔
’ہم نے شاید ان کو دس رنز زیادہ دے دیے تھے لیکن یہ کرکٹ ہے اور ایسا ہو جاتا ہے۔‘
شعیب ملک اور آصف علی کی بہترین بیٹنگ پر بھی انھوں نے کہا کہ جیت کا سہرا ان کے سر بھی جاتا ہے۔
’ہر گیم اہم ہے، لیکن ہم باری باری لے کر جانا چاہتے ہیں اور کھیل کے ہر شعبے میں اچھی کارکردگی دکھانا چاہتے ہیں۔‘
نیوزی لینڈ ٹیم کے کپتان کین ولیمسن نے میچ کے بعد کہا کہ وہ اس ہار سے کافی مایوس ہیں۔
’بدقسمتی سے ہم کھیل کے آخر میں مقابلہ ختم نہیں کر سکے لیکن ہمارا سامنا پاکستان کی بہت مضبوط ٹیم سے تھا اور میں ان کو مبارک باد پیش کرتا ہوں۔‘
ولیمسن نے پاکستان کے بارے میں مزید کہا کہ یہ بہت اچھی ٹیم ہے اور ان کی کارکردگی کو دیکھنا ہو گا۔
انھوں نے کہا کہ وہ اب اگلے میچ کے لیے تیاری کریں گے۔
میچ کے بہترین کھلاڑی قرار دیے جانے والے حارث رؤف نے اعزاز حاصل کرنے کے بعد کہا کہ وہ خدا کے شکر گزار ہیں اور انھوں نے ٹیم کی شاندار فیلڈنگ اور شائقین کی حمایت کا شکریہ ادا کیا۔
’میں دو سال سے کھیل رہا ہوں۔ ہم سب ایک دوسرے کی حمایت کرتے ہیں اور اور اپنے پلانز ایک دوسرے کے ساتھ شئیر کرتے ہیں اور وہ ہمیں حوصلہ دیتا ہے۔‘
گپٹل کی وکٹ کے بارے میں انھوں نے کہا کہ وہ بہت قیمتی تھی اور انھوں نے پی ایس ایل میں اپنی ٹیم لاہور قلندرز کا شکریہ ادا کرتے ہوئے کہا کہ انھی کی وجہ سے وہ یہاں ہیں۔‘
پاکستان نے اپنے دوسرے میچ میں نیوزی لینڈ کو پانچ وکٹوں سے ہرا دیا۔
لوگ جیت کا جشن کیسے منا رہے ہیں؟ علی کاظمی کے ساتھ بی بی سی اردو کا فیس بک لائیو
پاکستان نے ٹی ٹوئنٹی ورلڈ کپ میں اپنے دوسرے میچ میں دلچسپ مقابلے کے بعد نیوزی لینڈ کو پانچ وکٹوں سے شکست دے کر گروپ ٹو میں پہلی پوزیشن حاصل کر لی ہے۔
پاکستان کی فتح میں مرکزی کردار حارث رؤف کی شاندار بولنگ اور مشکل وقت میں آصف علی کی جارحانہ بیٹنگ کا رہا۔
حارث رؤف نے اپنے کرئیر کی بہترین بولنگ کرتے ہوئے 22 رنز کے عوض چار وکٹیں حاصل کیں جبکہ آصف علی نے محض 12 گیندوں پر تین چھکوں اور ایک چوکے کی مدد سے قیمتی 27 رنز بنا کر پاکستان کو جیت سے ہمکنار کروایا۔
مچل سانٹنر کے آخری اوور میں شعیب ملک نے اپنے طویل تجربے کا فائدہ اٹھاتے ہوئے اوور میں 15 رنز حاصل کر لیے اور اب پاکستان کو دو اوورز میں نو رنز درکار ہیں۔
نئے آنے والے آصف علی نے ٹم ساؤتھی کو بہترین انداز میں کھیلتے ہوئے دو لگاتار چھکے مارے اور اس کی مدد سے مطلوبہ اوسط نیچے آ گئی ہے۔
اب پاکستان کو تین اوورز میں 24 رنز کی ضرورت ہے۔
اش سودھی نے اپنا سپیل مکمل کر لیا جس میں انھوں نے 29 رنز کے عوض دو اہم وکٹیں حاصل کیں۔
پاکستان کی جانب سے شعیب ملک نے بالآخر اپنا پہلا چوکا مار دیا لیکن وہ اس وقت 14 گیندوں پر صرف 12 رنز بنا سکے ہیں۔
پاکستانی کی اننگز آہستہ آہستہ اپنے اختتام کی جانب بڑھ رہی ہے اور کیوی بولرز ان پر پوری طرح حاوی نظر آ رہے ہیں۔
بولٹ کے اوور میں عماد وسیم نے ایک چوکا لگایا لیکن اگلے ہی اوور میں آؤٹ ہو گئے۔
عماد وسیم کی مایوس کن کارکردگی کا سلسہ کافی عرصے سے جاری ہے۔
اکتوبر 2019 میں سری لنکا کے خلاف 47 کی اننگز کے بعد سے ابتک 12 اننگز میں ان کا بہترین اسکور صرف 20 رنز رہا ہے۔
تاہم نئے بلے باز آصف علی نے اپنی پہلی گیند پر چار رنز حاصل کر کے پاکستان کے لیے اوور میں نو رنز حاصل کر لیے۔
اس موقع پر کیوی ٹیم نے اپنے 100 رنز مکمل کر لیے تھے۔
اش سودھی کے تیسرے اوور میں پاکستان نے کل سات رنز حاصل کیے اور اس کے بعد اب رن حاصل کرنے کی مطلوبہ اوسط 8.83 تک پہنچ چکی ہے۔
