لائیو, اسرائیل پر ایرانی میزائل حملوں میں درجنوں افراد زخمی، امریکہ نے پابندی کا شکار ممالک کو عارضی طور پر روسی تیل خریدنے کی اجازت دے دی

لائیو کوریج

1. 4 منٹ قبلایرانی حکومت کی اہم شخصیات کو ہلاک کرنا ’میرے لیے اعزاز‘ ہے: صدر ٹرمپ

   امریکی صدر ڈونلڈ ٹرمپ نے اپنے ایک بیان میں ایرانی حکومت کے ارکان کی امریکی فوج کے ہاتھوں ہلاکت کو اپنے لیے ’بڑا اعزاز‘ قرار دیا ہے۔

   صدر ٹرمپ نے سوشل میڈیا اکاؤنٹ تروتھ سوشل پر لکھا کہ ’ہم ایران کی دہشت گرد حکومت کو فوجی، معاشی اور دیگر طریقوں سے مکمل طور پر تباہ کر رہے ہیں۔‘

   ٹرمپ نے الزام عائد کیا کہ ’47 برسوں سے دنیا بھر میں وہ(ایران) بے گناہ لوگوں کو قتل کر رہے ہیں اور اب میں، بطور امریکہ کا 47 واں صدر انھیں ہلاک کر رہا ہوں۔ یہ کرنا کتنا بڑا اعزاز ہے۔‘

   ٹرمپ نے دعویٰ کیا کہ ایران کی بحریہ ختم ہو گئی ہے، ان کی فضائیہ اب موجود نہیں، میزائل، ڈرون اور باقی سب کچھ تباہ کیا جا رہا ہے، اور ان کے رہنماوں کا نشان تک زمین سے مٹا دیا گیا ہے۔‘

   انھوں نے کہا کہ ’ہمارے پاس موجود اسلحہ اور جنگی طاقت بہت زیادہ ہے اور بہت زیادہ وقت ہے۔ دیکھیں کہ ان لوگوں کے ساتھ آج کیا ہوتا ہے۔‘

2. 18 منٹ قبلسعودی عرب کا مزید آٹھ ڈرونز کو روکنے کا دعویٰ

   سعودی وزارت دفاع کے ترجمان نے اپنے بیان میں کہا ہے کہ ملک کی فضائی دفاع نے مزید آٹھ ڈرونز گرا دیے ہیں۔

   بیان میں کہا گیا کہ صوبہ الخرج اور ریاض کے علاوہ یہ ڈرون وسطی اور مشرقی علاقوں میں مار گرائے گئے ہیں۔

   یاد رہے کہ اس سے قبل سعودی وزارت دفاع نے اطلاع دی تھی کہ حملوں کی نئی لہر میں 14 ڈرونز کو روک کر تباہ کر دیا گیا ہے جبکہ اس کے بعد مزید آٹھ ڈرونز کے تباہ کرنے کا بیان سامنے آیا ہے۔

3. 54 منٹ قبلاسرائیل پر میزائل حملے میں درجنوں افراد زخمی، متاثرہ علاقوں میں شہریوں کو باہر نہ نکلنے کی ہدایات

   اسرائیلی ایمرجنسی سروسز نے جمعے کی علی الصبح شمالی حصے میں واقع ایک گاؤں پر میزائل گرنے سے درجنوں افراد زخمی ہونے کی تصدیق کی ہے۔

   ایم ڈی اے (ماگن ڈیوڈ ادوم) ایمبولینس سروس نے کہا کہ طبی عملے نے 58 زخمیوں کو طبی امداد فراہم کی ہے اور انھیں ناصرہ کے قریب واقع مقامی ہسپتالوں میں منتقل کیا۔

   اسرائیلی میڈیا کے مطابق ایک خاتون جنھیں میزائل کا ایک نوکدار ٹکڑا لگا، وہ قدرے زخمی ہیں جبکہ باقی 57 افراد کو شیشے کے ٹکڑوں سے معمولی نوعیت کی چوٹیں آئی ہیں۔

   اسرائیلی فوج نے کہا کہ ہوم فرنٹ کمانڈ کے اہلکاروں کو جائے وقوع پر بھیج دیا گیا ہے۔

   فوج کے بیان میں کہا گیا کہ ’فورسز ہنگامی اور ریسکیو اداروں کے تعاون سے موقع پر صورتحال کا جائزہ لے رہی ہیں تاکہ علاقے کو کلیئر کیا جا سکے۔

   دوسری جانب ایک علیحدہ بیان میں ای آئی ڈی ایف نے ایران کی جانب سے اسرائیل پر میزائل داغے جانے کی تصدیق کی گئی ہے۔

   اسرائیلی فوج نے ٹیلیگرام پر جاری ایک بیان میں کہا ہے کہ وہ ایران کی جانب سے اسرائیل کی طرف داغے گئے میزائلوں کو روکنے کی کوشش کر رہے ہیں۔

   بیان میں کہا گیا ہے کہ اسرائیل کے متاثرہ علاقوں میں موبائل فونز پر وارننگ بھیج دی گئی ہے اور عوام کو ہدایت کی گئی ہے کہ مزید اطلاع تک محفوظ جگہوں سے باہر نہ نکلیں۔

4. ایک گھنٹہ قبلپاکستان: یوم القدس پر سکیورٹی کے انتظامات، اسلام آباد اور کراچی میں تعلیمی ادارے بند، ریڈ زون جانے والے راستے سیل

   پاکستان کے مختلف شہروں میں آج ’یوم القدس‘ کے حوالے سے مذہبی جماعتوں کی جانب سے ریلیوں اور اجتماعات کا اعلان کیا گیا ہے جبکہ اس موقع پر سکیورٹی کے پیش نظرمختلف شاہراہوں کو بند کیا گیا ہے اور متبادل ٹریفک پلان بھی جاری کیے ہیں۔

   یاد رہے کہ ہر سال مسلمانوں کے مقدس مہینے رمضان کا آخری جمعہ یوم القدس کے طور پر منایا جاتا ہے۔ اس موقع پر دنیا بھر میں فلسطینیوں کے حق میں مظاہرے منعقد کیے جاتے ہیں۔

   عالمی یوم القدس کی مناسبت سے پاکستان کے مختلف شہروں میں مذہبی جماعتوں کی جانب سے فلسطین کے حق میں ریلیاں نکالنے کا اعلان بھی کیا گیا ہے۔

   یوم القدس کی حساسیت کے پیش نظر وفاقی دارالحکومت اسلام آباد میں مقامی تعطیل کا اعلان کیا گیا ہے اور ڈپٹی کمشنر کی جانب سے جاری اعلامیے کے مطابق تمام تعلیمی اداروں میں بھی آج چھٹی دی گئی ہے۔

   کراچی میں بھی آج یوم القدس کی ریلیوں کا اعلان کیا گیا ہے جس کے باعث کسی بھی ناخوشگوار صورت حال سے نمٹنے کے لیے عام تعطیل کا اعلان کیا گیا ہے۔

   ملت جعفریہ پاکستان کی جانب سے اعلامیہ میں کہا گیا کہ ’عالمی یومِ القدس کے موقع پر ملک بھر کی طرح اسلام آباد میں القدس ریلی بعد نماز جمعہ دن ڈیڑھ بجے جامع مسجد اثناعشری جی-6/2 اسلام آباد سے چائنا چوک تک جائے گی۔‘

   اسلام آباد میں کنٹینر لگا کے راستے بند

   یوم القدس کے موقع پر اسلام آباد کے ریڈ زون کو جانے کے لیے صرف مارگلہ روڈ کو کھلا رکھا گیا ہے تاہم وہاں موجود سکیورٹی چیک پوسٹس پر معمول سے زیادہ نفری تعینات کی گئی ہے جبکہ وہاں جانے والے دیگر راستے کنٹینر لگا کر سیل کر دیے گئے ہیں۔

   اسلام آباد میں ریڈ زون جانے والے راستوں پر جا بجا کنٹینرز کھڑے کر دیے ہیں جبکہ ریلی کے راستوں پر بھی ٹریفک کے لیے متبادل روٹس فراہم کیے گئے ہیں۔

   اسلام آباد ٹریفک پولیس کی جانب سے اعلامیے میں درخواست کی گئی ہے کہ شہری غیر ضروری سفر سے گریز کریں اور متبادل راستوں کا استعمال کریں۔

   دوسری جانب ترجمان اسلام آباد پولیس نے بتایا ہے کہ آج نماز جمعہ کے اجتماعات اور یوم القدس کے جلوسوں کے سلسلے میں شہر بھر میں فول پروف سکیورٹی انتظامات کیے گئے ہیں۔

   پولیس کے مطابق’ نماز جمعہ کے اجتماعات اور یوم القدس کے جلوسوں کی سکیورٹی کے لیے اسلام آباد پولیس کے 3500 سے زائد اہلکار ڈیوٹی پر تعینات ہیں۔ فیصل مسجد سمیت تمام مساجد اور امام بارگاہوں کے اطراف سخت سکیورٹی انتظامات کیے گئے ہیں۔‘

5. 2 گھنٹے قبلامریکہ نے پابندی کے شکار ممالک کوعارضی طور پر روسی تیل خریدنے کی اجازت دے دی

   امریکہ نے عارضی طور پر پابندیوں کے شکار ممالک کو روسی تیل اور پیٹرولیم مصنوعات خریدنے کی اجازت دے دی ہے تاہم شرط یہ ہے کہ وہ تیل پہلے سے جہازوں پرلدا ہوا ہو اور سمندر میں موجود ہو۔

   امریکی محکمۂ خزانہ کے سیکریٹری سکاٹ بیسنٹ نے کہا کہ یہ ایک عارضی اقدام ہے جس کا مقصد جنگ کے دوران ’عالمی توانائی منڈیوں میں استحکام کو فروغ دینا‘ ہے۔

   صدر ٹرمپ کی یہ اجازت 11 اپریل تک برقرار رہے گی۔

   سکاٹ بیسنٹ نے کہا کہ ’یہ محدود اور قلیل مدتی اقدام صرف اس تیل پر لاگو ہوتا ہے جو پہلے سے ترسیل کے مراحل میں ہے اور اس سے روسی حکومت کو کوئی نمایاں مالی فائدہ نہیں پہنچے گا۔‘

   یاد رہے کہ جمعرات کو تیل کی قیمتیں دوبارہ 100 ڈالر فی بیرل سے اوپر چلی گئی تھیں اور سٹاک مارکیٹس میں کمی دیکھی گئی۔

   سکاٹ بیسنٹ نے مزید کہا کہ ’تیل کی قیمتوں میں یہ عارضی اضافہ ایک مختصر اور وقتی خلل ہے، جو طویل مدت میں ہمارے ملک اور معیشت کے لیے بڑے فائدے کا باعث بنے گا۔‘

   اس سے قبل بیسنٹ نے کہا تھا کہ جیسے ہی عسکری طور پر ممکن ہو امریکی حکومت آبنائے ہرمز سے گزرنے والے جہازوں کو حفاظتی سکواڈ کے ساتھ لے جانا شروع کر دے گی۔

   سکائی نیوزسے بات چیت میں ان کا کہنا تھا کہ فوجی سکواڈ کی ممکنہ ضرورت ’ہماری منصوبہ بندی کا ہمیشہ حصہ رہی ہے۔ جیسے ہی محفوظ گزرگاہ کو یقینی بنانا ممکن ہوا، ہم یہ کام کر دیں گے۔‘

6. 3 گھنٹے قبلاسرائیلی فوج کا بیروت میں ’حزب اللہ کے مراکز‘ پر متعدد حملوں کا دعویٰ

   اسرائیلی فوج نے جنوبی لبنان کے شہر بیروت میں حزب اللہ کے کمانڈ مراکز کو نشانہ بنانے کا دعویٰ کیا ہے۔

   اسرائیلی فوج کا کہنا ہے کہ جنوبی لبنان میں ’حزب اللہ کے انفرسٹرکچر‘ کو نشانہ بناتے ہوئے متعدد حملے کیے ہیں۔

   ٹیلیگرام پر جاری ایک تازہ بیان میں آئی ڈی ایف نے کہا کہ ااسرائیل کے خلاف حملوں کی منصوبہ بندی اور عمل درآمد کے لیے استعمال ہونے والے متعدد کمانڈ سینٹرز کو نشانہ بنایا ہے۔

7. 3 گھنٹے قبلعراق میں ایک فرانسیسی فوجی ہلاک اور متعدد زخمی: فرانسیسی صدر ایمانوئل میکرون کی تصدیق

   فرانسیسی صدر ایمانوئل میکرون نے عراق کے شہر اربیل میں ایک فرانسیسی فوجی مارے جانے کی تصدیق کی ہے۔

   فرانسیسی صدر میکرون نےسوشل نیٹ ورک ایکس پر ایک پوسٹ میں لکھا کہ ’مسلح افواج کا یہ رکن ایک حملے میں مارا گیا ہے جبکہ کئی دیگر فوجی زخمی بھی ہوئے۔‘

   کچھ دیر قبل فرانسیسی فوج نے اعلان کیا تھا کہ تربیتی کارروائی کے دوران اس کے متعدد فوجیوں کو ڈرون حملے میں نشانہ بنایا گیا ہے۔

   ایمانوئل میکرون نے سوشل میڈیا پر لکھا کہ ’میں ان کے خاندان اور ان کے ساتھیوں کے لیے پوری قوم کی جانب سے محبت اور یکجہتی کا اظہار کرنا چاہتا ہوں۔ ہمارے کئی فوجی زخمی ہوئے ہیں۔ فرانس ان کے ساتھ اور ان کے اہلِ خانہ کے ساتھ کھڑا ہے۔‘

   ایمانوئل میکرون نے خطے میں شدت پسندی کے خلاف لڑنے والی فرانسیسی فورسز پر ہونے والے حملوں کو ناقابلِ قبول قرار دیا۔

   ان کا کہنا تھا کہ عراق میں ان کی موجودگی دہشت گردی کے خلاف جنگ کے سخت فریم ورک کا حصہ ہے۔ ایران میں جنگ ایسے حملوں کا جواز نہیں بن سکتی۔‘

   ایران کے ساتھ امریکہ اسرائیل جنگ کے آغاز کے بعد مشرق وسطیٰ میں مارا جانے والا یہ پہلا فرانسیسی فوجی ہے۔

8. 4 گھنٹے قبلایران کے حمایت یافتہ عسکریت پسند گروہ کا عراق میں امریکی طیارہ مار گرانے کا دعویٰ

   ایران کے حمایت یافتہ ایک عسکریت پسند گروہ نے عراق میں امریکی فوجی طیارے پر حملے کی ذمہ داری قبول کی ہے۔

   خبر رساں ادارے روئٹرز کے مطابق عراق میں موجود ایک عسکریت پسند گروہ(جسے ایران کی حمایت حاصل ہے) نے امریکی فوجی ری فیولنگ طیارے پر حملے کی ذمہ داری قبول کرتے ہوئے کہا کہ اس نے امریکی فوجی طیارے کو ’عراق کی قومی خودمختاری اور فضائی حدود کے دفاع‘ میں نشانہ بنایا۔

   یاد رہے کہ امریکی سینٹرل کمانڈ (سینٹ کام) نے مغربی عراق میں امریکی فوج کے ایک KC-135 طیارے کے تباہ ہونے کی تصدیق کی تھی۔

   امریکی سینٹرل کمانڈ کا کہنا ہے کہ فوج کا ایک کے سی 135 ایندھن بردار جہاز دو طیاروں کے درمیان پیش آنے والے ایک واقعے کے بعد گِر کر تباہ ہو گیا ہے۔

   تاہم سینٹرل کمانڈ کا کہنا تھا کہ اس واقعے میں ’دوستانہ یا دشمن کے فائر کا کوئی عمل دخل نہیں‘ ہے۔

   سینٹ کام کی جانب سے طیارے کے حادثے کی تصدیق کے چند منٹ بعد ہی ایران کے اندر موجود خبر رساں اداروں نے بھی دعویٰ کیا کہ طیارے کو نشانہ بنایا گیا تھا۔

   امریکی سینٹرل کمانڈ کے مطابق اس واقعے میں شامل دوسرا طیارہ بحفاظت لینڈ کر گیا ہے۔

9. 4 گھنٹے قبلامریکہ نے ایران میں 6,000 اہداف کو نشانہ بنایا ہے: سینٹکام کی رپورٹ

   امریکی سینٹرل کمانڈ کی جانب سے جاری کیے گئے نئے اعداد و شمار کے مطابق ایران کے خلاف جاری آپریشن ایپک فیوری کے دوران امریکہ نے مجموعی طور پر 6,000 اہداف کو نشانہ بنایا ہے۔

   سینٹکام کے مطابق ان میں تقریباً 60 بحری جہاز اور 30 بارودی سرنگیں بچھانے والی کشتیوں کو نقصان پہنچایا گیا یا تباہ کر دیا گیا۔

   دیگر اہداف میں ایران کے کمانڈ سینٹرز، اسلحہ سازی کے مراکز، بیلسٹک میزائل سائٹس، آبدوزیں اور فضائی دفاعی نظام شامل تھے۔

   دوسری جانب امریکی میڈیا نے بعض فوجی تحقیق کاروں کا حوالہ دیتے ہوئے رپورٹ کیا ہے کہ امریکی۔اسرائیلی مشترکہ کارروائی کے آغاز میں فضائی حملوں کے دوران ایران میں ایک سکول کو غیر ارادی طور پر نشانہ بنایا گیا تاہم ابھی حتمی نتیجے پر نہیں پہنچا گیا۔

10. 5 گھنٹے قبلنریندر مودی کی ایرانی صدر سے بات چیت میں مکالمے اور سفارت کاری پر زور

    انڈیا کے وزیر اعظم نریندر مودی نے کہا ہے کہ انھوں نے علاقائی کشیدگی کے پیشِ نظر ایرانی صدر سے بات کی ہے جس میں انھوں نے مکالمے اور سفارت کاری پر زور دیا۔

    سماجی رابطے کی سائٹ ایکس پر کی گئی ایک پوسٹ میں انڈین وزیر اعظم کا کہنا تھا کہ ’ایرانی صدر ڈاکٹر مسعود پزشکیان کے ساتھ خطے کیسنگین صورتحال پر گفتگو کی۔ کشیدگی میں اضافے، شہری جانوں کے ضیاع اور شہری انفراسٹرکچر کو پہنچنے والے نقصان پر گہری تشویش کا اظہار کیا۔‘

    انھوں نے مزید کہا کہ ’انڈین شہریوں کی حفاظت اور سلامتی، ساتھ ہی اشیا اور توانائی کی بلا رکاوٹ ترسیل کو یقینی بنانا، انڈیا کی اولین ترجیحات میں شامل ہیں۔‘

    انھوں نے کہا کہ ’انڈیا نے امن و استحکام کے عزم کو دہرایا۔‘

11. 5 گھنٹے قبلگذشتہ روز کی اہم خبروں کا خلاصہ:

    • جنیوا میں اقوامِ متحدہ کے لیے ایران کے سفیر نے بی بی سی کو دیے گئے ایک انٹرویو میں ہے کہ ملک کے نئے رہبرِ اعلیٰ مجتبیٰ خامنہ ای محفوظ ہیں اور اس وقت ملک کا انتظام چلا رہے ہیں۔
    • متحدہ عرب امارات کی وزیرِ مملکت لانا نسیبہ نے خطے کے ممالک پر ایران کے ’ گھناؤنے، غیرقانونی اور بلا اشتعال حملوں‘ کی مذمت کی ہے۔ انھوں نے کہا متحدہ عرب امارات کو اپنے دفاع کا حق حاصل ہے، تاہم امریکہ کو ایران پر حملہ کرنے کے لیے متحدہ عرب امارات کی فضائی حدود یا علاقے کا استعمال کرنے کی اجازت نہیں دی جائے گی۔
    • پاکستان کے وزیرِ اعظم شہباز شریف نے جدہ میں سعودی عرب کے ولی عہد سے ملاقات کی ہے۔ سرکاری بیان کے مطابق شہباز شریف نے محمد بن سلمان کو یقین دلایا کہ پاکستان ہمیشہ سعودی عرب کے ساتھ مضبوطی سے کھڑا رہے گا اور خطے میں امن کے مشترکہ حصول کے لیے ہر ممکن کوشش جاری رکھے گا۔
    • اسرائیل کی وزارتِ خارجہ کا کہنا ہے کہ ایرانی میزائل حملوں کے پیشِ نظر یروشلم کے مقدس مقامات پر عبادات ’عارضی طور پر معطل‘ کر دی گئی ہیں۔
    • امریکی سینٹرل کمانڈ کا کہنا ہے کہ فوج کا ایک کے سی 135 ایندھن بردار جہاز دو طیاروں کے درمیان پیش آنے والے ایک واقعے کے بعد گِر کر تباہ ہو گیا ہے۔ تاہم سینٹرل کمانڈ کا کہنا ہے کہ اس واقعے میں ’دوستانہ یا دشمن کے فائر کا کوئی عمل دخل نہیں‘ ہے۔
    • ایرانی نائب وزیرِ خارجہ ماجد تخت روانچی نے ایران کی طرف سے آبنائے ہرمز میں بارودی سرنگیں بچھانے کی تردید کی ہے۔ اس سے قبل امریکہ نے دعویٰ کیا تھا کہ اس نے کچھ ایرانی کشتیوں کو نشانہ بنایا ہے جو اس مقصد کے لیے وہاں موجود تھیں۔

12. 5 گھنٹے قبل

    بی بی سی اردو کے لائیو پیج پر خوش آمدید

    گذشتہروز 12 مارچ تک کی خبروں کے لیے یہاں کلک کریں