میرے سامنے بکھرے ہوئے بالوں کے اوپر سر پر لمبی کالی ٹوپی پہنے ایک چڑیل بیٹھی ہے۔ اس کی جھریوں والے ہاتھوں کے ناخن لمبے لمبے سے ہیں۔ چہرہ سرخ اور دانت نوکیلے نظر آ رہے ہیں۔ میں اسے دیکھتے ہوئے اپنی بے اختیار مسکراہٹ نہیں روک پا رہا۔ بلآخر چڑیل بھی مسکرا پڑتی ہے اور کہتی ہے: ’ہیپی ہیلوئین!‘ دنیا کو ڈرانے دھمکانے والے اس امریکہ کے لوگ آج ایک دوسرے کو خوفزدہ کرنے میں لگے ہوئے ہیں۔ اکتیس اکتوبر کو رات گئے تک امریکہ میں بچے ہوں یا نوجوان لڑکے لڑکیاں دلچسپ و عجیب روپ دھارکر گلیوں میں نکل آتے ہیں۔ میں ’راک اینڈ رول‘ موسیقی کے بےتاج بادشاہ ایلوس پریسلی کے شہر ٹینیسی پہنچا ہوں۔ میرے ہوٹل کے قریب ہی یہاں موسیقاروں کی مشہور ’بییل اسٹریٹ‘ پر ہیلوئین پارٹی جاری ہے۔ کوئی ڈریکولا بنا ہوا ہے تو کسی نے سپر مین کا لباس پہنا ہوا ہے۔ کسی نے شیطان کا روپ دھارا ہوا ہے تو کوئی یسوع مسیح بنا پھر رہا ہے۔ یہاں مجھے جارج بش بھی نظر آیا۔ نہیں نظر آیا تو بس اسامہ بن لادن!
سید سجاد حسنین، حیدرآباد، انڈیا
شکر ہے چڑیل کو دیکھ کر آپ کی ہنسی چھوٹ گئی۔ ویسے شاہ زیب صاحب یہ بات دعوت فکر دیتی ہے کہ دنیا کو ڈرانے اور دھمکانے والے امریکہ کے لوگ اپنے آپ کو یا ایک دوسرے کو ڈرانے کا دن بھی مناتے ہیں مگر اس کے لیے ’ہیپی‘ والی بات سمجھ سے باہر ہے۔ کیا یہ آپ کو عجیب نہیں لگتا۔ اسد، پاکستان
اس سے تو صاف ظاہر ہے کہ امریکی لوگ اپنے آپ سے ڈرتے ہیں اور اپنے لیڈروں سے ڈرتے ہیں۔ ابراہیم، کوئٹہ
اسامہ صرف ایک کردار ہیں۔ وہ امریکہ کی فلم ’وار آن ٹیرور‘ کے ولن ہیں۔ یا پھر میرا خیال ہے کہ اسامہ کے پاس خطرے میں غائب ہونے کا جادو ہے۔ شاہدہ اکرم، ابو ظہبی
شاہ زیب صاحب کوئی کچھ بھی کہے سچ تو وہی ہے جو دکھتا ہے۔ جیسے ہیلوئین کے موقع پر اگر چڑیل کا روپ دھارے ہوئے کو آپ بادشاہ کہہ دیں تو کوئی نہیں مانے گا۔ اس طرح دنیا کے سامنے آنے والا جو روپ جس نے دھارا ہے وہی سب کو نظر بھی آئے گا۔ | 
آپ کی آواز:پہلا صفحہ
