کاشف نعیم سید طالب علم، کِنگس کالج، لندن

کاشف نعیم سید ڈیسمنڈ ٹوٹو کے ساتھ

مگر جب انہوں نے مسکراتے ہوئے یہ کہہ کر تعارف کروایا کہ ’’میرا نام ڈیسمنڈ ٹوٹو ہے اور مجھے چیپل آفس تک لے چلوگے‘‘ تو سارا ابہام خوشی میں بدل گیا۔ لپک کر ان کا بیگ میں نے ہاتھ سے لے لیا اور زندگی کے ان لمحات کو بقول داناؤں کے، یوں گراں قدر جانا کہ ’عالم کی صحبت کے چند لمحات جاہل کی عمر بھر کی قربت سے بہتر ہیں۔‘

یہ میری نوبل امن انعام یافتہ رومن کیتھولک فرقے کے معزز اور محترم پادری ڈیسمنڈ ٹوٹو سے پہلی ملاقات تھی جو جتنی اچانک اور اتفاقیہ تھی اتنی ہی تجسس آمیز بھی کیونکہ نہ صرف کالج بلکہ پورے شہر میں ان کی آمد کا بےچینی سے انتظار ہورہا تھا۔ اس کے بعد فادر ٹوٹو سے کئی ملاقاتیں ہوئیں اور کئی بار ان کے سننے کا موقع ملا۔ گو کہ کالج میں سیرحاصل مزہ کروں، مباحثوں اور تقاریر کا سلسلہ جاری و ساری رہتا ہے مگر جو مزہ فادر ٹوٹو کی تقاریر سننے میں آیا وہ شاید کسی اور میں نہیں تھا۔ اس کی ایک بڑی وجہ یہ تھی کہ وہ بناوٹ سے عاری، سیدھے سادھے انداز میں اپنی بات بیان کرتے ہیں اور اپنے اچھوتے طنزومزاح سے جہاں محفل گرمائے رکھتے ہیں وہاں موضوع کا تسلسل بھی نہیں ٹوٹنے دیتے۔

مگر سب سے اہم چیز جو میں نے ان کی شخصیت میں نمایاں دیکھی وہ سچائی سے کبھی نہ چھوٹنے والا ساتھ ہے۔ کیپ ٹاؤن کے ایک پسماندہ علاقے میں پلنے بڑھنے والے اس گمنام سیاہ فام نوجوان کی شب و روز کی انتھک جدوجہد کا اندازہ تو نہیں لگایا جاسکتا مگر کردار کی پختگی اور نِڈرپن جو ان کی شخصیت کا حصہ ہے وہ آج کل کے بڑے لیڈروں اور جرنیلوں میں بھی نظر نہیں آتا۔ یہی وجہ ہے کہ جب کبھی بھی انہیں موقع ملتا ہے وہ ظلم اور تشدد کی، بغیر کسی لاگ لپٹ کے، پرزور مزمت کرتے ہیں جو چاہے حکومتِ وقت کے خلاف ہو یا سب سے طاقتور ملک کے صدر کے خلاف۔ بچپن میں علامہ اقبال کا ایک شعر پڑھا کرتے تھے کہ: اڑالی ہے قمریوں نے۔۔۔

افسوس کہ یہ جذبہ آج کسی مسلمان لیڈر میں موجود نہیں رہا۔ اور ایک زندہ قوم ہونے کے باوجود صداقت اور شجاعت کا وہ سبق بھلائے بیٹھے ہیں جو ہمارے بزرگوں کی میراث تھی۔ فادر ٹوٹو نے ہر بار خوف خدا اور سچائی کے ساتھ اپنے مقصد میں سچی لگن سے جٹ جانے پر زور دیا ہے۔ اے کاش کہ ہم سب اس پر عمل پیرا ہوسکتے!

فادر ٹوٹو سے بہت کچھ سیکھنے کا موقع ملا۔ رخصت ہونے سے پہلے ایک شام ان سے مل بیٹھنے کا ’چائے کا بہانہ‘ میرے لئے ایک سعادت سے کم نہ تھا۔ میرے بھائی نبیل سے بہت شفقت سے ملے اور گلے لگاکر پیار کیا اور کبھی ہمت نہ ہارنے اور امید کا دامن نہ چھوڑنے کی نصیحت کی۔ نبیل نے انہیں پاکستان آنے کی دعوت دی جسے انہوں نے قہقہ لگاکر قبول کرلیا۔ افسوس کے ہماری قوم کو ایسے لوگوں کے بارے میں سوچنے کا بھی وقت میسر نہیں۔

(نوٹ: اگر آپ بھی کسی بڑی شخصیت سے متاثر ہوئے ہیں تو ہمیں لکھئے۔ آپ کی زبان ٹوٹی پھوٹی بھی ہو تو ہم شائع ضرور کریں گے۔ بی بی سی اردو ڈاٹ کام پر ’آپ کی آواز‘ کا صفحہ آپ کے لئے ہی ہے۔)