اکرم اللہ جان کوکی خیل خیبر ہاؤس جیل (دفتر پولیٹکل ایجنٹ خیبر) پشاور

اکرم اللہ جان کوکی خیل خیبر ہاؤس جیل پشاور سے

مجھے جیل میں تیسرا مہینہ ہونے کو ہے۔ گزشتہ سال چھبیس دسمبر کو میں لنڈی کوتل ڈگری کالج کے چند طلباء سے ملاقات کرنے جمرود جیل چلا گیا تھا جنھیں انتظامیہ نے گرڈ اسٹیشن پر مبینہ حملے کے الزام میں گرفتار کیا ہوا تھا۔ گرفتار ہونے والوں میں میری تنظیم کے کچھ کارکن بھی شامل تھے۔ میں نے جیل جاکر لائن آفیسر سے درخواست کی کہ ہم گرفتار شدہ طلباءسے ملنا چاہتے ہیں۔ انہوں نے کہا کہ پولٹیکل ایجنٹ نے طلباء سے ملاقات پر پابندی لگائی ہے۔ بعد میں علاقہ تحصیلدار نے مجھے بھی جیل کے احاطے سے گرفتار کرکے پابندِ سلاسل کردیا۔ مجھ پر الزام لگایا گیا کہ میں نے طلباء کو مشتعل کرنے اور ان کو جیل سے بھگوانے کی کوشش کی۔ اگر میں واقعی جیل توڑ سکتا تھا تو اب تک تو میں خود جیل سے نہیں بھاگ چکا ہوتا ؟

کیا میں جیل توڑ سکتا تھا؟  میں نے جیل جاکر لائن آفیسر سے درخواست کی کہ ہم گرفتار شدہ طلباءسے ملنا چاہتے ہیں۔ انہوں نے کہا کہ پولٹیکل ایجنٹ نے طلباء سے ملاقات پر پابندی لگائی ہے۔ بعد میں علاقہ تحصیلدار نے مجھے بھی جیل کے احاطے سے گرفتار کرکے پابندِ سلاسل کردیا۔ مجھ پر الزام لگایا گیا کہ میں نے طلباء کو مشتعل کرنے اور ان کو جیل سے بھگوانے کی کوشش کی۔

گرفتاری کے دو گھنٹے بعد مجھے جمرود جیل سے باڑہ منتقل کیاگیا اور وھاں پر کچھ دن رہنے کے بعد مجھے خیبر ہاؤس جیل منتقل کردیا گیا جہاں پر پو لیٹکل ایجنٹ خیبر کا دفتر بھی ہے۔ خیبر ہاؤس میں دو بیرک ہیں ایک چھوٹا اور دوسرا بڑا۔ بڑے بیرک میں تقریباً بیس کے قریب قیدی رہ سکتے ہیں جبکہ دوسرے بیرک میں تین سے چار قیدیوں کے رہنے کی گنجائش ہے۔ پہلے میں بڑے بیرک میں تھا لیکن اب چھوٹے میں آگیا ہوں۔

دونوں بیرکوں میں اکثر اوقات گنجا ئش سے زیادہ قیدی ہوتے ہیں۔ بڑے بیرک ہے کےساتھ ایک ملحقہ باتھ روم بھی ہے جبکہ دوسرے بیرک میں کوئی باتھ روم نہیں۔ قیدیوں کو رفع حاجت کے لیے بڑے بیرک میں جانا پڑتا ہے جو ایک بڑا مسئلہ ہے۔ اگر کسی قیدی کے پیٹ میں تکلیف ہو یا وہ رفع حاجت کےلیے باتھ روم جانا چا ہتا ہے تو پہلے وہ سنتری کو بلائے گا جو آکر تالا کھولے گا، پھر دوسرے بیرک کا دروازہ کھلے گا اور یہ سب کچھ پولیس والوں کی موجودگی میں ہوتا ہے۔

کھانے میں دونوں وقت ایک چھوٹی سی روٹی دی جاتی ہے اور اس کے ساتھ تھوڑا سا آدھا کچا اور آدھا پکا دال چنا، لوبیا، آلو یا کبھی کبھی دال ماش دی جاتی ہے۔ تمام قیدی دن رات ان بیرکوں میں بند رہتے ہیں۔ ان کے دروازے مضبوط لوہے کی سلاخوں سے بنے ہوئے ہیں جہاں سے قیدی باہر جھانک سکتے ہیں اور ملاقاتیوں سے ملاقات بھی کرسکتے ہیں۔ رات کے وقت ان دروازوں سے ٹھنڈے ہوا کے جھونکے آتے ہیں جس کی وجہ سے بے چارے قیدی ٹھٹھر کر رہ جاتے ہیں۔

جب تیز بارش لگی ہو تو چھت سے پانی ٹپکتا ہے اور بیرک کے بڑے ڈسٹ بن سے جونزدیک ہے، بدبو بھی آتی ہے۔ یہاں اندر سردی سے بچاؤ کا کوئی انتظام نہیں۔ جیل انتظامیہ کی طرف سے بستر وغیرہ فراہم نہیں کیا جاتا اور کوئی طبی سہولت بھی موجود نہیں۔ اگر کوئی قیدی بیمار ہوجاتا ہے تو باربار رونے پیٹنے اور درخواستوں کے بعد جیل انتظامیہ انہیں اس شرط پر ہسپتال لےجاتی ہےکہ وہ اپنے پیسوں سے علاج کرائے گا۔ ہاں اگر آپ کے پاس پیسے زیادہ ہیں اور آپ خاصہ داروں اور لائن افسر کو خوش رکھ سکتے ہیں تو آپ کو علاج کے علاوہ صدر کے چکر لگانے اور سیر وتفریح کا موقع بھی فراہم کیا جاسکتا ہے۔

ہمارے ساتھ والی بیرک میں صادق خان نامی قیدی ہے جس کی عمر اسی سال ہے۔ وہ دمّے کا مریض ہے اور اسے اکثر سانس کا مسئلہ ہوجاتا ہے لیکن بے چارہ غریب بھی ہے۔ اگر اس کا علاج نہیں کرایا گیاتو وہ جیل کے اندر مر جائے گا۔ اس کے ساتھ ایک اورجوان قیدی بائیس سالہ امیرزیب قوم قمبر خیل رہتا ہے۔ اسے گردوں کا مسئلہ ہے اور پیشاب میں خون آتاہے۔ امیرزیب اکثر اوقات تکلیف کی شدت کے باعث روتا رہتا ہے۔ بائیس سالہ ایک اور نوجوان انورخان کے گردوں میں پتھر ہے۔ اس کو جب تکلیف ہوتی ہے تو سارے جیل کو سر پر اٹھا لیتاہے لیکن یہاں سننے والا کون ہے؟

کالا قانون  زیادہ قیدی چالیس ایف سی آر کے قوانین کے تحت پابند سلاسل ہیں- یہ ایک ایسا کالا قانون ہے جو انگریزوں نے ایک صدی قبل قبائلی علاقہ جات میں رائج کیا تھا۔ اس قانون کو کسی عدالت میں چیلنج بھی نہیں کیا جاسکتا۔

میرا تعلق ایک سیاسی خاندان سے ہے۔ میرے دادا مرحوم ملک ولی خان کوکی خیل کوکی خیل قبیلے کے سربراہ تھے اور انیس سو باسٹھ میں قومی اسمبلی کے رکن رہ چکے ہیں۔ وہ میرے والد صاحب اسلام آباد میں ایک اہم سول سرکاری عہدے پر فائزہیں۔ میرے تین بچے مجھے اکثر اوقات یاد آتے ہیں۔ دوسال پہلے بھی میں اسی قسم کے الزامات میں گرفتار ہوا تھا۔ جب میں جیل سے رہا ہوا تو میں نے کئی ایسے قیدیوں کو رہائی دلانے میں اہم کردار ادا کیا جو سو فیصد بے گناہ تھے۔ ان میں ایک سندھی بھی تھا جو پانچ سال تک بغیر کسی جرم کے بند رہا۔

اس دفعہ بھی میرا مصمم اردہ ہے کہ رہا ہوتے ہی بیرک کے جو کئی بے گناہ قیدی ہیں، ان کی رہائی کے لیے انشاءاللہ ہر ممکن کوشش کروں گا۔