آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
شادی خفیہ رکھنے کے الزام میں مِس بنگلہ دیش کا تاج واپس
بنگلہ دیش کی ملکہ حسن انتل نعیم ایورل سے مس ورلڈ بنگلہ دیش کا تاج واپس لے لیا گیا ہے۔
انتل نعیم پر الزام ہے کہ انھوں نے اپنی شادی کو خفیہ رکھا تھا۔
تاج واپس لینے کا فیصلے کا اعلان ڈھاکہ میں کیا گیا۔
معلومات کو چھپانے کے الزام پر انتل نعیم نے بی بی سی کی بنگالی سروس کو بتایا کہ 'اس فیصلے سے اُن کی شکست نہیں ہوئی بلکہ یہ بنگلہ دیش کے قوانین کی شکست ہے۔'
شادی کے بارے میں پوچھے گئے سوال پر انتل نعیم نے کہا کہ 'اگر ایک 16 سالہ لڑکی کو شادی کے لیے مجبور کیا جائے تو اسے شادی نہیں کہا جا سکتا۔ اگر کسی کی ایس ایس سی (دسویں جماعت) کا امتحان ختم ہونے کے ایک ماہ کے اندر شادی کر دی جاتی ہے تو اُس کی عمر ہی کیا ہوتی ہے؟'
انھوں نے بتایا کہ وہ اپنی عمر کے بارے میں دستاویزی ثبوت پیش کر سکتی ہیں۔
بنگلہ دیش کے مقامی ذرائع ابلاغ کے مطابق انتل کی شادی مارچ 2013 میں ہوئی تھی لیکن یہ شادی دو ماہ جاری رہنے کے بعد ختم ہو گئی تھی۔
منتظمین کا کہنا ہے کہ ’مس ورلڈ بنگلہ دیش میں کسی ایسی خاتون کو نمائندگی کا موقع نہیں دیا جاسکتا جس نے غلط معلومات فراہم کی ہیں۔'
End of سب سے زیادہ پڑھی جانے والی
مس ورلڈ مقابلے کے قواعد کے تحت صرف غیر شادی شدہ افراد اس میں شامل ہو سکتے ہیں۔
یاد رہے کہ پانچ روز قبل 27 سالہ انتل نعیم نے 'مس ورلڈ بنگلہ دیش' مقابلے کے فائنل راؤنڈ میں کامیاب ہو کر یہ ٹائٹل اپنے نام کیا تھا۔
انتل نعیم سے ٹائٹل واپس لیے جانے کے بعد رنر اپ جیسن اسلام کو 'مس ورلڈ بنگلہ دیش' کا ٹائٹل دیا گیا ہے۔
