ኣብ እዋን ኲናት መቅደላ ብእንግሊዛውያን ዝተዘምቱ ቅርሲታት ብጨረታ ከይሽየጡ ተገይሩ

ኣብ እንግሊዝ፡ ንሎሚ ብኣቆጻጽራ ግእዝ 10 ሰነ 2013 ዓ/ም ብጨረታ ክሽየጡ ተባሂሎም ዝነበሩ ካብ መቕደላ ዝተዘረፉ ክልተ ቅርሲታት መሸጠኦም ደው ክብል ከምዝተገበረ ተገሊጹ፡፡

ነቲ ጨረታ ዘውጸአ ኣብ ብሪጣንያ ዝርከብ 'በስቢ ኦክሽነርስን ቫሉወርስን' ዝተባህለ ኣጫራቲ ትካል እንትኾን፡ ኣብ ለንደን ዝርከብ ኤምባሲ ኢትዮጵያ ምስ ሓለፍቲ እቲ ትካል ብዝገበሮ ዘተ እዩ እቲ ጨረታ ክቋረጽ ተገይሩ ዘሎ፡፡

ኤምባሲ ኢትዮጵያ ኣብ ዘውጸኦ መግለጺ፡ እቶም ብጨረታ ክሽየጡ ቀሪቦም ዝነበሩ ቅርሲታት፡ ጥንታዊ መጽሓፍ ቅዱስ ምስ ማህደሩ፣ መስቀልን ጽዋእን ከምዝኾኑ ሓቢሩ፡፡

እዞም ጥንታውያን ቅርሲታት ካብቶም ኣብ ኲናት መቕደላ ወፊሮም ዝነበሩ ወታሃደራት እንግሊዝ ሓደ ብዝነበረ ጀነራል ዊልያም ኣርቡትኖት ዝተወሰዱ እዮም፡፡

ካብ መቕደላ ዝተዘረፉ ቅርሲታት ንምምላስ ይካየድ ምስዘሎ ጻዕሪ ብዝተሓሓዝ፡ ኣብ ዝሓለፈ ሰሙን ኤምባሲ ኢትዮጵያ እቶም ቅርሲታት ካብቲ ጨረታ ክወጹ ናብቲ በስቢ ዝተባህለ ትካል ደብዳበ ጽሒፉ ነይሩ፡፡

ካብዚ ብተወሳኺ: እቶም ቅርሲታት ናብ ኢትዮጵያ ኣብ ዝምለሱሉ ኩነታት እውን እቲ ትካል ክተሓባበር ተሓቲቱ ኣሎ፡፡

ምክትል ኤምባሲ ኢትዮጵያ ኣቶ በየነ ገብረመስቀል ብወገኑ ‘‘ምስ በስቢ ኣብ ስምምዕ ምብጻሕና ሕጉሳት ኢና፡፡ እዞም ቅርሲታት ንኢትዮጵያውያን ዓብዪ ባህላዊ፣ መንፈሳውን ታሪኻውን ትርጉም ኣለዎም፡፡ እቶም ሕዚ ዘለዉ ይኹኑ እቶም ዝመጹ ኢትዮጵያውያን ታሪኾም ክዕቅቡ ይደልዩ እዮም፡፡ ስለዚ እዞም ፍሉያት ቅርሲታት ናብ ሃገርና ዝምለሱሉ እዋን ብታሕጓስ ኢና ንጽበዮ’’ ኢሉ፡፡

እቶም ቅርሲታት ናብ ኢትዮጵያ ብዛዕባ ዝመለሱሉ ኩነታት እውን ምስ በስቢ ይዘራረብ ከምዘሎ እቲ ኤምባሲ ኣፍሊጡ፡፡

ሰራዊት እንግሊዝ ነቶም ሓድጊታት ናብ እንግሊዝ ንምጉዕዓዝ 15 ሓራምዝን 200 ኣባቕልን ከምዝተጠቐመ መረዳእታታት የመልክቱ፡፡

ኣብ 2008 ዓ/ም፡ ኢትዮጵያ ዝተዘረፉን ሚልዮናት ዶላራት ዘውጽኡን ቅርሲታታ ክምለሱላ ንዝተፈላለዩ ትካላት ቅርሲ ሓቲታ ነይራ፡፡

መቅደላ 1868