ቦላ ሞሱሮ፡ ንፎከስ ኣብ 1992 እያ ተጸምቢራ፤ ኣብዚ እዋን ሓንቲ ካብቶም ቀንዲ ኣቕረብቲ መደብ እያ። "ደጊም ሓንቲ ቃለመሕትት ናይ ምግባር ዕድል እንተዝረክብ፡ ንፌላ ኩቲ ምገበርኩሉ። ንሱ ኣብ 90ታት ኣብ ብሪጣንያ ዑደት ኣብ ዝገብረሉ ዝነበረ፡ ድሕሪ ናይ በርሚንግሃም ሙዚቃዊ ምርኢት ከዘራርበና ምዃኑ ነጊሩና። ኣዝየ'የ ዘድንቖ ነይረ። ከምቲ ልሙድ የትክኽ ስለዝነበረ ኣብ ካልእ ዓለም እዩ ነይሩ። ኣብ ውሽጠይ ዝነበረት ንእሽቶ ተሓላቒት መሰላት ደቂ ኣንስትዮ፡ ነቲ ዝጥቀመሎም ዝነበረ ቃላት ንምእራም ትፍትን ነይራ። በዚ ድማ ብዙሕ ከየዕለልና ተፈላሊና። ግዜ ንድሕሪት ዝምለስ እንተዝኸውን ከም "ሻፈሪንግን ሽማይሊንግን" ዝኣመሰሉ ቃላት ክሰምዕ ምበሃግኩ።

ኣውድሪ ብራውን ደቡብ ኣፍሪቃዊት ኮይና፡ ዓኼላዊትን ሕውስትን እየ። ንሳ ካብ 2005 ጀሚራ ፎከስ ከምኡውን ዘ ኮንቨርዜሽን ተቕርብ። "ምስ ሓንቲ ንመሰላት ዘይተመርዓዋን ዘይወለዳን ደቂኣንስትዮ እትጣበቕ ኡጋንዳዊት ቃለመሕትት ገይረ ነይረ። ኣብ ዝነበረኒ ሓጺር ምድላው፡ ተዋዛዪት ምዃናን ከምዚ ዝስዕብ መእተዊ ክጽሕፍን ጌራትኒ። "ሰብኣይ ዘይብለን ደቂ ኣንስትዮ ምስ ሰብኡት እተራኽብ ጓልኣንስተይቲ ምሳይ ኣላ።" ብቐጥታ ኣብ ፈነወ ተኣሪመላ።

ኒሻ ላድሃ ንብዙሕ ዓመታት ኣብ ቢቢሲ ዎርልድ 'ስፖርትስዎርለድ' ከተቕርብ ድሕሪ ምጽናሕ፡ ኣብዚ እዋን ስፖርት ኦፍ ፎከስ ተቕርብ። ከም ኣፍቃሪት ስፖርት ከዋኽብቲ ኣፍሪቃውያን ስፖርተኛታት ዝተጓዓዝዎ ናይ ዓወት ጎደና ምስማዕ ባህታ ይፈጥረላ። ኣዝያ ትፈትዎ ቃለመጠይቕ፡ ኣብ ቀረባ እዋን ምስታ ክልተ ግዜ ተዓዋቲት ትሪፕል-ጃምፕ ዝኸነት ካሜሩናዊት ፍራንስዋ ምባንጎ ዝገበረቶ እዩ። "ከም ኣደ ካብ ወሊድ ተመሊሳ ናይ 2008 ናይ ቤይጂን ኦሎምፒክ ተዓዋቲት ክትኸውን ምኽኣላ ዘደንቕ እዩ።"

ኣብ ፎከስ ድምጺ ፖል ባቺቢንጋ ካብ 2004 ጀሚሩ ኣብ መላእ ኣፍሪቃ ፍሉጥ እዩ። ንሱ ኣብ ሰሙን ዝተወሰነ መዓልትታት ንዝፍኖ መደባት ናይ ምርታዕ ሓላፍነት'ውን ኣለዎ። "ሓደ ካብቶም ኣዝየ ዝዝክሮም ቃለ መሕትት፡ ኬቺ ኦክዉቺ ምስ ዝተባህለት ሓንቲ ካብቶም ክልተ ኣብ ሓደጋ ነፋሪት ናይጀርያ 2005 ብህይወት ዝተረፈት ጓል ኣንስተይቲ እዩ። ብዙሕ መቑሰልቲ ነይሩዋ፡ ብህይወት ናይ ምጽናሕ ዕድላ ትሑት ምዃኑ ተነጊርዋ ነይሩ። ግና ሰጊራቶስ ደራፊትን ንብዙሓት እተተባብዕን ክትኸውን በቒዓ።"

ዴቪድ ኣማኖር ካብ 2012 ጀሚሩ ኣብ ዝተፈላለዩ ግዝያት ኣብ ፎከስ ከም ኣቕራቢ ሰሪሑ እዩ። "ከም ዝመስለኒ ናተይ ብሉጽ ቃለ መሕትት እቶም ምስ ተራ ሰባት ዝገብሮም እዮም። ንኣብነት ኣብ ምርጫ ማላዊ 2019፡ ምስታ ንርእሳ ዋይን ሩኒ ኢላ እትጽውዕ ተጻዋቲት ኩዕሶ እግሪ፤ ኣብ ምርጫ ኣይቮሪ ኮስት 2015 ዘዘራረብክዋ ሸቃጢት፤ ኣብ ኬንያ ኣብ ኣውቶቡስ፤ ከምኡ'ውን ሓደ ካብቶም ኣዝየ ዝፈትዎም ኣብ ዋንጫ ኣፍሪቃ 2008 ኣብ ጋና ሰባት ንወደብ ታኮራዲ ክሰግሩ ከለው ዘዘራረብክዎም ኩነት እዩ።"

ሓሰን ኣሩኒ ካብ 1990ታት ጀሚሩ ንፎከስ ኦን ኣፍሪካ ኣቕሪቡ። "ኣብ ዝሓለፈ ዓመት ምስ ናይጀርያዊ ደራፋይ ዲ'ባንጅ ቃለ መሕትት ጌረ። ኣብ መወዳእታ ክልቴና ከይተረድኣና ኣብቲ ደርፊ ጥሒልና። እዚ ነቲ ዘሎኒ፡ ናብ ልቢ እቲ ተሓታቲ ናይ ምእታው፡ ምውቕ ናይ ቃለ መሕትት ቅዲ ዝገልጽ ይመስለኒ።"