ఆన్‌లైన్ పోర్న్ వల్ల మహిళలపై
హింస పెరుగుతోందా?

బీహార్‌లోని జహనాబాద్‌లో తీసిన ఓ వీడియో వైరల్ అయింది. నిందితులైన టీనేజర్లను పోలీసులు అరెస్టు చేశారు. దాంతో ఆ అబ్బాయిల గ్రామంలో ఆందోళన వ్యక్తమైంది. ఊరి పెద్దలంతా ఇంటర్నెట్ వల్లే ఇలా జరుగుతోందని నిందించారు.

సుజోయ్ ప్రసాద్‌కి అక్కడ కిరాణా దుకాణం ఉంది. బాలికపై జరిగిన అత్యాచారం వీడియో తనకూ చేరిందని ఆయన చెప్పారు. రెండేళ్ళ కిందట స్మార్ట్‌ఫోన్లు తమ గ్రామంలోకి వచ్చాయని, అప్పుడు చాలామంది యువకులకు వాటినెలా ఉపయోగించాలో కూడా తెలిసేది కాదన్నారు.

‘మా అబ్బాయి ప్రవేశ పరీక్షల తేదీలు చూసుకోవడానికి ఫోన్ వాడేవాడు. కానీ, ఇక్కడ 90 శాతం మంది యువకులు అన్ని రకాల వీడియోలు చూడడానికి ఫోన్లు వాడుతున్నారు’ అని ఆయన వివరించారు.

భారత్‌లో వాట్సాప్‌ను 25 కోట్ల మందికి పైగా వాడుతున్నారు. ప్రపంచంలో ఈ యాప్‌కి అతి పెద్ద మార్కెట్ ఈ దేశమే.

ఏకాంతంగా పోర్న్ చూడడం భారత్‌లో చట్టబద్ధమే. కానీ, ఆ వీడియోలను రూపొందించడం, షేర్ చేయడం (ఇతరులకు పంపడం) చట్ట విరుద్ధం.

ఇంటర్నెట్, సోషల్ మీడియా వాడకం పెరగకముందు చిన్నచిన్న దుకాణాల్లో గుట్టుగా దొరికే రేప్ వీడియోలు, పోర్న్ వీడియోలను జనం చూసేవారు.

అయితే, చాలామంది దుకాణదార్లు ఇప్పుడా వ్యాపారం లేదని చెబుతున్నారు. దగ్గర్లోని పట్టణంలో నేను మాట్లాడిన కొంతమంది 15, 16 ఏళ్ళ అబ్బాయిలు కూడా దీనిని నిర్థారించారు.

ఓ కోచింగ్ సెంటర్ దగ్గర ఈ అబ్బాయిలను కలిశాను. వారిలో చాలామంది అమ్మాయిలను అవమానించే వీడియోలను, అత్యాచార వీడియోలను తరచుగా చూస్తామని చెప్పారు.

పదకొండో తరగతి చదువుతున్న ఒకబ్బాయి తాను 25- 30 వీడియోలు చూశానని, ఇలాంటి క్లిప్పింగులు వచ్చినపుడు అందరూ షేర్ చేసుకుంటామని చెప్పాడు.

“మా క్లాసులో పిల్లలు చాలామంది ఈ వీడియోలు కలిసి చూస్తారు. ఒకోసారి ఒంటరిగా చూస్తారు. అందరూ చూస్తారు. కాబట్టి తప్పు అనిపించదు” అని మరో అబ్బాయి చెప్పాడు.

అలాంటి అనేక వీడియోల్లో జహనాబాద్ వీడియో ఒకటి. ఈ ధోరణి అందోళన కలిగిస్తోందని బీహార్ ఎంపీ రంజీత్ రంజన్ అన్నారు.

రాష్ట్రం నుంచి ప్రాతినిధ్యం వహిస్తున్న ముగ్గురు మహిళా ఎంపీల్లో ఆమె ఒకరు.

ఈ వీడియోలు ఆమె ఫోన్‌కూ వచ్చాయి. ఒకటి కాదు, ఆరేడు వచ్చాయి. ‘‘ఇలాంటి వీడియోలు తీయడానికి కొందరు పోటీపడుతున్నారు. అమ్మాయిల పట్ల గౌరవం, మర్యాద ఉన్నవాళ్లెవరూ అలాంటి పనులు చేయరు. మహిళలను గౌరవించేవాళ్లు ఆ వీడియోలు కనిపించగానే పోలీసులకు ఫిర్యాదు చేస్తారు’’ అని ఆమె అన్నారు.

పుణెకు చెందిన ఫ్యాషన్ రచయిత, డిజైనర్ యాండీ బర్వే తనకు సెక్స్ గురించి మొదటిసారి పోర్న్ ద్వారానే అవగాహన కలిగిందని అన్నారు. తర్వాత పోర్న్ చూడడం వ్యసనంగా మారింది.

ఆయనెంతగా ప్రభావితుడయ్యాడంటే నిజజీవితంలో కూడా పోర్న్ స్టార్ లా ప్రవర్తించేందుకు ప్రయత్నించేవాడు.

యాండీ నాకిలా చెప్పాడు, ‘‘మన శరీరాలు ఆ చిత్రాల్లో చూపించే లాంటివికాదు, అలా పనిచేయలేవు కూడా, కాని ఆ విషయం అర్థమయ్యే లోపు నా శరీరానికి హానిచేసే ఎన్నో భంగిమలు నేను ప్రయత్నించి చూశాను.’’

యాండీ అనారోగ్యం పాలయ్యాడు. హెపటైటిస్ ఎ కూడ వచ్చింది. మళ్ళీ ఆరోగ్యవంతుడు కావడానికి బోలెడంత డబ్బు, ఎంతో శ్రద్ధ అవసరమైనాయి.

పోర్న్ చూడడం ద్వారా లైంగిక కార్యాన్ని గురించి తెలుసుకోవడమంటే, ఫాస్ట్ అండ్ ఫ్యూరియస్ ఫిల్మ్ సిరీస్ చూస్తూ డ్రైవింగ్ చేయడమెలాగో నేర్చుకోవడం లాంటిదని సెక్సాలజిస్టు, న్యూరో సైకియాట్రిస్ట్ డా.శ్వేతాంక్ బన్సాల్ అంటారు.

ఇదెలా ఉండాలో అనే దాని గురించి మీ దృక్పథాన్ని పోర్న్ పూర్తిగా మార్చేస్తుంది. అవాస్తవమైనవి ఆశించేలా చేస్తుంది.

ఇప్పుడు ఎనిమిది, తొమ్మిదేళ్ళ వయస్సు పిల్లలు తన దగ్గరికి వస్తారని డా. బన్సాల్ చెబుతున్నారు. ‘‘తమ పిల్లలు పోర్న్ చూసి కుంగుబాటుకు, మనోవ్యాకులతకు లోనవుతున్నారని తల్లిదండ్రులు చెబుతున్నారు.’’

భారతదేశంలో కౌమార విద్యాకార్యక్రమం ఉంది కాని అదికొద్దిమందికే ప్రయోజనం కలిగించింది.

మానవ వనరుల అభివృద్ధి మంత్రిత్వశాఖ 2007లో కౌమార విద్యా కార్యక్రమాన్ని ఆరంభించింది. అయితే తర్వాత చాలామంది తల్లిదండ్రులు ఇది అశ్లీలంగా ఉందని ఫిర్యాదు చేయడంతో ప్రభుత్వం ఈ కార్యక్రమాన్ని ఆపేసింది.

ఆ పిమ్మట ఐక్యరాజ్యసమితి జనాభా నిధి సహాయంతో 2009లో దీనిని మళ్ళీ ఆరంభించారు.

దీనిలో కౌమారంలో వచ్చే మార్పులు, జెండర్, లైంగికతలను గురించిన అపోహలు, శరీరాకృతి, హింస, హెచ్ ఐవి ఇన్ఫెక్షన్, మాదక ద్రవ్యాల వాడకం వంటివి ఉన్నాయి.

కాని దీని అమలు సవాలుగానే ఉంది. బీహార్ లో జహనాబాద్ పాఠశాల ప్రిన్సిపాల్ కనీసం ఈ కార్యక్రమం గురించి విననేలేదు అని నాకు తెలిసింది.

బాలికా కన్యావిద్యాలయ కేవలం అమ్మాయిల పాఠశాల. పక్కనే అమ్మాయిలు, అబ్బాయిలు కలిసి చదువుకునే పాఠశాల ఉన్నా తల్లిదండ్రలు తమ కూతుర్లను ఈ పాఠశాలలోనే చేరుస్తారని ప్రిన్సిపాల్ రవీంద్రకుమార్ చెప్పారు.

చిన్న నగరాలు, పట్టణాలు, గ్రామాల్లో అమ్మాయిలు అంతగా మాట్లాడుకోరు.అందువల్ల కూడా కుతూహలం పెరిగే అవకాశం ఉంది.

జహనాబాద్‌లో నేను చూసిన కోచింగ్ సెంటర్లో వంద మంది విద్యార్థులున్నారు. అమ్మాయిలు ఒక చోట, అబ్బాయిలు ఒకచోట విడిగా కూర్చున్నారు.

లైంగిక విద్య అవసరం ఉందని రవీంద్రకుమార్ అంగీకరించారు. ‘‘ఈ విషయాలు పాఠశాలలోనే చెప్పాలి. తండ్రులు ఈ విషయాలు చెప్పలేరు.తల్లులు ఇంట్లోనేఉంటారు కాబట్టి వారికి వర్తమాన విషయాలు తెలియవు. ప్రభుత్వం ఆదేశిస్తే మేము తప్పనిసరిగాఅమలు చేస్తాం.”

సెక్స్ ఎడ్యుకేషన్ (లైంగిక విద్య) అంటే కేవలం శరీరం గురించి,లైంగిక సంబంధాలగురించి సమాచారమివ్వడమేకాదు, స్త్రీల పట్ల పురుషుల వైఖరుల్లో లోతైనస్థాయిల్లో గాఢమైన ప్రభావాన్ని కలిగించడం కూడ అని రంజీత్ రంజన్ అన్నారు.

ఆమె ఇలా అన్నారు, ‘మనం ఎంతో ప్రగతిశీలంగా ఉన్నామని అనుకోవచ్చు. కానీ, సెక్స్ ఎడ్యుకేషన్ లేకుండా, ఈ వీడియోలు వ్యాపిస్తూ ఉంటే,ఆడవాళ్ళని వస్తువులుగా చూడాలనే ఆలోచన మొదలై, వాళ్ళు వినోదానికి పనికొస్తారనే దృష్టి ఏర్పడుతుంది. దీని పట్ల జాగ్రత్త వహించాల్సిన అవసరం ఉంది.’

అందుకని పోర్న్ నిషేధించడమొకటే దీనికి సమాధానమా?

ఇటీవల హింసాత్మక పోర్నోగ్రఫీ ఉన్న వెబ్‌సైట్లను నిషేధించమని ఉత్తరాఖండ్ హైకోర్టు కేంద్ర ప్రభుత్వాన్ని కోరింది.

డెహ్రాడూన్ లో యువకులు తమ మొబైల్ లో పోర్న్ చూసి ఒక బాలికపై సామూహిక అత్యాచారం జరిపారనే సంఘటన రిపోర్టు రావడంతో ఇలా కోరడం జరిగింది. అబ్బాయిలను అరెస్టుచేశారు. కేసు దర్యాప్తు జరుగుతోంది. హింసాత్మక పోర్న్ అందుబాటులో ఉండడంవల్ల మహిళల మీద ఇంకా హింస పెరుగుతుందని దీన్ని నిసేధించమని ఉత్తరాఖండ్ హైకోర్టు ప్రభుత్వాన్ని కోరింది.

దీని కన్నా ముందు, 2015లో సునీతాకృష్ణన్, మరో లాయరు సుప్రీంకోర్టుకి వెళ్ళినపుడు కూడా కోర్టు ప్రభుత్వానికి ఈ సిఫారసు చేసింది.

ఆ సమయంలో ఐటి నిపుణుడు సురేశ్ శుక్ల 857 వెబ్ సైట్ల జాబితాను కోర్టుకు సమర్పించారు. పోర్న్ నిషేధానికి ఆ జాబితా ఆధారమైంది.

అయితే, జనం నిరసనలు వ్యక్తం చేయడంతో ఆ నిషేధాన్నికొన్ని రోజుల్లోనే వెనక్కి తీసుకున్నారు. ఆ వెబ్ సైట్ల జాబితా తయారీ ఏ విధంగా జరిగిందో బహిర్గతం చేయలేదనేది ఒక వాదన.

నేను దీని గురించి సురేశ్ శుక్లను అడిగినపుడు, ఆయన సంతృప్తికరమైన సమాధానం ఇవ్వలేకపోయారు. ‘‘మేము హైట్రాఫిక్ (జనం ఎక్కువగా చూస్తున్న)వెబ్ సైట్లు ఎంపికచేశాం. కొన్ని ఇతర దేశాల్లో వాళ్ళు చూసేవి. ఇది మరీ శాస్త్రీయమైన ఎంపిక కాదు కాని, అన్నీ పోర్నోగ్రఫీనే.’’

సురేష్ శుక్లా తయారు చేసిన జాబితా డిఫాల్ట్ పోర్న్ బ్లాక్ లిస్ట్ అయింది. ఇటీవల నిషేధానికి కూడా ఆధారమైంది. సురేష్ తయారు చేసిన జాబితాలోవి 83 సైట్లు అన్నీ బ్లాక్ అయ్యాయి. అయితే, ఇంటర్నెట్లో ప్రాక్సీ వెబ్ సైట్లు తయారుచెయ్యడమెంత సులభమో తెలిసిందే గనుక, నిషేధాన్ని అమలుచేయడం ప్రశ్నగానేమిగిలింది. మరో సమస్య ఏమిటంటే హింసాత్మక లైంగిక అంశాలు సోషల్ మీడియా ద్వారా షేర్అవుతున్నాయి. అది పోర్న్ వెబ్ సైట్ల నిషేధ పరిధిలోకి రాదు.

ఇంటర్నెట్ సర్వీస్ ప్రొవైడర్స్ ఆఫ్ ఇండియాకు రాజేశ్ ఛారియా ప్రెసిడెంటు. ఈ సంస్థలే బ్లాక్ లిస్ట్ చేసిన సైట్లను బ్లాక్ చేయాల్సినవి.

నిషేధం వల్ల పెద్ద ప్రయోజనం లేదని రాజేష్ అ0భిప్రాయం. ‘‘ఈ రోజుల్లో పోర్నోగ్రఫీ. పిల్లలపై అత్యాచారాలు,హింస డెస్క్ టాప్లో చూడడం లేదు. ఫోన్లోనే చూస్తున్నారు. పిల్లల పోర్నోగ్రఫీని బ్లాక్ చేయాలంటే,వాట్సాప్‌ను నిషేధించమని నేను సూచించాను.అయితే భారతదేశమంతటా వ్యాప్తిలో ఉన్న అప్లికేషన్‌ను నిషేధించడం కష్టం.”

ఇటువంటి వాటిని షేర్ చేయడంలో వాట్సాప్ప్రాబల్యాన్ని కాదనలేం. అయితే ఈ వ్యాప్తిని అరికట్టడానికి ఏం చేస్తున్నారని వారిని మేం ప్రశ్నించాం.

ఈ కోరికను గుర్తించకపోవడం మనం చేస్తున్నపెద్ద తప్పు అని పరోమిత వోహ్రా అంటున్నారు.

ఆమె ‘ఏజెంట్స్ ఆఫ్ ఇష్క్’ అనే వెబ్ సైట్‌ను నడుపుతున్నారు. దానికి ట్యాగ్ లైన్ ‘వియ్ గివ్ సెక్స్ ఎగుడ్ నేమ్’. (సెక్స్ కి మేం మంచి పేరు తెచ్చిపెడతాం.)

పరోమిత దేశవ్యాప్తంగా అన్ని రకాల నేపథ్యాల నుంచి, లైంగికతల నుంచి వచ్చిన వారి నుంచి, అభిప్రాయాలు సేకరిస్తారు; ఆమె పాటలు, వీడియోలు రికార్డు చేసి షేర్ చేస్తారు. సెక్స్ గురించి బహిరంగంగా మాట్లాడటాన్ని ప్రోత్సహించడానికి ఇలా చేస్తారు.

హింసాత్మక లైంగిక అంశాలను చూసి, ఆనందించడానికి హింసాత్మక ప్రవర్తన ఒకటే మార్గమని జనం నమ్ముతారని, సున్నితత్వానికి తావివ్వరని, స్త్రీ అనుమతికి ఏమాత్రం ప్రాముఖ్యమివ్వరని ఆమె అభిప్రాయం.

అందుకనే పరోమిత అనుమతిని గురించి వివరిస్తూవీడియోలు తీశారు. ఎందుకంటే అనుమతి లేకుండా చేసినపుడే సెక్స్ హింసాత్మకంగా మారుతుంది.

పరోమిత ఇలా అంటారు, ‘అనుమతి – యస్ అంటే యస్ అని గాని, నో అంటే నో అనిగాని చెప్పేంత సులభమైనది కాదు. నిజజీవితంలో కొన్నిసార్లు ఏదీ నిర్ధారించుకోలేని దీర్ఘ ప్రక్రియ కొనసాగుతుంది. ఇది ఏదైనా కావచ్చు. ఇది యస్ (అంగీకారం) కావచ్చు. నో (అనంగీకారం) కావచ్చు.

ఈ సంభాషణకు చాలా సమయం పడుతుంది. ఎనిమిది, తొమ్మిదేళ్ళ పిల్లలు తన దగ్గరకు వస్తారని డాక్టర్ బన్సాల్ చెప్పిన విషయం మనం గుర్తుంచుకుని, తొందరగా దీన్ని మొదలుపెట్టాలి.

ఆన్ లైన్లో ఏజెంట్స్ ఆఫ్ ఇష్క్ కు చాలాదూరంగా ,పుణెలోని ‘ఈక్వల్ కమ్యూనిటీ ఫౌండేషన్ ’అనే సంస్థ తక్కువ ఆదాయ కమ్యూనిటీ యువకులకు ఏడాది పొడుగునా వర్క్ షాపులు నిర్వహిస్తోంది. పోర్న్ చూడడం గురించే కాకుండ, వర్క్ షాపులలో చాలాకౌమార సమస్యల పై దృష్టి కేంద్రీకరిస్తారు. దైనందిన జీవితానికి సంబంధించిన వాటిని అంటే ఇంటి పని ఎవరు చెయ్యాలి, అమ్మాయిలకు జీవిత నిర్ణయాలు తీసుకునేస్వేచ్ఛ ఉండడం, వారితో మెలిగే పద్ధతి, తమపై జరిగే హింసకు అమ్మాయిలు ఏ విధంగాను బాధ్యులు కారని మొదలైన అంశాలు ఉంటాయి.

అక్కడ ఒక ఏడాది గడిపిన ఇద్దరు అబ్బాయిలతో నేను మాట్లాడాను. వాళ్ళలో ఒకబ్బాయి అదివరకు ఇంటి పని ఆడవాళ్ళే చేయాలని అనుకున్నానని,కాని ఇప్పుడు బట్టలు ఉతకడం, గిన్నెలు కడగడం తానూ చేస్తున్నానని, దానితో తన సోదరికి ఆడుకోవడానికి సమయం దొరుకుతోందనిచెప్పాడు.

మరొక అబ్బాయి తన స్నేహితులు ఆడపిల్లలను కొట్టడంచూసేవాణ్ణని, తాను కూడ అలా చేయాలనుకున్నాను అన్నాడు. కాని తర్వాత హేళన వ్యాఖ్యలు, అమ్మాయిలనుఏడిపించడం, వంటివి కూడ హింసేనని తెలిసిందని చెప్పాడు. అమ్మాయిలకు ఇష్టమైనపుడు చేయడం ఓకే అని లేకపోతే అంగీకారం లేనట్టేనని అన్నాడు.

ఈ చిన్న చర్యలు పెద్ద సవాలు పరిష్కారానికి ఆరంభాలు. భారతదేశంలో మొబైల్ ఫోన్లలో హానికరమైన లైంగిక విషయాలు వ్యాప్తి చెందకుండా ఆపటానికి, మనకి ఉపకరణాలెన్నో కావాలి: సాంకేతిక పరిష్కారాలు, సెక్స్ ఎడ్యుకేషన్, మరింతగా దీని గురించి మాట్లాడడం.

అంతేకాకుండా, మహిళల పట్ల మన వైఖరుల్లో మౌలికమైన మార్పురావడం అవసరం. ఒక పిల్లవాడు ఏవేవి హింస పరిధిలోకి వస్తాయని తెలుసుకోవడంతో ఈ మార్పు మొదలు కావచ్చు.