తెలంగాణ రాష్ట్ర బడ్జెట్: మాంద్యం దెబ్బకు తగ్గిన బడ్జెట్ సైజు

తెలంగాణ ముఖ్యమంత్రి కె.చంద్రశేఖరరావు అసెంబ్లీలో బడ్జెట్ ప్రవేశపెట్టారు. తొలి ఐదేళ్ల పరిపాలనలో అద్భుతమైన ప్రగతి సాధించామని బడ్జెట్ ప్రసంగం సందర్భంగా కేసీఆర్ అన్నారు.

పేదలకు ఆరోగ్య భద్రత కల్పించడమే తమ ప్రభుత్వ ప్రధాన లక్ష్యమని ఈ సందర్భంగా కేసీఆర్ ప్రకటించారు. తాము ప్రవేశపెట్టిన వినూత్న ప్రజాప్రయోజన పథకాలు యావత్‌ దేశాన్నే ఆశ్చర్యపరిచాయని, అన్ని రంగాల్లోనూ పురోగతి సాధిస్తున్నామని చెప్పారు.

ప్రత్యేక తెలంగాణ ఏర్పాటుకు ముందు తెలంగాణ జీఎస్‌డీపీ సగటు వృద్ధి రేటు 4.2 శాతం ఉండేదని, 2018-19 నాటికి ఇది రెండున్నర రెట్లు పెరిగి 10.5 శాతంగా నమోదైందని అన్నారు.

గడిచిన 18 నెలలుగా దేశంలో ఆర్థిక మాంద్యం కొనసాగుతోందని, ఆ ప్రభావం రాష్ట్రంపై కూడా పడిందని, అందువల్ల వాస్తవ పరిస్థితుల ఆధారంగానే రాష్ట్ర బడ్జెట్ రూపొందించాలని ప్రభుత్వం నిర్ణయించిందని కేసీఆర్ తన బడ్జెట్ ప్రసంగంలో పేర్కొన్నారు.

ఆర్థిక మంత్రి హరీశ్ రావు మండలిలో రాష్ట్ర బడ్టెట్ ప్రవేశపెట్టారు.

బడ్జెట్‌లోని ముఖ్యాంశాలు

2019-20 ఆర్థిక సంవత్సరంలో రూ.182017 కోట్లను ప్రతిపాదితవ్యయంగా ఓట్-ఆన్-అకౌంట్‌లో ప్రభుత్వం అంచనా వేసింది.

కానీ ఆర్థిక మాంద్యం పరిస్థితుల కారణంగా అన్ని ప్రధాన రంగాలు దేశవ్యాప్తంగా తిరోగమనంలో ఉన్నాయని, ఆదాయాలు పడిపోయాయని కేసీఆర్ అన్నారు.

ఆర్థిక మాంద్యం పరిస్థితులున్నప్పటికీ వ్యవసాయ రంగం, రైతుల జీవితాల్లో వెలుగులు నింపాలనే లక్ష్యంతోనే ప్రస్తుత బడ్జెట్ రూపొందించామని కేసీఆర్ వ్యాఖ్యానించారు. మాంద్యంపై మేధోమథనం చేస్తూ తెలంగాణ ఆర్థిక శాఖ ముందుకు కదులుతోందని కేసీఆర్ అన్నారు.

అన్ని రంగాలకూ 24గంటల పాటు నాణ్యమైన విద్యుత్ సరఫరా చేస్తున్నామని, వ్యవసాయ రంగంలో 8.1శాతం వృద్ధిరేటు సాధించామని అన్నారు.

పరిశ్రమల రంగంలో 5.8శాతం వృద్ధి, ఐటీ ఎగుమతుల విలువ రూ.1.10 లక్షల కోట్లకు చేరిందని కేసీఆర్ తెలిపారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)