Arolwg iard chwarae - Geirfa

micro:bit - cewri codio > arolwg iard chwarae

Bydd yr eirfa hon yn eich helpu i addysgu BBC micro:bit - arolwg iard chwarae yn hyderus. O ddeallusrwydd artiffisial i ecosystemau, mae'r ateb yma i chi!

Rydyn ni wedi casglu’r holl dermau allweddol sy'n benodol i'r arolwg iard chwarae. Mae geirfa Cyfrifiadureg/TGCh ehangach ar gyfer addysgwyr ar gael gan ein partneriaid yn Sefydliad Addysgol Micro:bit yma.

Cofiwch y bydd rhai o’r dolenni yn yr erthygl hon yn mynd â chi o wefan y BBC.

Arwynebedd: faint o le sy’n cael ei ddefnyddio gan siâp dau ddimensiwn.

Bioamrywiaeth: mesur o faint o wahanol rywogaethau sy’n byw mewn ecosystem.

Cod: cyfarwyddiadau wedi’u hysgrifennu mewn ffordd y gall cyfrifiadur ei deall.

Cynefin: y mannau lle mae planhigion, anifeiliaid a phethau byw eraill yn bodoli.

Data: gwybodaeth sy’n cael ei chasglu i’w defnyddio mewn mannau eraill.

Deallusrwydd artiffisial: gallu meddalwedd cyfrifiadurol sydd wedi'i ddylunio gan bobl i gyflawni tasgau sydd fel arfer angen deallusrwydd dynol.

Deunydd naturiol: deunydd a gafwyd o rywbeth byw, e.e. gwlân, pren neu gotwm.

Deunydd synthetig: deunydd wedi'i wneud gan bobl, e.e. plastig, gwydr neu neilon.

Dysgu peirianyddol: cymhwyso technoleg deallusrwydd artiffisial lle mae meddalwedd cyfrifiadurol wedi'i gynllunio i gyflawni tasg yn gyflym ac yn ddibynadwy, ar ôl cael ei hyfforddi gan enghreifftiau o ddata a ddarperir gan fodau dynol. Gellir disgrifio’r broses hyfforddi hon fel ‘dysgu’ a dyma pam rydyn ni’n defnyddio’r term ‘dysgu peirianyddol’.

Ecosystem: cymuned o anifeiliaid, planhigion a micro-organebau a'u cynefin.

Hyfforddi model dysgu peirianyddol: darparu samplau o ddata wedi'u categoreiddio a'u labelu gan bobl i helpu meddalwedd dysgu peirianyddol i adeiladu model.

Meddalwedd: set o raglenni a ddefnyddir i gyflawni tasg, sydd fel arfer yn fwy cymhleth nag un rhaglen.

Mesurydd cyflymiad: synhwyrydd sy'n canfod symudiad.

Model dysgu peirianyddol: set o reolau a ddatblygwyd gan system dysgu peirianyddol i gategoreiddio data.

Newidyn: cynhwysydd ar gyfer storio data y gellir ei gyrchu a'i ddiweddaru tra bo rhaglen yn rhedeg.

Profi model dysgu peirianyddol: gwerthuso model dysgu peirianyddol yn erbyn data hysbys neu wedi'i labelu i weld a yw'n categoreiddio'r data hwnnw sydd wedi'i labelu neu'n hysbys yn gywir. Os nad yw’n gywir, efallai y bydd angen rhagor o ddata hyfforddi.

Rhaglen: set o gyfarwyddiadau wedi’u hysgrifennu mewn cod sy’n cyflawni tasg benodol.

Siâp afreolaidd: siâp nad yw ei ochrau a’i onglau i gyd yr un maint.

Siâp rheolaidd: siâp y mae ei hyd, ei ochrau a’i onglau mewnol yn gyfartal.

Tymheredd: mesur o ba mor boeth yw rhywbeth.

Thermomedr: dyfais sy’n mesur tymheredd.

Rhagor o adnoddau BBC micro:bit - arolwg iard chwarae