திப்பு சுல்தான் ஆயுதங்கள் 6 மிலியன் பவுண்டுகளுக்கு மேல் ஏலம்

மைசூரை ஆண்ட திப்பு சுல்தான் பயன்படுத்திய 30 ஆயுதங்கள் லண்டன் போன்ஹாம்ஸ் ஏல நிறுவனத்தில் சுமார் 6 மிலியன் பவுண்டுகளுக்கும் மேலான விலைக்கு ஏலம் போயிருக்கின்றன.

திப்பு சுல்தான் பயன்படுத்திய சின்னமான புலி சின்னம் இந்த ஆயுதங்கள் பலவற்றில் பொறிக்கப்பட்டிருந்தது.

அவர் பயன்படுத்திய , விலை உயர்ந்த மணிகள் பதித்த, புலித்தலையுடன் கூடிய வாள் 2.15 மிலியன் பவுண்டுகளுக்கு ஏலம் போனது.

அதே போல, அவர் பயன்படுத்திய இரு-வேட்டு விளையாட்டுத் துப்பாக்கி 7.22 லட்சம் பவுண்டுகளுக்கு ஏலம் போனது.

ஏலம் போன இந்த ஆயுதக்குவியலில், வளைவான கத்திகள், மணிகள் பதித்த வாள், அம்புகள், வேலைப்பாடுடன் கூடிய தலைக்கவசங்கள், பிஸ்டல்கள், மூன்று பவுண்டு எடையுள்ள குண்டுகளை வீசும் பீரங்கி ஆகியவை அடங்கும். இவை அனைத்துமே கலை நயம் மிக்க வகையில் நேர்த்தியாக செய்யப்பட்டிருந்தன என்கிறது அந்த ஏல நிறுவனம்.

இந்திய மற்றும் இஸ்லாமிய கலைப் பொருட்களின் ஏலம் என்று வர்ணிக்கப்பட்ட இந்த ஏலத்தில் மொத்தமாக சுமார் 7.4 மிலியன் பவுண்டுகளுக்கு பொருட்கள் ஏலம் போயின.

திப்பு சுல்தான் அப்போது இந்தியாவில் கால் ஊன்றிக்கொண்டிருந்த கிழக்கிந்தியக் கம்பெனியின் கடுமையான எதிர்ப்பாளராக இருந்தவர். அவர் 1799ம் ஆண்டில் இறக்கும்வரை ஆங்கிலேயர்களின் கிழக்கிந்தியக் கம்பெனியை எதிர்த்து சண்டையிட்டார்.