கெளதம் அதானியின் எழுச்சி

நரேந்திர மோதி சிறுவனாக ரயில்வே நடைபாதைகளில் தேநீர் விற்றுக் கொண்டிருந்தார். கெளதம் அதானியோ ஆமதாபாத் நகர வீதிகளில், சைக்கிளில் வீடுவீடாக சென்று பொருட்களை விற்றுக் கொண்டிருந்தார்.

தற்போது நரேந்திர மோதி, இந்தியாவின் பிரதமராக இருக்கிறார். அவரது நண்பர் கெளதம் அதானியோ உலகின் முதல் 5 பெரும் பணக்காரர்களில் ஒருவராக இருக்கிறார். அதானியின் அதிவேக வளர்ச்சி, முதலில் குஜராத்திலும் பின்னர் இந்தியாவிலும் அதிகாரமிக்க மனிதராக உயர்ந்த மோதியின் வளர்ச்சியுடன் இணைத்தே அவ்வப்போது பேசப்படுகிறது.

அங்குள்ள வியாபாரிகளுடன் உரையாடுகையில், “இந்த சந்தையில் நூற்றுக்கணக்கான கடைகள் உள்ளன. அதானி இங்கே துணி வியாபாரம் செய்த போதிருந்த கடைகள் பலவும் இன்னும் உள்ளன. இங்குள்ள வியாபாரிகளில் ஒருவர் அடுத்த 2-3 தசாப்தங்களில் இந்தியாவின் மிகப்பெரிய பணக்காரராகவும், உலகின் 2-வது பெரிய செல்வந்தராக உருவெடுப்பார் என்று அப்போது யாருக்கும் தெரிந்திருக்க வாய்ப்பில்லை,” என்று ஒருவர் தத்துவம் பேசினார்.

முன்னெப்போதும் இல்லாத அளவுக்கு விரிவாகி விட்ட தமது வியாபார சாம்ராஜ்ஜியத்தை ஆமதாபாத்தில் உள்ள தலைமையகத்தில் இருந்தே அதானி நிர்வகிக்கிறார். கடந்த நவம்பர் மாத நிலவரப்படி, சந்தையில் பட்டியலிடப்பட்ட அதானி குழுமத்தின் கீழுள்ள 7 நிறுவனங்களின் சந்தை மதிப்பு 235 பில்லியன் அமெரிக்க டாலராகும். இது பல நாடுகளின் ஒட்டுமொத்த உள்நாட்டு உற்பத்தியை விட அதிகம்.

இந்தியாவில் பின்வரும் வர்த்தகங்களில் அதானி குழுமம் முன்னிலை வகிக்கிறது:

1970 மற்றும் 1980 களில் இந்திய தொழிலதிபர் ஒருவர் கடல் கடந்து பிற நாடுகளில் பெரிய திட்டங்களை சொந்தமாக்கிக் கொள்வது என்பது நினைத்துப் பார்க்கவே முடியாத ஒன்று. இந்தியாவுக்கு வெளியே ஆஸ்திரேலியா, இலங்கை, இஸ்ரேல், இந்தோனேஷியா போன்ற நாடுகளில் மிகப்பெரிய திட்டங்களை தொடங்கி நடத்தும் முதல் இந்திய தொழிலதிபர் அதானி தான்.

“ஆஸ்திரேலியாவில் குயின்ஸ்லாந்து மாகாணத்தில் 35 ஆண்டுகளுக்கும் மேலாக நிலக்கரி ஏற்றுமதிக்கு பயன்படுத்தப்பட்ட அப்போட் பாயின்ட் துறைமுக முனையத்தை அதானி நிறுவனம் வாங்கி நடத்துகிறது” என்று அதானி குழும இணையதளம் கூறுகிறது. சர்ச்சைக்குரிய கார்மிக்கேல் நிலக்கரிச் சுரங்கத்துடன், தண்டவாளப் பணிகள் திட்டத்தையும் அதானி சுரங்கத் தொழில் நிறுவனம் சொந்தமாக்கிக் கொண்டுள்ளது. கொழும்பு, இஸ்ரேலின் ஹைஃபா ஆகிய இடங்களில் இந்நிறுவனத்திற்கு சொந்தமான துறைமுகங்கள் உண்டு. இந்தோனேஷியாவில் இந்நிறுவனத்திற்கு சொந்தமாக நிலக்கரிச் சுரங்கம் உள்ளது. மேலும், இதன் புதுப்பிக்கத்தக்க எரிசக்தி வர்த்தகம், பசுமை ஆற்றல் உற்பத்தியில் பல பில்லியன் அமெரிக்க டாலர்களை முதலீடு செய்ய உறுதி பூண்டுள்ளது.

அதானி குழும இணையதளத்தின் படி,  2021-22ஆம் நிதியாண்டில் அதன் வருவாய் 70,433 கோடி ரூபாயாகும்.

டாடாவும், பிர்லாவும் சுதந்திரத்திற்குப் பிந்தைய இந்திய பொருளாதாரத்தை வடிவமைத்தார்கள் என்றால், 21-ம் நூற்றாண்டு இந்தியாவை அதானிகளும் அம்பானிகளுமே வலுவூட்டுகிறார்கள். முகேஷ் அம்பானியுடன் ஒப்பிடுகையில், கெளதம் அதானி முதல் தலைமுறை தொழில்முனைவோர் என்பது அவரை இன்னும் சிறப்பு வாய்ந்தவராக்குகிறது.

அதானியின் வளர்ச்சிக்கு அவரது அரசியல் தொடர்புகளே காரணம் என்று விமர்சிப்பவர்கள் கூறுகின்றனர்.

2022 பிப்ரவரி 2-ம் தேதி நாடாளுமன்றத்தில் ராகுல்காந்தி முன்வைத்த இந்த விமர்சனத்தைப் பாருங்கள்.

"அமைப்புசாரா தொழில்துறையில் ஏகபோக முதலாளித்துவம் உருவாக்கப்பட்டுள்ளது. எந்த துறையாக இருந்தாலும், குறிப்பாக 2 மிகப்பெரிய ஏகபோக நிறுவனங்களைப் பற்றி கூறுகிறேன். (அதானி, அம்பானி என்று சில எம்.பி.க்கள் குறிப்பிட்டனர்) கொரோனா பேரிடரின் போது டெல்டா, ஓமைக்ரான் போன்ற வைரஸின் திரிபுகள் இருந்தன. அதேபோல் கிட்டத்தட்ட இந்திய பொருளாதாரத்தின் அனைத்து துறைகளிலும் இரண்டு ஏ வகை திரிபுகள் பரவிக் கொண்டிருக்கின்றன. ஒரு நபர் – பெயரைக் குறிப்பிட விரும்பவில்லை - நாட்டின் அனைத்து துறைமுகங்கள், விமான நிலையங்கள், மின்சாரம், விநியோகம், சுரங்கம், பசுமை ஆற்றல், எரிவாயு விநியோகம், சமையல் எண்ணெய் உற்பத்தி மற்றும் வர்த்தகம் ஆகியவற்றை கட்டுப்படுத்துகிறார் (சில எம்.பி.க்கள் அதானி என்று முழக்கமிட்டனர்). நாட்டில் எங்கே என்ன நடந்தாலும் அதானியை அங்கே பார்க்கலாம். மறுபுறம் பெட்ரோகெமிக்கல்ஸ், தொலைத்தாடர்பு, சில்லறை வணிகம், ஆன்லைன் வர்த்தகம் ஆகிய துறைகளில் அம்பானி ஏகபோக ஆதிக்கம் செலுத்துகிறார். நாட்டின் மொத்த செல்வமும் குறிப்பிட்ட சிலரின் கட்டுப்பாட்டில் இருக்கிறது."

மேற்குக் கடற்கரையில் குஜராத்தின் கட்ச் மாவட்டத்தில் உள்ள முந்த்ரா துறைமுகம் அதானி குழுமத்தின் வளர்ச்சியில் முக்கிய மைல் கல்லாகும்.

முந்த்ரா துறைமுகத்தின் முக்கியத்துவத்தை ஆர்.என்.பாஸ்கர் தனது புத்தகத்தில், “முந்த்ரா துறைமுக ஒப்பந்தமே அதானி மேற்கொண்ட மிகப்பெரிய வர்த்தக ஒப்பந்தம். முந்த்ரா துறைமுகம் இல்லாவிட்டால்  அதானியின் மிகச்சில தொழில்கள் மட்டுமே வளர முடிந்திருக்கும்,” என்று குறிப்பிட்டுள்ளார்.
அவரது கூற்றுப்படி, முந்த்ரா துறைமுகம் மற்றும் சிறப்பு பொருளாதார மண்டலத்தின் கீழ் அதானி குழுமத்திற்கு 15,665 ஏக்கர் நிலம் சொந்தமாக உள்ளது. கூடுதலாக 16,688 ஏக்கர் நிலத்தை அவரது குழுமத்திடம் ஒப்படைப்பதற்கான பணிகள் நடைபெற்று வருகின்றன.
கெளதம் அதானியும், அவரது குழுமமும் முந்த்ரா துறைமுகத்திற்காக சந்தை விலையைக் காட்டிலும் மிகக் குறைந்த விலையில் நிலத்தை கையகப்படுத்தியதாக அடிக்கடி குற்றம்சாட்டப்படுகிறது. அதானி குழுமத்திற்கு அடிமாட்டு விலையில் நிலங்கள் விற்கப்படும் போது குஜராத் அரசை பல ஊடகங்கள் கடுமையாக விமர்சித்துள்ளன.

2014 ஏப்ரலில் என்.டி.டி.வி. தொலைக்காட்சிக்கு அளித்த நேர்காணலில் இந்த குற்றச்சாட்டுகளை கெளதம் அதானி மறுத்தார்.
“முந்த்ரா துறைமுக மேம்பாட்டிற்காக தனது நிறுவனத்திற்கு தரப்பட்ட நிலம் தரிசு நிலம்தான். அந்த நிலத்தை குறைந்த விலைக்கு வாங்கப்படுதாக கூறுவதில் எந்த முகாந்திரமும் இல்லை,” என்று அந்த நேர்காணலில் அதானி கூறினார்.
சந்தை விலையைக் காட்டிலும் 3 மடங்கிற்கும் குறைவாகவே நிலத்தின் விலை நிர்ணயிக்கப்பட்டதாக கூறப்படும் குற்றச்சாட்டுகளை அவர் மறுக்கிறார். “அந்த குற்றச்சாட்டுகள் அடிப்படை ஆதாரமற்றவை,” என்கிறார் அவர்.

“முந்த்ராவில் நாங்கள் தொழில் நடவடிக்கைகளை தொடங்கிய போது குஜராத்தில் சிமன்பாய் பட்டேலின் அரசு பதவியில் இருந்தது. 1993ம் ஆண்டு அங்கு ஒரு சதுர மீட்டருக்கு 10 காசு என்ற விலையில் நிலம் தரப்பட்டது. கடலில் மூழ்கிய, மோசமான, தரிசு நிலமாகவே அது இருந்தது,” என்று அவர் மேலும் குறிப்பிடுகிறார்.

“அரசு உத்தரவுப்படி, வளர்ச்சி நடவடிக்கைகளை மேற்கொள்ள 1993ம் ஆண்டு நாங்கள் சென்ற போது அங்கு ஒன்றுமே இல்லை. அப்போது முந்த்ராவில் ஒரு ஏக்கர் நிலம் வெறும் 400 ரூபாயாகவே இருந்தது. ஏக்கருக்கு ரூ.5 ஆயிரம் விலையில் நாங்கள் நிலத்தை வாங்க முடிவு செய்திருந்தாலும், மக்கள் அதற்கு தயாராகவே இருந்தனர். ஆனால் நாங்கள் 10 மடங்கு விலை கொடுத்து நிலத்தை வாங்கினோம்” என்று அவர் தெரிவித்துள்ளார்.

ஆர்.என்.பாஸ்கர் தனது புத்தகத்தில் இந்த குற்றச்சாட்டுகளையும் குறிப்பிடத் தவறவில்லை.

“அந்த நிலத்தை விற்று அரசு பணம் பார்த்தது. அதேபோல்தான் நில உடைமையாளர்களும், மீனவர்களும் பணம் பார்த்தனர். நிலத்திற்கு கிடைத்த பணத்தால் அவர்கள் திருப்தியடைந்தனர். ஆனால், அதானி அடிமாட்டு விலைக்கு நிலத்தை வாங்கிவிட்டதாக விமர்சிப்பவர்கள், அன்று அந்த நிலங்களின் மதிப்பு என்னவென்பதை மறந்துவிட்டனர்.” என்கிறார் அவர்.

முந்த்ரா துறைமுக மேம்பாட்டுத் திட்டத்திற்காக அதானி குழுமத்திற்கு வழங்கப்பட்ட நிலத்தின் அப்போதைய சந்தை மதிப்பு என்ன? அது என்ன விலைக்கு அதானி குழுமத்திற்கு வழங்கப்பட்டது? என்று தகவல் அறியும் உரிமைச் சட்டத்தின் கீழ் பிபிசி அளித்த மனுவுக்கு குஜராத் அரசு பதிலளிக்கவில்லை.

அதானியின் வானளாவிய வளர்ச்சிக்கு பிரதமர் மோதியும் முந்த்ரா துறைமுகமுமே காரணம் என்று குஜராத் அரசியலை நன்கு அறிந்த மூத்த பத்திரிகையாளர் திலீப் படேல் கூறுகிறார்.

பிபிசியிடம் பேசிய அவர், “முந்த்ராவில் நிலம் ஒப்படைக்கும் பணிகள் சின்மாய் படேல் ஆட்சியில் தொடங்கப்பட்டது என்பதில் எந்த சந்தேகமும் இல்லை. ஆனால், மோதி ஆட்சியில்தான் அதானி குழுமத்திற்கு மிகப்பெரிய அளவில் நிலம் வெறும் சாக்கலேட் வாங்கும் விலைக்கு வழங்கப்பட்டன” என்றார்.

(முந்த்ராவில் சுற்றுச்சூழல் விதிகளை அதானி குழுமம் மீறுவதாகவும் குற்றச்சாட்டுகள் உண்டு. இதற்காக, 2013ம் ஆண்டில் காங்கிரஸ் தலைமையிலான ஐக்கிய முற்போக்கு கூட்டணி அரசு விதித்த 200 கோடி ரூபாய் அபராதத்தை மோதி அரசு நீக்கிவிட்டதாக இந்திய ஊடகம் ஒன்று செய்தி வெளியிட்டது.
பிசினஸ் ஸ்டேன்டர்டு (Business Standard) பத்திரிகை தகவல் அறியும் உரிமைச் சட்டத்தின் கீழ் பெற்ற தகவலில் இது தெரியவந்தது.

முந்த்ரா அருகே உள்ள கிராமத்தைச் சேர்ந்த விவசாயி நரைன் காத்வி, பிபிசியிடம் பேசுகையில், “நவீனமாக்கலை நாங்கள் எதிர்க்கவில்லை. இது நாட்டின் வளர்ச்சிக்கு உதவுவதோடு புதிய வேலைவாய்ப்புகளையும் உருவாக்கும். ஆனால், உள்ளூர் மக்களின் வாழ்வாதாரத்தை அழித்து இவற்றை செயல்படுத்தக் கூடாது. சுற்றுச்சூழலும், உள்ளூர் மீனவர்களின் வாழ்வாதாரமும் எந்த வகையிலும் பாதிக்கப்படக் கூடாது என்பதை உறுதிப்படுத்த வேண்டும்,” என்றார்.)

இந்த குற்றச்சாட்டுகள் குறித்து விளக்கம் பெற இமெயில் வாயிலாக அதானி குழுமத்தை தொடர்பு கொண்டோம். ஆனால், இதுவரை எந்த பதிலும் கிடைக்கவில்லை.

விமான நிலையங்களை நிர்வகித்த அனுபவமே இல்லாத அதானி குழுமம், 2019-ம் ஆண்டு ஏலத்தில் 6 விமான நிலையங்களை மேம்படுத்தவும், நிர்வகிக்கவும் உரிமம் பெற்றது பலரது புருவங்களையும் உயரச் செய்தது. அதானி குழுமத்திற்கு சாதகமாக விதிகள் வளைக்கப்படுவதாக மீண்டும் குற்றச்சாட்டுகள் எழுந்தன. ஆமதாபாத், லக்னோ, மங்களூரு, ஜெய்ப்பூர், கவுகாத்தி மற்றும் திருவனந்தபுரம் ஆகிய 6 விமான நிலையங்களை நிர்வகிக்கும் உரிமத்தை அதானி குழுமம் வென்றது.

இதன் மூலம் ஜி.எம்.ஆர்., ஜி.வி.கே. ஆகிய நிறுவனங்களுக்கு அடுத்தபடியாக,
விமான நிலையங்களை நிர்வகிக்கும் மூன்றாவது பெரிய நிறுவனமாக அதானி குழுமம் உருவெடுத்தது. அதைத் தொடர்ந்து மும்பை சர்வதேச விமான நிலைய நிர்வாகப் பொறுப்பை ஜி.வி.கே. நிறுவனத்திடம் இருந்து வாங்கியதும், இந்தியாவின் 25% விமானப் பயணிகளை கையாளும் பொறுப்பு அதானி குழுமத்தின் வசம் வந்தது. அத்துடன், இந்தியாவின் 33% சரக்குப் போக்குவரத்தும் அதானி குழுமத்தின் கட்டுப்பாட்டில் உள்ளன.

ஒரே நிறுவனத்திடம் 2 விமான நிலையங்களுக்கும் கூடுதலாக ஒப்படைக்கக் கூடாது என்ற இந்திய நிதி அமைச்சகம் மற்றும் நிதி ஆயோக்கின் ஆட்சேபனைகள் புறந்தள்ளப்பட்டதாக ஊடகச் செய்திகள் கூறுகின்றன. குற்றச்சாட்டுகளின் தீவிரத்தன்மையை உணர்ந்து மத்திய சிவில் விமானப் போக்குவரத்து அமைச்சகம் விளக்கம் அளிக்க வேண்டியதாயிற்று.

“அரசு துறைகளின் ஆட்சேபனைகள் கவனத்தில் கொள்ளப்படவில்லை என்ற குற்றச்சாட்டுகள் தவறானவை,” என்று அரசு வெளியிட்ட ஊடக செய்திக் குறிப்பில் தெரிவிக்கப்பட்டிருந்தது. “அதுகுறித்து ஆய்வு செய்ய அமைக்கப்பட்ட குழு, ஒரே நிறுவனம் எத்தனை விமான நிலையங்களுக்கும் விண்ணப்பிக்கலாம், அவற்றிற்கு எத்தனை வழங்கலாம் என்பதற்கு உச்சவரம்பு நிர்ணயிக்க தேவையில்லை என்று அறிக்கை தந்ததாக அரசு செய்திக்குறிப்பில் கூறப்பட்டிருந்தது. ஏனெனில், ஏலத்தில் இருந்த 6 விமான நிலையங்களுமே சிறியவை; நாட்டின் ஒட்டுமொத்த விமானப் பயணிகளில் 9.5 சதவீதத்தை மட்டுமே கையாளக் கூடியவை.”

ஏலத்தில் போட்டியை அதிகரிக்கவும், விமான நிலைய நிர்வாகத்தை ஏகபோகத்தை தடுக்கவும் முந்தைய அனுபவம் தேவையில்லை என்று அந்தக் குழு தீர்மானித்ததாக சிவில் விமான போக்குவரத்து அமைச்சகம் கூறுகிறது.

6 விமான நிலையங்களுக்கான ஏல நடைமுறை குறித்த விவரங்களை கேட்டு தகவல் அறியும் உரிமைச் சட்டத்தின் கீழ் பிபிசி விண்ணப்பித்தது. அதற்கு விமான நிலைய கட்டுப்பாட்டு ஆணையம் அளித்த ஆவணங்களின்படி, 6 விமான நிலையங்களுக்கான ஏலத்திலும் மற்ற நிறுவனங்களைக் காட்டிலும் அதானி குழுமம் அதிக தொகையை குறிப்பிட்டுள்ளது. ஆர்.டி.ஐ. மூலம் பெறப்பட்ட தரவுகளை ஆய்வு செய்கையில், 6 விமான நிலையங்களுக்கான ஏலத்தில் அதானி என்டர்பிரைசஸ் நிறுவனம் விமான நிலையத்திற்கு வரும் ஒரு பயனருக்கான நிர்வாகச் செலவாக ரூ.115 முதல் ரூ.177 வரை குறிப்பிட்டு, உரிமத்தை வென்றுள்ளது.

மற்ற நிறுவனங்களைக் காட்டிலும் அதானி நிறுவனம் அதிக தொகையை குறிப்பிட்டிருந்தாலும், அனுபவம் கட்டாயம் என்ற விதி நீக்கப்படாமல் இருந்திருந்தால், இந்த ஏலத்தில் கொச்சி இன்டர்நேஷனல் ஏர்போர்ட் நிறுவனம், ஜி.எம்.ஆர். ஏர்போர்ட் நிறுவனம் ஆகியவை கடும் சவாலை அளித்திருக்கும்.

இந்திய அரசுக்கு பகுதியளவு சொந்தமான, தேசிய முதலீடு மற்றும் உள் கட்டமைப்பு நிதி(NIIF) நிறுவனமும் குவாஹத்தி, ஆமதாபாத், ஜெய்ப்பூர் ஆகிய விமான நிலையங்களின் நிர்வாக உரிமையைப் பெற ஆர்வம் காட்டியது. அதன் இணையதளத்தில், அனைத்து வகையான உள்கட்டமைப்பு திட்டங்களிலும் முதலீடு செய்ய பரிந்துரைக்கப்பட்டிருந்தது. ஏலத்தில் NIIF குறிப்பிட்டிருந்த தொகையை முழுமையாக ஆராய்ந்த போது, அதற்கும், அதானி எண்டர்பிரைசஸ் குறிப்பிட்ட தொகைக்கும் இடையே வெறும் 5 ரூபாய் முதல் 31 ரூபாய் வரையிலுமே வித்தியாசம் இருந்தது.

உலகின் இரண்டாவது பெரும் செல்வந்தராக போர்ப்ஸ் இதழால் அறிவிக்கப்பட்டதால் உலக அளவில் அறியப்படும் நபராக கெளதம் அதானி உருவெடுத்தார். அதானி குறித்தும், அவரது வர்த்தக சாம்ராஜ்யம் குறித்தும் அறிந்து கொள்ள சர்வதேச ஊடகங்கள் முற்பட்டன.

புதிரான தொழிலதிபராக திகழும் அதானி மீதான ஆர்வத்திற்கு அது மட்டுமே காரணம் அல்ல. கொரோனா பேரிடர் காலத்தில் லட்சக்கணக்கானோர் வறுமையின் பிடியில் சிக்கிய போது அதானியின் சொத்து மதிப்பு மட்டும் அசுர வளர்ச்சி பெற்றது எப்படி? என்ற மர்மமே இதற்கு நடுநாயகமாக திகழ்ந்தது.

70 நாடுகளில் ஊடுருவி 100 இடங்களில் தடம்பதித்து பரந்து விரிந்துள்ள சாம்ராஜ்ஜியத்தை கொண்டுள்ள இந்த மனிதரைப் பற்றி முழுமையாக அறிந்து கொள்வதற்கான உண்மையான முயற்சியாக இது அமைந்தது.
ஆகவே, நாம் பயன்படுத்தும் ஆற்றலில் இருந்து துறைமுகங்கள், விமான நிலையங்கள் வரை தடம் பதித்துள்ள அதானி யார்? வெற்றிக்கான தாரக மந்திரமாக ஏதேனும் வர்த்தக சித்தாந்தத்தை கொண்டுள்ளாரா? அல்லது 1970களில் வைரத்தை தேடும் சாதாரண நபராக இருந்த அவரை இன்று முகேஷ் அம்பானியுடன் இணைந்து இந்தியாவின் பொருளாதாரத்தை தீர்மானிக்கும் முக்கிய சக்தியாக ஒன்றாக வளர்த்தெடுத்த அந்த வர்த்தக மாதிரி எது?

60 வயதான கெளதம் அதானி இதுவரை சில ஊடக நேர்காணல்களை மட்டுமே அளித்துள்ளார். பொதுவெளியில் அவர் பேசியதும் குறைவே. கார்ப்பரேட் உலகின் பளபளப்பு மற்றும் கவர்ச்சியில் இருந்து அவர் விலகியே இருக்கிறார். சுய பரப்புரைகளையும், விளம்பரங்களையும் அவர் தவிர்த்து விடுகிறார். அதானியிடம் நேர்காணல் கேட்ட போது, அடுத்த சில மாதங்களுக்கு நேரம் இல்லை என்று அவர் தரப்பில் பதில் தரப்பட்டது. அவரது கார்ப்பரேட் தகவல் தொடர்புப் பிரிவின் வாயிலாகவே அவரை தொடர்பு கொள்ள முடிகிறது. அவருக்கு பாதுகாப்பு அரணாக திகழும் இந்த பிரிவு, பெரும் தொழிலதிபர்களுக்கு மிகவும் தேவையான ஒன்று.

ஆரம்ப அறிகுறிகள்

அதானி குடும்பம் குஜராத்தில் இருந்த போதில் இருந்தே, அந்த சந்தையில் மொத்த விலை துணிக்கடையை தினேஷ் வோரா நடத்தி வருகிறார். கெளதம் அதானியின் மனைவி ப்ரீத்தி அதானி தனது உறவினர் என்பது பெருமை தருவதாக அவர் கூறுகிறார். அந்த நேரத்தில் தலைசிறந்த தொழிலதிபராக உருவெடுப்பதற்கான எந்தவொரு அசாதாரண திறமைகளையும் அதானி வெளிப்படுத்தவில்லை என்கிறார் அவர்.

அதானி குடும்பத்தினரைப் பார்க்க தினேஷ் வோரா செல்வது தற்போது அரிதாகி விட்டது. “அங்கே நாங்கள் செல்வது குறைந்துவிட்டது. திருமண விழாக்கள் மற்றும் குடும்பத்தினர் கூடும் நிகழ்வுகளில் பங்கேற்க மட்டுமே நாங்கள் செல்கிறோம். இதற்கு, நாங்கள் விரும்பும் போதெல்லாம் அங்கே செல்ல முடியாது என்று அர்த்தமல்ல. முக்கிய காரணம் ஏதுமில்லாமல் அங்கே சென்று வந்து அவர்களின் நேரத்தை வீணடிக்கக் கூடாது என்று எண்ணுகிறோம்.”

அதானியைப் போலவே, பெரும்பாலான அவரது நண்பர்களும் அகமதாபாத்தில் தான் தொடர்ந்து வசிக்கின்றனர். லச்சு பாய் என்று பரவலாக அறியப்படும் லட்சுமணன் சவுத்ரிதான் கெளதம் அதானியின் பழைய நண்பர் ஆவார். அவருடனான சந்திப்பின் போது, “1982 முதல் கடந்த 40 ஆண்டுகளாக அதானியைத் தெரியும்” என்று பெருமையுடன் கூறினார்.

அதானியின் பதின்ம வயதில் பெரும் தொழிலதிபராக உருவெடுப்பதற்கான அறிகுறிகளை அவர் கண்டாரா?. “ஆரம்பத்தில் இருந்தே பெரிய மனிதர்களுடன் நல்ல தொடர்பை உருவாக்க வேண்டும் என்று அவர் எண்ணினார். வேலையில் முழு அர்ப்பணிப்புடன் ஈடுபடுவதில் அவரைப் போல  வேறு யாரையும் பார்த்ததில்லை,” என்கிறார் கிண்டலாக.

வர்த்தகத்திலும், வாழ்க்கையிலும் பெரும் வாய்ப்புகளைத் தேடி அவர் மும்பைக்கு இடம் பெயர்ந்தார். அங்கே அவர் வைர வியாபாரத்தில் ஈடுபட்டார். மும்பையின் ஆடம்பர பகுதியான ஓபரா ஹவுஸ் பகுதியில் உள்ள பிரசாத் சாம்பர்ஸ் என்ற பல அடுக்குமாடி கட்டடத்தில் அவர் பணிபுரிந்தார்.

பள்ளியில் கெளதம் அதானி சாதாரண மாணவர்தான். கல்வியைக் காட்டிலும் வர்த்கத்தில்தான் அவர் நாட்டம் காட்டினார். ஆகவே, கல்லூரில் முதலாம் ஆண்டுக்குப் பிறகு படிப்பை பாதியில் நிறுத்திவிட்டார்.

அதன் பிறகாவது, உலகின் பெரும் செல்வந்தர்கள் வரிசையில் இடம் பிடிப்பதற்கான அறிகுறிகள் தென்பட்டனவா? பணம் சம்பாதிப்பதற்கான மறைமுக திறமைகள் அவரிடம் இருந்தனவா?

“மற்ற குழந்தைகளைப் போல சாதாரண ஒருவராகவே அவரும் இருந்தார். ஆனால், படைப்பாற்றல் கொண்ட குழந்தை போல அதீத ஆற்றல் கொண்டவராக இருந்தார். என் புத்தகத்தில் ஒரு அத்தியாயத்தில் இடம் பெறும் “டூஃபானி”  என்ற பெயரைச் சொல்லியே அவரை அழைப்பேன். அதானியின்  சகோதரரையும், அவர் மனைவியையும் காண்கையில், அதானி எப்போதும் ஆற்றல் நிறைந்த தைரியமான குழந்தையாக இருந்ததாக அவர்கள் கூறினர்,” என்கிறார் பாஸ்கர்.

அதானி ஒருமுகமாக வர்த்தகத்தில் மட்டுமே கவனம் செலுத்தும் ஒருவராக தோன்றினார். பாஸ்கர் மேலும் தொடர்கையில், “அதானி பதின்ம வயதில் மற்றவர்களிடம் இருந்து வித்தியாசமானவராக இருந்தார். சினிமா இதழ்களையோ, விளையாட்டு தொடர்பான புத்தகங்களையோ அவர் தேடியதில்லை. மாறாக அறிவியல் தொடர்பான இதழ்களையே அவர் நாடினார். ஒவ்வொன்றும் எப்படி வேலை செய்கின்றன? எது அவற்றை செயல்பட வைக்கிறது? என்று கேள்வி எழுப்பும் மனதை அவர் கொண்டிருந்தார்.”

நிறுவனங்கள் வாங்கியிருக்கும் கடன் ஆராயும் 'கிரெடிட் சைட்ஸ்' என்ற நிறு என்ற ஆராய்ச்சி நிறுவனம் ஆகஸ்ட் மாதம் ஒரு அறிக்கையை வெளியிட்டது. அதில் அதானி குழுமம் அதிகப்படியான கடன் வாங்கியிருப்பதாக தெரிவித்திருந்தது. அதே போல் வேறு பல அபாயகரமான தேர்வுகளையும் செய்திருப்பதாகக் கூறியிருந்தது. இது அதானி குழுமத்தின் பல நிறுவனங்களின் பங்குச் சந்தை மதிப்பை கீழே இறக்கியது என்றும் அதில் தெரிவிக்கப்பட்டிருந்தது. அதானி குழுமத்தின் நிறுவனங்கள் தொலைதொடர்பு, சிமெண்ட் மற்றும் நீண்டகால உட்கட்டமைப்பு திட்டங்களில் புதிய முதலீடுகளை செய்து கொண்டிருந்த ஒரு காலத்தில் இத்தகைய அறிக்கை வெளியானது. 

இந்த அறிக்கை இந்த அறிக்கையின்படி அதானி குழுமத்தின் நிறுவனங்கள் வாங்கியிருக்கும் கடன் அந்த குழுமத்தை மிகப்பெரிய ஆபத்தில் தள்ளும் வாய்ப்பிருப்பதாக கூறியிருந்தது. ஆனால் அதானி குழுமம் இந்த அறிக்கையை மறுத்தது. தாங்கள் தொடர்ந்து கடன்களை அடைத்து வருவதாகவும், கடந்த 9 வருடங்களில் தங்கள் கடன் விகிதம் 7.6 மடங்கிலிருந்து 3.2 மடங்காக குறைந்திருப்பதாக கூறியிருந்தனர்.

மார்ச் 2022-ல் அதானி குழுமத்தின் மொத்த கடன் 1.88 லட்சம் கோடி ரூபாயாக இருந்தது. 2015-16 ஆம் ஆண்டில் அதானி குழும நிறுவனங்களின் மொத்த கடனில் 55% பொதுத்துறை வங்கிகளிடமிருந்து பெறப்பட்டது. 2021-22 அதுவே 21 சதவீதமாக இருந்தது.

அதானியை விமர்சிப்பவர்கள் உள்பட குஜராத்தில் இருக்கும் பலரும் அதானி குழுமத்தின் அதிகப்படியான கடன்களை கண்டு வருத்தப்படுவதில்லை. குஜராத் மாநிலத்தில் தங்கள் சொந்த பணத்தை செலவு செய்து புதிய தொழில் துவங்கும் பழக்கமில்லை என்று மூத்த பத்திரிக்கையாளர் திலீப் பாடில் கூறுகிறார். 

அதானியின் கடன்களைப் பற்றிநாம் கவலைப்பட வேண்டியதில்லை என்று கிரீஷ் பாய் கூறுகிறார். "அவர் கடனை அடைக்காமல் இருந்ததே இல்லை. அவரது பங்குகளைப் பாருங்கள். மக்கள் அவரை நம்புவதால் அவரது பங்குகளை வாங்குகிறார்கள்," என்று கூறுகிறார்.  

கிரெடிட் சைட்ஸ் நிறுவன அறிக்கை அதானி குழுமத்தில் இருக்கும் வேறு ஒரு குறையையும் சுட்டிக்காட்டி அது கவலை கவலையளிக்கக்கூடிய விஷயம் என்று தெரிவித்திருந்தது. கௌதம் அதானி இல்லாத சமயத்தில் குழுமத்தை நடத்தும் மூத்த நிர்வாகிகளின் திறன் போதுமானதாக இல்லை என்று குறிப்பிட்டிருந்தது. அதானியின் நெருங்கிய நண்பர்களே கூட அதானி குழுமம் ஒரு தனி நபரால் நடத்தப்படுவதாக தெரிவிக்கின்றனர். கௌதம் பாய் கூறுகிறார்: "இது ஒரு தனிமனிதனால் நடத்தப்படுகிறது. அவர் மட்டுமே முதலாளி. அவர் அறியாமல் அங்கு எதுவுமே நகராது. ஆனால் எத்தனை பெரிய பொறுப்புகள் இருந்தும் அவர் எப்போதும் அமைதியானவராகவே காட்சியளிக்கிறார்."

பிபிசி செய்தியாளர்கள்: ஜூபைர் அகமது மற்றும் அர்ஜுன் பர்மர்
ஷார்ட்ஹேண்ட் தயாரிப்பு: ஷதாப் நஸ்மி
ஓவியங்கள்: புனீத்குமார் பர்னாலா
படங்கள்: Getty
பிரசுரிக்கப்பட்ட தேதி: 22 டிசம்பர் 2022