Tanzania yafanya majaribio ya Treni ya kisasa ya umeme
Baada ya danadana ya muda mrefu hatimaye, Shirika la reli Tanzania (TRC) limefanya jaribio la kwanza la kubeba abiria kwenye treni ya kisasa ya abiria inayotumia umeme (SGR) kutoka Dar es salaam kwenda Morogoro.
Moja kwa moja
Ambia Hirsi, Yusuf Jumah, Dinah Gahamanyi and Lizzy Masinga
Marekani yaanza mazoezi yake makubwa zaidi ya kijeshi Afrika Mashariki
Chanzo cha picha, AFP
Mazoezi ya kijeshi yanayoongozwa na Marekani kwa jina "Justified Accord" yanaanza nchini Kenya Jumatatu, huku zaidi ya mataifa 20 yakishiriki katika tukio ambalo limetajwa kuwa kubwa zaidi la aina yake katika Afrika Mashariki.
Zoezi hilo la siku 11, ambalo litakamilika Alhamisi ijayo, linalenga kuongeza utayari wa nchi shiriki kwa misheni za kulinda amani, kukabiliana na janga na usaidizi wa kibinadamu, kulingana na shirika la utangazaji la serikali la SNTV na vyombo vya habari vya Kenya.
Makumi ya makomando wa Kisomali waliofunzwa na Marekani watashiriki katika zoezi hilo, ambalo tovuti ya habari ya binafsi ya Kenyans.co.ke ilisema italeta pamoja wafanyakazi 1,000 na vitengo kutoka mataifa 23.
Jeshi la Marekani lilisema Justified Accord ndio "zoezi lake kubwa zaidi katika Afrika Mashariki". "Justified Accord inaonesha hamu ya Marekani na mataifa washirika kuongeza utayari na ushirikiano kwa usalama wa kikanda na kukabiliana na mgogoro," jeshi lilisema.
Marekani imeongoza mazoezi kama hayo katika Afrika Mashariki katika miaka ya hivi karibuni huku eneo hilo likikabiliana na uasi mbaya wa al-Shabab na changamoto nyingine za kiusalama.
Tazama: Treni ya India iliyokimbia bila dereva kwa kasi ikipipita kwenye kituo
Maelezo ya video, Treni ya India iliyokimbia inapita kwa kasi kituo bila dereva Kanda za video zinaonyesha treni ya mizigo bila dereva ndani ya ndege ikipita kwa kasi katika kituo cha kaskazini mwa India.
Shirika la Reli la India limeamuru uchunguzi ufanyike baada ya treni hiyo isiyo na dereva, iliyokuwa ikielekea Punjab kutoka Jammu, kusafiri zaidi ya kilomita 70 (maili 43.4).
Maafisa wanasema ilianza kuteremka baada ya dereva na msaidizi wake kushuka kwa ajili ya kubadilisha wafanyakazi.
Treni hiyo ya mabehewa 53, iliyokuwa imebeba mawe, ilitembea kwa kasi ya karibu kilomita 100/kwa saa na iliweza kuvuka takriban stesheni tano kabla ya kusimamishwa.
"Treni ilisimamishwa baada ya afisa wa reli kuweka mbao kwenye reli ili kuisimamisha ," maafisa waliambia shirika la habari la Press Trust of India (PTI).
Habari za hivi punde, Mwanajeshi wa jeshi la anga la Marekani afariki baada ya kujichoma moto katika ubalozi wa Israel
Mwanajeshi wa Jeshi la Wanahewa la Marekani afariki baada ya kujichoma moto mbele ya ubalozi wa Israel mjini Washington DC.
Mwanamume huyo alitambuliwa na polisi kama Aaron Bushnell, 25, wa San Antonio, Texas.
Maafisa kutoka Idara ya Ujasusi ya Marekani walizima moto huo kabla ya mwanamume huyo kupelekwa hospitalini Jumapili mchana akiwa na majeraha mabaya.
Kabla ya kujichoma moto, alisema "hatashiriki tena katika mauaji ya kimbari".
Katika video ambayo ilipeperushwa moja kwa moja kwenye Twitch, mwanamume huyo alijitambulisha na kusema alikuwa mtumishi wa Jeshi la anga.
Kabla ya kujichoma moto, alisema "hatahusika tena na mauaji ya halaiki" na alisikika akipiga kelele "Palestine Huru" huku akijiteketeza.
Polisi mjini Washington, DC ilisema kuwa "hawakuwa wakithibitisha ukweli kuhusu video".
Norwegian Dawn: Mauritius yazuia meli kutokana na hofu ya kipindupindu
Chanzo cha picha, Getty Images
Maelezo ya picha, Baadhi ya abiria waliugua wakati wa safari ya kuelekea Afrika Kusini Mauritius imeinyima meli ya Norway kibali cha kutia nanga katika mji mkuu wa Port Louis kutokana na hofu ya uwezekano wa kuzuka kwa kipindupindu ndani ya meli hiyo.
Takriban watu 15 kwenye meli hiyo inayojulikana kama Norwegian Dawn wametengwa kwa sababu ya ugonjwa unaoshukiwa.
Mamlaka ya Mauritius ilisema uamuzi wa kuzuia meli hiyo "ulichukuliwa ili kuepusha hatari zozote za kiafya".
Sampuli zilichukuliwa kwa vipimo siku ya Jumapili, na matokeo yanatarajiwa kujulikana Jumanne.
Abiria walipata dalili kidogo za ugonjwa wa tumbo wakati wa safari ya Afrika Kusini, mwakilishi wa Norwegian Cruise Line Holdings alisema.
Mary Francovilla Dees, 69, abiria anayesafiri katika Norway Dawn aliambia BBC kwamba licha ya kuchelewa hali ya anga kwenye meli imekuwa "tulivu kiasi".
"Abiria ndani ya meli hii wameonekana kuchukua hatua hii," alisema.
Bi Francovilla anasema abiria wamejiburudisha kwa kuketi kando ya bwawa, kuhudhuria maonyesho na kwenda kwenye baa za ndani ya meli hiyo.
Kumekuwa na milipuko ya kipindupindu kusini mwa Afrika katika miezi michache iliyopita, huku Zambia ikiwa imeathirika zaidi.
Tangu Januari 2023, takriban watu 188,000 wameambukizwa kipindupindu katika nchi saba za kusini mwa Afrika, kulingana na Umoja wa Mataifa. Zaidi ya watu 3,000 wamefariki.
"Afya na usalama wa abiria pamoja na ile ya nchi kwa ujumla ni ya juu kabisa kwa mamlaka," Mamlaka ya Bandari ya Mauritius ilisema.
Meli hiyo ilifika Mauritius Jumamosi jioni baada ya kuwasili siku moja mapema kwasababu haikusimama katika Kisiwa cha Réunion.
Kuna abiria 2,184 na wahudumu 1,026 kwenye meli.
Watu wapatao 2,000 walipanga kushuka Port Louis, huku wengine 2,000 wakitarajiwa kuabiri kwa wakati mmoja.
Sala ya kuomba mume wa binti wa rais yaibua mjadala miongoni mwa Wakenya
Chanzo cha picha, Charlene Ruto
Ombi kwa Mungu ampe mume Charlene Ruto, binti rais wa Kenya, limezua hisia nyingi za maoni kwenye mtandao nchini humo.
Bi Charlene Ruto alikuwa miongoni mwa maelfu ya watu waliohudhuria maombi ya misa ya mhubiri wa Marekani Benny Hinn mwishoni mwa juma katika jiji kuu la Nairobi.
Rais William Ruto na mke wa rais, pamoja na Naibu Rais Rigathi Gachagua na mkewe, Dorcas, pia walihudhuria.
Wakati mhubiri akiomba wale waliokuwa na maombi wajitokeze, binti wa rais aliinuka, akitafuta maombi kwa ajili ya wito aliosema anao kwa ajili ya vijana.
Mhubiri huyo alimwombea na baadaye akauliza ikiwa kulikuwa na maombi yoyote maalum.Alinong'ona sikioni mwake kabla ya kuendelea kuomba:
“Mpe mume ambaye atatimiza wito huo naye.Bwana mpeleke kijana huyo njia yake, hiyo itakuwa nguvu kwake, msaidizi mkuu,” Benny Hinn aliomba.
"Hawezi kufanya hivi peke yake, Bwana, anaenda kwenye uwanja wa vita ili kushinda roho ... anahitaji mume hivi karibuni."
Ombi hili la kumuombea mume lilifanya Wakenya wazungumze - wengine wakimkosoa, wengine wakituma posa zao za ndoa kwake, huku wengine wakimdhihaki.
“Jina langu ni Omwamba, mtafutaji na ninamewasiliana nawe baada ya kushuhudia ombi lako la dhati la mume wakati wa maombi yako na Mchungaji Benny Hinn.
"Nilivutiwa na uaminifu wako na imani uliyoonyesha jana na Mungu amenituma kwa njia yako,"Mkenya mmoja aliandika kwenye X.zamani Twitter.
Wengine wameunga mkono: “Hakuna kosa kwa Charlene Ruto kumwomba Benny Hinn amwombee ili apate mume mwema. Ndoa ni takatifu,”Mkenya mwingine alisema.
Tanzania yafanya majaribio ya Treni ya kisasa ya umeme,
Chanzo cha picha, IKULU TANZANIA
Baada ya danadana ya muda mrefu hatimaye, Shirika la reli Tanzania (TRC) limefanya jaribio la kwanza la kubeba abiria kwenye treni ya kisasa ya abiria inayotumia umeme (SGR) kutoka Dar es salaam kwenda Morogoro.
Hapo awali serikali iliahirisha zaidi ya mara tatu kuanza rasmi kufanya kazi kwa treni hiyo bila mafanikio jambo ambalo liliibua mjadala kwa wananchi huku serikali ikitoa sababu mbalimbali zinazokwamisha ikiwepo kuchelewa kwa vichwa vya treni na mabehewa.
Ujenzi wa reli hii ya kisasa kwa awamu ya kwanza kati ya Dar es salaam - Morogoro (Km 300), ulizinduliwa na Rais wa awamu ya tano, John Pombe Magufuli mwaka 2017.
Chanzo cha picha, IKULU TANZANIA
Ilielezwa ujenzi wa mradi huu ungekamilika ndani ya miezi 30 mpaka kufikia Novemba 2019, haikuwezekana.
Akiongea na waandishi wa habari Mkurugenzi wa shirika la reli Tanzania Masanja Kadogosa safari za Treni hiyo zitaanza rasmi Mwisho wa mwezi wa saba huku akitoa hofu wananchi changamoto za kukatika umeme na uendeshaji wa treni hiyo.
“Watanzania wasiwe na wasiwasi wowote kuwa treni inaweza kuzimika katikati niwahakikishie hilo haliwezi kutokea sisi tuna njia maalumu ya umeme kwaajili ya reli tu haiingiliani na mtu yeyote na imetoka kwenye gridi ya taifa kwamba umeme ukikatika hapa nchi nzima hakuna ambaye ana umeme’’
Kipande cha ujenzi cha awamu ya kwanza kutoka Dar es Salaam mpaka Morogoro kimegharimu zaidi ya dola bilioni 1.92.
Mwanamke wa Pakistani aliyevalia nguo yenye maandishi ya Kiarabu aokolewa baada ya kuvamiwa na kundi la watu wanaodai amekufuru
Chanzo cha picha, SHALIK RIYADH/INSTAGRAM
Maelezo ya picha, Nguo hiyo ina neno "Halwa" lililochapishwa kwa herufi za Kiarabu juu yake, likimaanisha tamu kwa Kiarabu Umati wenye hasira nchini Pakistan ulimtuhumu mwanamke aliyevalia vazi lililopambwa kwa maandishi ya Kiarabu kwa kukufuru, baada ya kuwakosea kwa aya za Quran.
Aliokolewa na polisi waliomsindikiza hadi mahali salama baada ya mamia kukusanyika.Baadaye aliomba msamaha kwa umma.
Nguo hiyo ina neno "Halwa" lililochapishwa kwa herufi za Kiarabu juu yake, likimaanisha tamu kwa Kiarabu.
Kukufuru kunaadhibiwa na kifo nchini Pakistan. Baadhi ya watu wamehukumiwa hata kabla ya kesi zao kuanza kusikilizwa.
Polisi waliambia BBC kwamba walipokea simu kwa mara ya kwanza mwendo wa saa saba unusu kwa saa za eneo (08:10 GMT) siku ya Jumapili kwamba umati ulikuwa umemzunguka mwanamke katika mgahawa huko Lahore, mji mkuu wa jimbo la Pakistani la Punjab.
Takriban watu 300 walikuwa wamejazana nje ya mgahawa huo walipofika, alisema Mratibu Msaidizi Syeda Shehrbano.
Video za tukio hilo zilisambaa kwenye mitandao ya kijamii, huku moja ikimuonyesha mwanamke, akionekana kuwa na hofu, akiwa ameketi pembeni kabisa ya mgahawa huo, akiukinga uso wake kwa mkono wake.
Katika video nyingine alionekana amezungukwa na maafisa, ambao walikuwa wameweka kizuizi pekee kati yake na umati uliokua ukiongezeka na walikuwa wakipiga kelele wakimtaka avue shati.
Katika baadhi ya video, watu wanaweza kusikika wakiimba kwamba wale wanaokufuru lazima wakatwe vichwa.
Mwanaume aliyevunja rekodi ya Guinness kwa kuishi muda mrefu na moyo uliopandikizwa
Chanzo cha picha, PA MEDIA
Bert Janssen mwenye umri wa miaka 57 kutoka Uholanzi amesajiliwa katika Kitabu cha rekodi cha Guinness kama mtu aliyeishi kwa muda mrefu zaidi na upandikizaji wa moyo. Alibadilisha moyo wake miaka arobaini iliyopita.
Akiwa na umri wa miaka kumi na saba, Janssen aligunduliwa kuwa na ugonjwa wa moyo, ugonjwa unaoathiri uwezo wa moyo wa kusambaza damu.
Madaktari walisema kwamba kupandikiza moyo ni muhimu ili kuondokana na hili. Lakini wakati huo, shughuli hizo ngumu hazikufanywa nchini Uholanzi.
Kisha daktari wa Janssen alimpa rufaa ili aende katika Hospitali ya Harefield, kumuona mtaalamu wa magonjwa ya moyo huko London.
Kazi hii ilichukuliwa na Magdy Yacoub, daktari bingwa wa upasuaji wa Uingereza mwenye asili ya Misri, ambaye baadaye alipata shahada maalum kwa mchango wake katika tiba.
Upandikizaji ulifanyika mnamo Juni 6, 1984. Wiki moja baadaye, Janssen mwenye umri wa miaka 18 alifika hospitalini.
Chanzo cha picha, PA Media
"Kila kitu kilifanyika haraka," mgonjwa anasema. - Imekuwa wiki tangu nije Harefield. Mara tu baada ya ajali ya gari huko London, mioyo miwili ya wafadhili ilipatikana kwa ajili yangu. Mmoja wao alilingana nami kiumri, na ndivyo walivyoweka."
Janssen anasema bado "anashukuru kwa zawadi ya ajabu" aliyopokea kutoka kwa wafadhili wake.
Kulingana na mgonjwa huyo, alipona haraka baada ya upasuaji na tangu wakati huo ameishi maisha kamili.
Sasa Janssen ana mke na watoto wawili.
Shirikisho la riadha Kenya lawasiliana na Cameroon kuhusu kifo cha mwanariadha
Chanzo cha picha, Getty Images
Maelezo ya picha, Mbio za Matumaini za Mlima Cameroon zinajulikana kuwa ngumu kwa sababu ya eneo lenye mwinuko wa mlima huo. Shirikisho la riadha nchini Kenya linasema kuwa linawasiliana na serikali ya Cameroon na mamlaka ya riadha baada ya mwanariadha wa Kenya kufariki katika nchi hiyo ya Afrika Magharibi.
Charles Kipkorir Kipsang alianguka na kufariki siku ya Jumamosi baada ya kuvuka mstari wa kumalizia mbio za Mbio za Matumaini za Mlima Cameroon, zilizofanyika katika mji wa Buea, mji mkuu wa eneo la Kusini Magharibi mwa Cameroon.
Kipsang, 33, alikuwa akiongoza mbio hizo lakini alisimama kwa muda karibu na mstari wa kumaliza, gavana wa eneo hilo Bernard Okalai Bilia alinukuliwa na shirika la habari la Xinhua.
Hatimaye alivuka mstari wa kumalizia, lakini alianguka na kufa muda mfupi baadaye. "Hatuwezi kusema ni nini hasa kilifanyika.Alikuwa sawa. Alikuwa sawa baada ya mbio. Tunadhani ni kitu kama mshtuko wa moyo," Bw Bilia alinukuliwa na Xinhua.
"Tutawafahamisha kuhusu hatua zinazofuata," shirikisho la riadha nchini Kenya ilichapisha kwenye X, iliyokuwa Twitter, siku ya Jumapili.
Mbio za Matumaini za Mlima Cameroon zinafanyika kila mwaka kwenye miteremko ya Mlima Cameroon.
Inajulikana kuwa ngumu kwa sababu ya mwinuko wa eneo la mlima.
Uongozi wa rais wa Malawi umefeli - Maaskofu wa Kikatoliki
Chanzo cha picha, Getty Images
Maelezo ya picha, Maaskofu wa Kikatoliki nchini Malawi wanasema nchi imekuwa mbaya chini ya uongozi wa Rais Lazarus Chakwera Kanisa Katoliki lenye ushawishi mkubwa nchini Malawi limemkosoa Rais Lazarus Chakwera, likisema nchi imekuwa mbaya zaidi katika kipindi cha miaka minne ya uongozi wake.
Katika kaulinzito inayoonekana kuelekezwa kwa rais, kanisa hilo kupitia maaskofu wake lilisema "tumeshuhudia kufeli kwa uongozi".
"Raia wa Malawi hawaoni mtu yeyote katika serikali ya sasa anayewajali au ambaye anaweza kuboresha hali zao," iliongeza.
Waraka wa wachungaji wenye kurasa 16 wenye kichwa "Hadithi ya kusikitisha ya Malawi", iliyosomwa katika makanisa yote ya Kikatoliki nchini kote siku ya Jumapili, ulishutumu uongozi kwa kushindwa kwa kiasi kikubwa kutekelezwa ahadi za kampeni, upendeleo wa kindugu na ufisadi uliokithiri.
Kanisa hilo linashutumu serikali ya Bw Chakwera kwa kupendelea watu wa kabila au eneo fulani inapowateua watu kwenye nyadhifa za juu na kuwadhulumu wanahabari wanaofichua ufisadi.
Waraka huo pia ulisema serikali imeshindwa kuinua kipato cha watu hata baada thamani sarafu ya Malawi kushuka kwa kiasi kikubwa.
Mauritius yazuia meli ya Norway kwa sababu ya hatari za kiafya
Chanzo cha picha, Reuters
Maelezo ya picha, Baadhi ya abiria waliugua wakati wa safari ya kuelekea Afrika Kusini Mamlaka ya Bandari ya Mauritius (MPA) imeizuia meli ya Norway ya Norwegian Dawn kutia nanga kwenye bandari zake, ikihofia hatari za kiafya baada ya baadhi ya abiria waliokuwa ndani ya meli hiyo kupata ugonjwa wa tumbo.
"Uamuzi wa kutoruhusu meli ya watalii kuingia kwenye kituo hicho ulichukuliwa ili kuepusha hatari zozote za kiafya," mamlaka ya bandari ilisema katika taarifa Jumapili.
"Afya na usalama wa abiria pamoja na ile ya nchi kwa ujumla ni ya umuhimu mkubwa kwa mamlaka."
Abiria walipata dalili za ugonjwa wa tumbo wakati wa safari ya kuelekea Afrika Kusini, mwakilishi wa Norwegian Cruise Line Holdings, kampuni inayoendesha meli hiyo, alinukuliwa akisema na shirika la habari la Reuters.
Mamlaka ya afya ya Mauritius imechukua sampuli kutoka kwa abiria 15 waliowekwa karantini na wanatarajia matokeo ya mtihani ndani ya masaa 48.
Hadi wakati huo, kupanda na kushuka kwenye meli ni marufuku.
Meli hiyo ina abiria 2,184 na wafanyakazi 1,026 kwenye meli hiyo, MPA ilisema.
Takriban abiria 2,000 walipaswa kushuka kwenye meli hiyo katika mji mkuu wa Mauritius, Port Louis, na abiria wapya 2,279 walipaswa kupanda.
Treni ya India yasafiri kilomita 70 bila dereva
Chanzo cha picha, ANI
Shirika la Reli la India limeamuru uchunguzi ufanyike baada ya treni ya mizigo kusafiri zaidi ya kilomita 70 bila madereva.
Video zilizoshirikiwa kwenye mitandao ya kijamii zilionyesha treni hiyo ikipita stesheni kadhaa kwa mwendo wa kasi.
Ripoti zinasema treni ilisafiri bila dereva kutoka Kathua huko Jammu na Kashmir hadi wilaya ya Hoshiarpur huko Punjab Jumapili.
Shirika la reli linasema treni hiyo ilisimamishwa na hakuna mtu aliyejeruhiwa.
Maafisa waliambia shirika la habari la Press Trust of India (PTI) kwamba tukio hilo lilitokea kati ya 07:25 na 09:00 saa za ndani (01:55 na 3:30 GMT) siku ya Jumapili.
Treni hiyo ya mabehewa 53, iliyobeba mawe ilikuwa ikielekea Punjab kutoka Jammu iliposimama Kathua kwa ajili ya kubadilisha wafanyakazi.
Maafisa wanasema ilianza kushuka kwenye mteremko kwenye njia za reli baada ya dereva wa treni na msaidizi wake kushuka.
Treni hiyo ilikimbia kwa kasi ya karibu 100km/h na kufanikiwa kuvuka stesheni tano kabla ya kusimamishwa.
Muda mfupi baada ya kuarifiwa kuhusu treni iliyokuwa ikisafiri, maofisa walifunga vivuko vya reli kwenye njia yake.
Msikiti mkubwa zaidi barani Afrika wazinduliwa nchini Algeria
Chanzo cha picha, Getty Images
Maelezo ya picha, Ujenzi wa msikiti huo uligharimu zaidi ya dola milioni 800. Rais wa Algeria Abdelmadjid Tebboune Jumapili alifungua rasmi Msikiti Mkuu wa Algiers, msikiti mkubwa zaidi barani Afrika.
Pia ni ya tatu kwa ukubwa duniani, baada ya misikiti katika miji mitakatifu ya Kiislamu ya Makka na Madina nchini Saudi Arabia.
Msikiti huo mkubwa umejengwa katika eneo la ukubwa wa ekari 70 na unaweza kusaliwa na hadi waumini 120,000 kwa wakati mmoja.
Pia ina mnara mrefu zaidi duniani, ambao ni mnara unaotumiwa kwa adhan- mwito wa Waislamu wa kusali.
Msikiti huo ulijengwa kwa muda wa miaka saba, na uligharimu zaidi ya dola milioni 800.
Unatarajiwa kuandaa maombi katika mwezi mtukufu wa Ramadhani, unaotarajiwa kuanza ndani ya wiki mbili zijazo.
Msikiti huo ulikuwa mradi wa Rais wa zamani Abdelaziz Bouteflika, ambaye alijiuzulu mnamo 2019 baada ya azma yake ya kuwania muhula wa tano madarakani kusababisha maandamano makubwa.
Burkina Faso: Watu 15 wauawa katika shambulio dhidi ya kanisa Katoliki
Chanzo cha picha, Getty Images
Maelezo ya picha, Makanisa yamekuwa yakilengwa nchini Burkina Faso katika miaka ya hivi majuzi. Watu 15 wameuawa na wengine wawili kujeruhiwa kufuatia shambulizi dhidi ya kanisa katoliki kaskazini mashariki mwa Burkina Faso siku ya Jumapili.
Tukio hilo lilitokea wakati wa ibada ya Jumapili katika kijiji cha Essakane katika jimbo la Oudalan - karibu na mpaka na Mali.
Maelezo machache yametolewa kuhusiana na kisa hicho.
Afisa mmoja wa kanisa hilo alidokeza kuwa watu hao wenye silaha wanashukiwa kuwa wanamgambo wa kijihadi.
Mamlaka katika mji mkuu wa nchi hiyo ya Afrika Magharibi, Ouagadougou haijatoa tamko lolote kuhusiana na shambulio hilo.
Taarifa ya mkuu wa Dayosisi ya eneo hilo, Abate Jean-Pierre Sawadogo, ilisema watu 12 waliuawa papo hapo, huku wengine watatu wakifariki hospitalini.
"Katika hali hii chungu, tunakuomba kuwaombea waliokufa kwa imani, ufueni ya haraka kwa waliojeruhiwa, na uimarishaji wa mioyo ya huzuni," ilisema taarifa hiyo.
Huo ni ukatili wa hivi punde zaidi nchini humo kuhusishwa na wapiganaji wa wenye itikadi kali.
Zaidi ya theluthi moja ya Burkina Faso kwa sasa iko chini ya udhibiti wa waasi.
Mamlaka zimekuwa zikipambana na makundi ya kijihadi yenye mafungamano na al-Qaeda na Islamic State, ambayo yamechukua maeneo makubwa ya ardhi na kuwakosesha makazi mamilioni ya watu katika eneo la Sahel.
Katika miaka mitatu iliyopita, makanisa yamekuwa yakilengwa na waumini wengi kuuawa.
Burkina Faso, ambayo inatawaliwa kijeshi, hivi karibuni ilijiondoa katika jumuiya ya kisiasa na kiuchumi ya kikanda, Ecowas, pamoja na majirani zake wa Sahel, Mali na Niger.
Walitaja ukosefu wa uungwaji mkono kutoka kwa Ecowas katika vita dhidi ya ugaidi kuwa mojawapo ya sababu za kutaka kujiondoa katika muungano huo
Nchi tatu zinazoongozwa na jeshi tayari zilikuwa zimesimamishwa kutoka kwa umoja huo, ambao umekuwa ukizitaka kurejea katika utawala wa kidemokrasia.
Mapema mwezi huu, rais wa Burkina Faso anayeungwa mkono na jeshi Ibrahim Traoré alisema kuwa wanajeshi wa Urusi wanaweza kutumwa kupambana na wanajihadi katika nchi hiyo ya Afrika Magharibi.
Mwanamume ajichoma moto nje ya ubalozi wa Israel mjini Washington DC
Chanzo cha picha, Getty Images
Mwanamume mmoja amejichoma moto mbele ya ubalozi wa Israel mjini Washington DC, huduma za dharura za Marekani zimesema.
Tukio hilo lilitokea mwendo wa saa saba mchana kwa saa za Marekani (18:00 GMT) siku ya Jumapili.
Maafisa kutoka Idara ya Usalama ya Marekani walizima moto huo kabla ya mtu huyo kupelekwa hospitalini akiwa na majeraha mabaya ya kutishia maisha, idara ya zimamoto ya jiji hilo iliripoti.
Msemaji wa Jeshi la Wanahewa la Marekani alinukuliwa baadaye na vyombo vya habari vya Marekani akisema mtu huyo alikuwa mfanyakazi wa anga.
Idara ya polisi ya Washington sasa inachunguza pamoja na Huduma ya Siri na mamlaka zingine husika.
Katika taarifa, polisi katika mji mkuu wa Marekani walisema tukio hilo lilitokea katika "Jumba la International Drive, NW, mwendo wa saa saba mchana", na kwamba maafisa walitumwa "kusaidia Huduma ya Kisiri ya Marekani baada ya mtu kujichoma moto mbele ya ubalozi katika mtaa huo".
Taarifa hiyo iliongeza kuwa "mwanaume huyo" baadaye alipelekwa hospitalini ambako alilazwa akiwa "katika hali mbaya".
Video imeibuka kwenye mitandao ya kijamii inayodaiwa kumuonyesha mwanamume huyo akipiga kelele na kusema "Palestine Huru" huku akiungua, vyombo vya habari vya Marekani vimeripoti.
Jair Bolsonaro: Rais wa zamani wa Brazil apinga tuhuma ya mapinduzi dhidi yake
Chanzo cha picha, EPA-EFE/REX/Shutterstock
Rais wa zamani wa Brazil Jair Bolsonaro amedai kuwa mwathiriwa wa mateso ya kisiasa tangu kuondoka madarakani zaidi ya mwaka mmoja uliopita.
Aliwaambia maelfu ya wafuasi wake mjini São Paulo kwamba tuhuma za mapinduzi dhidi yake ni "uongo".
Pia alitoa wito wa msamaha kwa mamia ya wafuasi wake waliopatikana na hatia kwa mashambulizi dhidi ya majengo ya umma.
Polisi wanachunguza ikiwa Bw Bolsonaro alichochea mapinduzi yaliyofeli baada ya kushindwa katika uchaguzi wa 2022.
Akihutubia mkutano wa Jumapili katika jiji kubwa zaidi la Brazil, rais huyo wa zamani mwenye umri wa miaka 68 alipuuzilia mbali madai dhidi yake na kusema yamechochewa kisiasa.
Alisema ni wakati wa kusahau yaliyopita na kuiruhusu Brazil kusonga mbele.
Pia alitumia hotuba yake kuzungumzia uchaguzi ujao wa urais mwaka wa 2026.
Bw Bolsonaro bado amezuiwa kuwania wadhifa huo kwa miaka minane kwa kuhujumu mfumo wa uchaguzi nchini Brazil na kudai uchaguzi uliopita ulikumbwa na udanganyifu, licha ya kuwa hakuna ushahidi wa kuthibitisha udanganyifu katika uchaguzi.
Twatumai hujambo.
