An Dr Urramach Aonghas Moireasdan

Available for 28 days

Salm 117: 15-16 air fonn Coleshill agus ‘s e Dòmhnall Angaidh MacMhathain a tha os cionn na seinn le taic bho choitheanalan eaglaisean Leòdhais agus na Hearadh. Salm 21: 5-6 air fonn Kilmarnock agus ‘s e Murchadh Moireasdan a tha os cionn na seinn le taic bho choitheanal Eaglais Shaor Phartaig ann an Glaschu. Anna Nic na Ceàrdaich a’ seinn an laoidh Air Geugan Seilich Chrochadh Leinn a chaidh a sgrìobhadh le Janet NicPhàil. Còisir Eaglais Naomh Barr sa Bhàgh a Tuath ann am Barraigh a’ seinn an laoidh Thighearna Thàinig Thu Chun na Linne. Leughadh: Eòin 21: 9-19 Ceann-teagaisg: Eòin 21: 15 Rugadh agus thogadh an Dr Urr Aonghas Moireasdan ann an Gleann Comhann ann an 1953 ged a chuir e seachad a' chuid as motha de làithean òige anns an Òban. B' ann do bhaile Lingreabhagh anns na Hearadh a bhuineadh athair agus a mhàthair agus tha deagh chuimhne aige fhèin air iomadach samhradh a chuir seachad ann an Ceann a Deas na Hearadh agus a bhith a' faighinn blasad air dòigh-beatha anns na h-Eileanan an Iar. Chaidh Mgr Moireasdan gu Àrd-sgoil an Òbain agus às a sin gu Oilthigh Ghlaschu far an d' fhuair e teisteanas MA ann an Laideann agus Greugais. Fhuair e teisteanas BD tro Oilthigh Lunnainn agus PhD bho Oilthigh Dhùn Èideann. Bha Mgr Moireasdan ann an ceithir paraistean thar nam bliadhnaichean bho chaidh e na mhinistear ann an 1979: an t-Òban, Dùn Èideann, Steòrnabhagh agus Eaglais Sgìre Orwell & Portmoak. Bha e cuideachd na Mhodaràtair air Eaglais na h-Alba. Tha Mgr Moireasdan pòsta aig Marion agus tha teaghlach de cheathrar aca, triùir ghillean agus aon nighean agus tha triùir oghaichean aca. Bha ùidh a-riamh aige ann a bhith a' leughadh agus a' ceannach leabhraichean agus 's iomadh turas a bhiodh a mhàthair a' trod ris na òige gun robh e air an airgead a thug i dha airson lèintean a cheannach a chosg air leabhar eile! 'S e cluas bhodhar a fhuair i agus tha e fhathast trom air a bhith a' ceannach leabhraichean. Tha ùidh mhòr aige ann a bhith a' coimhead ball-coise agus ag èisteachd ri ceòl clasaigeach cuideachd. Tha e a-nise a' fuireach ann an Dùn Èideann agus a' cur seachad tòrr ùine a' coimhead às dèidh na h-oghaichean eadar Alba is Sasainn. Tha Mgr Moireasdan agus Marion air ùine a chur seachad thar nam bliadhnaichean mu dheireadh anns a' Phortagail a' coimhead às dèidh paraiste Naomh Anndra ann an Lisbon.