TOOS, Taliye ka tirsan ciidamada Iiran oo ku hanjabay inay carqaladayn doono isu-socodka maraakiibta Gacanka iyo Badda Cas haddii ay sii socoto go'doominta badda ee Maraykanka.

Tebin toos ah

1. 13 Daqiiqadood ka horWar deg deg ah, Degdeg: Israa'iil oo Safiir u soo magacawday Somaliland

   

   Israa’iil ayaa u magacawday Michael Lotem inuu noqdo safiirkeedii ugu horreeyay ee u fadhiya Jamhuuriyada iskeed ugu dhawaaqday madaxbanaanida ee Somaliland.

   Sidoo kale warbaahinta Israa’iil ee lagu magacaabo ‘Israel Nationala News’ ayaa iyana xaqiijisay magacaabista safiirka u fadhiya Somaliland.

   Sida laga soo xigtay warbaahinta Israa’iil, wasiirka arrimaha dibadda ee dalkaas Gideon Sa’ar ayaa Michael Lotem u magacaabay safiirkii ugu horreeyay ee Israa’iil u fadhin doona Somaliland. Afar bilood ka hor ayay ahayd markii ay ku dhawaaqday Israa'iil aqoonstay Somaliland.

   Telefishinka rasmiga ah ee dowladda Somaliland ayaa dhankiisa qoraal uu dhawaan baahiyay ku xaqiijiyay magacaabidda.

   Afar bilood ka hor ayay ahayd markii ay ku dhawaaqday Israa'iil aqoonstay Somaliland.

2. 49 Daqiiqadood ka horMareykanka oo Bangiyada Shiinaha uga digay inay qabtaan lacagaha Iran

   

   Xigashada Sawirka, Reuters

   Xoghayaha Maaliyadda Scott Bessent iyo Xoghayaha Warfaafinta ee Aqalka Cad Karoline ayaa la waydiiyay in hanjabaada Trump ee ah in 50% tacriifada Shiinaha ay wali miiska saaran tahay.

   Leavitt waxay sheegtay in madaxweyne Xi Jinping uu u xaqiijiyay Trump "inaysan siinin Iran" hub dagaalkan.

   Bessent wuxuu sheegay in laba bangi oo Shiinees ah ay ka heleen warqado khasnadda Mareykanka in haddii ay caddeeyaan in lacag caddaan ah Iran ay ugu jirto akoonadooda in Mareykanku uu diyaar u yahay inuu cunaqabateyn labaad saaro bangiyadaas.

   Ma uusan sheegin magacyada bangiyada helay waraaqaha.

3. Saacad ka horMareykanka ayaa sheegay in go'doominta dekeda Iran ay hadda si buuxda u dhaqan gashay

   

   Xigashada Sawirka, Reuters

   Wariye ayaa weydiiyay Xoghayaha warfaafinta ee Aqalka Cad Karoline Leavitt muddada ay socon doonto xannibaadda ciidanka badda ee Maraykanka ku hayaan dekedaha Iiraan.

   Waxay sheegtay in aysan “waligeed goyn doonin waqti cayiman oo ku hadlaya magaca madaxweynaha,” balse waxay xustay in howlgalkan hadda si buuxda loo hirgeliyay.

   Waxay intaas ku dartay in xannibaadda lagu dabaqayo maraakiibta dhammaan dalalka ee galaya ama ka baxaya dekedaha Iiraan.

4. Saacad ka horIntee dhan tahay khatarta ay wali iiraan leedahay?

   Waxaad is weydiin kartaa, haddii Maraykanku gebi ahaanba burburiyay ciidanka badda ee Iiraan sida uu sheegay Donald Trump, sidee ayay Iiraan weli ugu suurtagelin kartaa inay hanjabto maraakiibta ku sugan saddexda bad?

   Mid ka mid ah sababaha ayaa ah in Iiraan aysan u baahnayn ciidan badeed oo caadi ah si ay u hanjabto maraakiibta. Ciidanka badda ee ilaalada kacaanka, oo dhowr sano ka hor noqday awoodda ugu weyn ee badda ee Iiraan ee Gacanka Faaris, ayaa muddo dheer ku tababaranayay hawlgallo gaar ah.

   Hawlgalkaas wuxuu ku lug leeyahay cutubyo yaryar oo loo tababaray inay miinooyin ku xiraan maraakiibta ama ay ka tuuraan xeebahooda drones qiimo jaban oo si fudud loo qarin karo oo sida walxaha qarxa.

   Sabab kale ayaa ah kooxda Xuutiyiinta ee Yemen, kuwaas oo ay u badan tahay inay yihiin wakiillo xulafo la ah Iiraan, isla markaana la wadaaga dareen nacayb ah oo ay u qabaan Israa’iil iyo dalalka reer Galbeedka.

   Xaaladda ugu halista badan ee laga baqo ee saameyn karta maraakiibta caalamiga ah iyo dhaqaalaha dunida ayaa ah haddii Xuutiyiintu dib u bilaabaan weerarro ballaaran oo ay ku qaadaan marinnada maraakiibta ee mara xeebahooda, gaar ahaan qaybta ciriiriga ah ee koonfureed ee Red Sea.

   Tani waxay saameyn aad u weyn ku yeelan kartaa ku dhowaad toddobo milyan oo foosto oo shidaal ah oo Sacuudi Carabiya ay hadda ka dhoofiso dekeddeeda ku taal Yanbu.

   Sidoo kale akhri

   Waa maxay go'doominta lagu samaynayo Iran sideese uga dhaqan galaysaa marinka Hormuz?

   Sidee ayuu Marin-biyoodka Hormuz u noqday hubka ugu xoogga badan ee Iiraan?

   Kadib markii ay wadahadalladii Iran fashilmeen, su'aasha weyn waa: "maxaa xiga?"

   Hadallada Trump ma waxay sii kordhiyeen xiisadda xabbad-joojinta oo horeba u ahayd mid aad u jilicsan?

5. Saacad ka horMareykanka oo Israa'iil ka codsaday xabad-joojin dalka Lubnaan

   Hay’adda Warbaahinta Israel ayaa sheegtay in Maraykanku uu Israa’iil ka codsaday inay tixgeliso xabbad-joojin ku meel gaar ah oo ka dhacda Lubnaan, taas oo loo arko tallaabo niyad-wanaag ah oo loo muujinayo dowladda Lubnaan, iyadoo wada-hadallada u dhexeeya labada dhinac ay weli socdaan.

   Hay’addu waxay intaas ku dartay in golaha wasiirrada gudaha (inner cabinet) la filayo inay caawa ka doodaan soo jeedimahan.

   Kanaalka 12-aad ee Israel ayaa soo xigtay sarkaal Israa’iili ah oo sheegay in “go’aanka lagu joojinayo dagaalka Lubnaan weli lama gaarin.”

   Sida uu kanaalku sheegay, ciidamada Israa’iil ayaa durba bilaabay inay isu diyaariyaan inay helaan waxa lagu tilmaamay “amar joojin” oo ka imanaya heerka siyaasadeed, waxayna dedejiyeen fulinta qorshayaal militari oo laga yaabo in mar dambe la hakiyo koonfurta Lubnaan.

   Sidoo kale akhri

   Waa maxay go'doominta lagu samaynayo Iran sideese uga dhaqan galaysaa marinka Hormuz?

   Sidee ayuu Marin-biyoodka Hormuz u noqday hubka ugu xoogga badan ee Iiraan?

   Kadib markii ay wadahadalladii Iran fashilmeen, su'aasha weyn waa: "maxaa xiga?"

   Hadallada Trump ma waxay sii kordhiyeen xiisadda xabbad-joojinta oo horeba u ahayd mid aad u jilicsan?

6. 2 Saacadood ka horXog cusub oo ka soo korortay xaaladda hoggaamiyaha sare ee Iran Mojtaba Khamenei

   

   Xigashada Sawirka, Reuters

   Hoggaamiyaha cusub ee sare ee Iran, Mojtaba Khamenei, ayaa wali ka kabanaya dhaawacyo darran oo wejiga iyo lugaha ah oo ka soo gaaray weerarkii cirka ahaa ee lagu dilay aabbihii billowgii dagaalka, sida ay saddex qof oo u dhow saaxiibbadiisa gaarka ah u sheegeen wakaaladda wararka ee Reuters.

   Wejiga Khamenei ayaa ku doorsoomay weerarkii lagu qaaday xarunta hoggaamiyaha sare ee bartamaha Tehran, wuxuuna dhaawac weyn ka soo gaaray mid ama labada lugoodba, sida ay sheegeen dhammaan saddexda ilood.

   Si kastaba ha ahaatee, 56-jirkan ayaa ka kabanaya dhaawacyadiisii, maskaxdiisuna wali waa mid firfircoon, sida laga soo xigtay dadkan codsaday in aan magacyadooda la sheegin.

   Wuxuu ka qayb qaadanayaa kulamo uu la leeyahay mas'uuliyiinta sare isagoo adeegsanaya shirarka cod ahaan, wuxuuna ku lug leeyahay go'aan ka gaarista arrimaha waaweyn oo ay ka mid yihiin dagaalka iyo wada-xaajoodyada lala leeyahay Washington, sida ay sheegeen laba ka mid ah ilahaas.

   Su'aasha ku saabsan in caafimaadka Khamenei ee u oggolaanaysa inuu maamulo arrimaha dawladda ayaa timid xilli Iiraan ay ku jirto xilligii ugu xasaasisaneed muddo tobanaan sano ah, iyadoo wadahadallo nabadeed oo xasaasi ah ay Islamabad ugu soo dhammaadeen Maraykanka kuwaas oo furmay shalay.

   Halkan ka sii akhriso

7. 3 Saacadood ka horWarbaahinta Iiraan oo war ka soo saartay wadahadallada ka dib waftigii Pakistan ee gaaray Tehran

   Wakaaladda wararka ee Tasnim, oo xiriir dhow la leh ciidanka Ilaalada Kacaanka Islaamiga ah ee Iiraan (IRGC), ayaa sheegtay in Iiraan ay go'aan ka gaari doonto wareegga xiga ee wadahadallada ay la yeelanayso Maraykanka ka dib marka ay maanta kulan la qaadato wefdiga ka socda Bakistaan, iyadoo soo xiganaysa "ilo xog-ogaal ah".

   Waxay sheegeen in haddii Maraykanka iyo Israa'iil ay ku heshiiyaan xabbad-joojin lala galo dalka Lubnaan, ay taasi u noqon doonto "calaamad wanaagsan oo saameyn ku leh go'aanka Iiraan" ee ku aaddan wareegga xiga ee wadahadallada.

   Si kastaba ha ahaatee, Tasnim ayaa sidoo kale sheegtay in Maraykanka looga baahan yahay in uu raaco “qaab macquul ah oo wadahadal ah”, isla markaana uusan “caqabad ku noqon habka wada-hadalka isagoo dalabaad xad-dhaaf ah keenaya” ama jebinaya ballanqaadyadii hore ee la xiriiray xabbad-joojinta.

   Tasnim waxay sidoo kale xustay in warbaahinta Maraykanku ay sheegtay inay Washington diyaar u tahay inay bilowdo wareegga xiga ee wadahadallada, balse wefdiga Iiraan ayaa ku adkeeyay inay lagama maarmaan tahay in Maraykanku "ilaaliyo mabaadi'da gaarka ah ee looga baahan yahay bilaabista wadahadal macquul ah".

8. 3 Saacadood ka horSpain oo ansixisay qorshe farxad u ah muhaajiriinta dalkaas ku sugan

   

   Xigashada Sawirka, Getty Images

   Dowlada Spain ayaa oggolaatay qorsheyaal lagu siinayo aqoonsi 500,000 oo muhaajiriin ah oo aan sharciyeysneyn, taasoo u oggolaaneysa in si rasmi ah loogu daro shaqada.

   Ra'iisul Wasaare Pedro Sánchez ayaa go'aanka dawladdiisa ku tilmaamay mid ah "fal caddaalad ah" iyo arrin daruuri ah oo ay u baahan tahay Spain.

   Qoraal uu u diray dadka reer Spain oo uu soo dhigay baraha bulshada, Sánchez oo ah hanti-wadaag, ayaa sheegay in sharcigan guud looga golleeyahay "in lagu qiro xaqiiqada ku dhowaad nus malyuun qof oo haddaba qayb ka ah nolosheenna maalinlaha ah".

   Xisbiga mucaaradka ah ee Conservative-ka ee dalka Spain (PP) ayaa ballan-qaaday inuu isku dayi doono inuu hor istaago sharciyeyntan, iyagoo sheegay inay dhiirrigelin u tahay muhaajiriinta sharci-darrada ah, ayna keeni doonto in qaar kale oo badani yimaadaan.

   Qorshaha dawladdu wuxuu muhaajiriinta bilaa waraaqaha ah siinayaa oggolaansho degganaansho oo hal sano ah, kaas oo dib loo cusboonaysiin karo.

   Halkan ka akhriso sheekada

9. 3 Saacadood ka horWarrarkii ugu dembeeyey xaaladda marinka Hormuz iyo maraakiibta ka gudubtay ka dib go’doominta Maraykanka

   

   Tan iyo markii ay bilaabatay go'doominta Maraykanka maalintii Isniinta, 15 markab ayaa gudbay marinka Hormuz, iyadoo sagaal ka mid ah ay xiriir la leeyihiin Iiraan, sida lagu ogaaday falanqayn ay BBC Verify ku sameysay xogta dabagalka maraakiibta.

   Taliska Dhexe ee Maraykanka, Centcom ayaa sheegay in go'doomintu ay quseyso dhammaan maraakiibta galaya ama ka baxaya dekedaha Iiraan. Waxay intaas ku dareen in maraakiibta maraysa Marinka Hormuz ee ku socda ama ka imaanaya dekedaha ee aan ahayn kuwa Iiraan aan la horistaagi doonin.

   Warbixin ay Centcom soo saartay maalintii Talaadada, waxay ku sheegtay in 36-kii saac ee ugu horreeyay aysan jirin wax maraakiib ah oo ka gudbay go'doominta, isla markaana lix markab ay u hoggaansameen awaamiirta ah inay dib u laabtaan.

   Xogta dabagalka ayaa muujinaysa in lix ka mid ah maraakiibta gudubtay marinka ay horay u soo mareen deked ku taalla Iiraan.

   Ma aynaan awoodin inaan xaqiijino sheegashada Maraykanka ee ku saabsan tirada maraakiibta dib loo celiyay, balse xogta dabagalka ayaa tilmaamaysa in ugu yaraan hal markab oo donayey inuu ka gudbo marinka uu dib u laabtay.

   Markabka shidaalka ee Rich Starry, oo uu Maraykanku cunaqabateeyay, ayaa u shiraacday dhanka bari isagoo ka yimid Sharjah soona maray marinka, balse wuu soo laabtay wuxuuna dib ugu gudbay dhanka Gacanka maalintii Arbacada.

   Intaas waxaa dheer, laba markab oo laga leeyahay Iiraan ayaa la arkay iyagoo ka baxaya nawaaxiga dekedda Chabahar ee Iiraan oo ku taalla bariga Marinka Hormuz, xeebta koonfureed ee Iiraan, ka dib markii ay bilaabatay go'doominta.

10. 4 Saacadood ka horWar deg deg ah, Wafti ka socda Pakistan oo gaaray Tehran, yaase hoggaaminaya

    

    Xigashada Sawirka, Government of Iran

    Wafdi ka socda Pakistan, ah dowladii dhexdhexaadisay wadahadalladii asbuucii hore Iiran iyo Maraykanka ku dhexmaray Islamabad ayaa gaaray magaalada Tehran.

    Waxaa wafdiga ka mid ah Field Marshal Asim Munir oo uu hore Donald Trump ugu tilmaamay inuu yahay “mid uu aad u jecel yahay” iyo Wasiirka Arrimaha Gudaha Mohsin Naqvi, sida lagu sheegay war-saxaafadeed ka soo baxay ergada Pakistan ee Qaramada Midoobay.

    Mar sii horreysay, warbaahinta dowladda Iiraan ee IRIB ayaa sheegtay in wafdigu uu gudbinayo farriin ka timid Maraykanka isla markaana uu qorsheynayo wareeg labaad oo wadahadallo ah. Wareeggii koowaad ee ka dhacay Islamabad dhammaadkii usbuucii hore ma keenin heshiis.

    Dhanka kale, Ra’iisul Wasaaraha Pakistan, Muhammad Shehbaz Sharif, ayaa gaaray magaalada Jeddah ee dalka Sacuudi Carabiya, si uu “aragti uga wada hadlo xaaladda gobolka,” sida ay sheegtay xafiiskiisa.

    Dhanka kale, Ra'iisul Wasaaraha Bakistaan Muhammad Shehbaz Sharif ayaa gaaray magaalada Jeddah ee dalka Sucuudi Carabiya, si uu "isweydaarsi fikradeed ugala yeesho xaaladda gobolka," sida uu sheegay xafiiskiisa.

11. 4 Saacadood ka horSarkaal sare oo Maraykanka ah ayaa sheegay war cusub oo ku saabsan Iiraan

    Maraykanka ayaa sheegay in wadahadallo “sii socda” ay la leeyihiin Iiraan si loo sii wado dadaallada ku saabsan xabbad-joojin la xiriirta colaadda labada dhinac.

    Sarkaal sare oo ka tirsan Maraykanka ayaa u sheegay BBC in wada-hadallada ku saabsan kordhinta xabbad-joojinta laba toddobaad ah ay socdaan, iyadoo xabbad-joojinta hadda jirta ay dhammaan doonto 22-ka Abriil.

    Si kastaba ha ahaatee, Maraykanku weli si rasmi ah uma oggolaan kordhinta xabbad-joojinta.

    Sarkaalka ayaa intaas ku daray in “ay jirto xiriir iyo wada-shaqayn joogto ah” oo u dhexeeya Washington iyo Tehran si loo gaaro heshiis.

    Mar sii horreysay AFP ayaa ka soo xigatay warbaahinta dowladda Iiraan oo sheegtay in wararka ku saabsan kordhinta xabbad-joojinta aan weli la xaqiijin.

12. 5 Saacadood ka horGoorta uu Turkiga qodista shidaalka ka bilaabayo Soomaaliya oo la shaaciyay

    

    Xigashada Sawirka, Anadolu

    Turkiga ayaa qorsheynaya inuu bisha Abriil dardargeliyo hawlaha sahminta iyo qodista shidaalka ee Badda Madow iyo xeebaha Soomaaliya, isagoo adeegsanaya maraakiibtiisa tamarta ee sii kordhaya si kor loogu qaado wax soo saarka shidaalka iyo gaaska. Tobankii sano ee la soo dhaafay, dalku wuxuu dhisay koox maraakiib ah oo casri ah si uu u yareeyo ku tiirsanaanta tamarta dibadda laga keeno.

    Ololihii ugu dambeeyay wuxuu bilowday 26-kii Maarso, markaas oo markabka qodista ee Abdülhamid Han uu bilaabay ceelkii ugu horreeyay ee sanadkan ee goobta Kandıra-2 ee u dhow Kocaeli.

    Bisha Abriil, markabka Fatih ayaa la filayaa inuu ka bilaabo hawlgallada ceelka Eflani-1 ee Badda Madow, halka markabka cusub ee Çağrı Bey lagu wado inuu qodista ceelka Curad-1 ka bilaabo xeebaha Soomaaliya dhammaadka bisha.

    Wasiirkta tamarta Turkiga, Alparslan Bayraktar, ayaa sheegay in markabka shidaal qodis ka billaabi doono ceelka Curad-1 oo ku yaal meel ka baxsan xeebaha Soomaaliya.

    Halkan ka akhriso sheekLinkada

13. 6 Saacadood ka horIiraan oo war ka soo saartay arrimo ku saabsan wadahadallo kale oo dhexmara iyaga iyo Maraykanka

    

    Xigashada Sawirka, Getty Images

    Afhayeenka Wasaaradda Arrimaha Dibadda ee Iran Esmail Baghaei ayaa sheegay in is-weydaarsiga farriimaha u dhexeeya Tehran iyo Washington uu “sii socdo”, iyadoo loo marayo dhexdhexaadin Pakistani ah, kaddib markii wada-hadalladii Axaddii fashilmeen.

    Baghaei wuxuu sheegay in mowqifka Iran “si cad loo qeexay isla markaana dib loogu celceliyay xiriirradii xigay.”

    Wuxuu intaas ku daray in Iran “ay aad ugu dhowdahay” inay Iiraan maanta martigeliso wafdi ka socda Pakistan, taasoo qayb ka ah sii wadista wada-hadalladii hore uga dhacay Islamabad, kuwaas oo ay ku jiri doonaan “doodo faahfaahsan oo ku saabsan mowqifyada” Iran iyo Maraykanka.

    Baghaei wuxuu diiday sheegashooyinka Maraykanka ee ku saabsan in Iran ay raadinayso hub nukliyeer ah, wuxuuna ku adkaystay in barnaamijka nukliyeerka Iran uu yahay “mid nabadeed.”

    Dhanka kale, wuxuu sheegay in Iran “ay tahay inay sii waddo kobcinta iyadoo ku saleynaysa baahideeda,” balse “ay jirto suurtagalnimo wadahadal oo ku saabsan nooca iyo heerka kobcinta.”

    Wareeggii saddexaad ee wada-xaajoodyada nukliyeerka ee ku saabsan barnaamijka nukliyeerka Iran oo muddo dheer muran ka taagnaa ayaa dhex maray Iran iyo Maraykanka 26-kii Febraayo, laba maalmood ka hor intii uusan dagaalku bilaaban.

14. 6 Saacadood ka horCodsi Trump u diray madaxweynaha Shiinaha oo ku saabsan Iiran iyo jawaabta uu ka helay

    

    Xigashada Sawirka, EPA/Shutterstock

    Madaxweynaha Maraykanka Donald Trump ayaa sheegay in Shiinuhu oggolaaday “in uusan hub u dirin Iran”, kaddib markii uu warqad u qoray Madaxweynaha Xi Jinping isagoo ka codsaday arrintaas.

    Qoraal uu ku daabacay bartiisa Truth Social, Trump wuxuu yiri: “Shiinuhu aad buu ugu faraxsan yahay inaan si joogto ah u furayo marinka Hormuz. Waxaan u sameynayaa iyaga sidoo kale iyo dunidaba.”

    “Arrintani mar dambe ma dhici doonto. Waxay oggolaadeen inaysan hub u dirin Iran,” ayuu ku yiri qoraalkiisa.

    “Waxaan si caqli leh oo aad u wanaagsan u wada shaqeyneynaa! Taasi miyaanay ka wanaagsanayn dagaal??? LAAKIIN XUSUUSNOW, aad baan ugu fiicanahay dagaalka haddii nalagu qasbo – si ka fiican cid kasta oo kale!!!”

    Talaadadii, Shiinuhu wuxuu ku tilmaamay xanibaadda badda ee Maraykanku ku sameeyay dekedaha Iran mid “aan mas’uuliyad lahayn”, wuxuuna sheegay inay “wiiqi karto” xabbad-joojinta. Ka hor xanibaadda Maraykanka, maraakiibta Shiinaha ayaa ka mid ahaa kuwa yar ee weli mari karayay marinka Hormuz.

    Afhayeen u hadlay wasaaradda arrimaha dibadda ee Shiinaha ayaa sidoo kale shir jaraa’id ku sheegay Talaadadii in wararka sheegaya in Shiinuhu qorsheynayo inuu Iran siiyo nidaamyo cusub oo difaaca hawada ah ay yihiin “kuwa gebi ahaanba la been abuuray.”

    Macluumaad dheeraad ah: Ciidanka Maraykanka ayaa Talaadadii sheegay in wax maraakiib ah aysan marin marinka tan iyo markii xanibaadda dekedaha Iran ay dhaqan gashay Isniintii.

15. 7 Saacadood ka horTrump oo soo saaray war cusub oo ku saabsan Iiraan

    

    Xigashada Sawirka, AFP via Getty Images

    Sida aan horrey u soo gudbinay, ciidanka Iiraan ayaa ku hanjabay inay carqaladayn doonaan isu-socodka maraakiibta Gacanka, Badda Cas, iyo Gacanka Cumaan haddii ay sii socoto go'doominta dhinaca badda ee Maraykanku ku hayo dekedaha Iiraan.

    Go'doominta Maraykanka ayaa dhaqan-gashay maalintii Isniinta, warbixin la soo saaray maalintii Talaadada ayay ciidanka Maraykanku ku sheegeen inaysan jirin wax maraakiib ah oo dhex maray aaggaas 24-kii saac ee ugu horreeyay.

    Wareysi uu siiyay Fox Business, kaas oo la duubay ka hor hanjabaadaha ugu dambeeyay ee Iiraan, Madaxweynaha Maraykanka Donald Trump ayaa sheegay in Marinka Hormuz "uu furmayo" iyo in "maraakiibtuna ay dib u soo laabanayaan," isaga oo aan bixin faahfaahinta arrintaas ku saabsan.

    Markay timaaddo Iiraan, Trump wuxuu yiri "wali ma aynaan dhammaystirin," laakiin wuxuu intaas ku daray inuu u arko dagaalka mid "aad ugu dhow" inuu dhammaado, uuna rumeysan yahay in Maraykanku uu "heshiis weyn" la geli karo Iiraan.

16. 7 Saacadood ka horIiraan oo soo saartay hanjabaad culus ka dib tallaabadii Maraykanka

    Cali Cabdullaahi oo ah taliyaha Xarunta Dhexe ee Khatam al-Anbiya, oo ah taliska ugu sarreeya ee isku duba-rida hawlgallada ciidanka qalabka sida ee Iiraan ayaa sheegay in haddii Maraykanku uu sii wado go’doominta, uuna abuuro "amni-darro ku timaada maraakiibta ganacsiga iyo kuwa saliidda ee Iiraan", ay taasi noqon doonto "horudhac jebinta heshiiska xabbad-joogta ah".

    Cabdullaahi ayaa intaas ku daray in ciidanka qalabka sida ee Iiraan aysan u oggolaan doonin "in wax dhoofin ama soo dejin ahi ay ka sii socdaan Gacanka Faaris, Badda Cumaan, iyo Badda Cas."

    Ma uusan cayimin dalalka ay saameyntu ku yeelan karto, in kasta oo badaha uu xusay ay yihiin aag ballaaran.

    Xannibaadda uu Mareykanku ku sameeyay dekedaha Iran waxay bilaabatay Isniintii. Arbacadii, ciidamada Mareykanka ayaa sheegay in “aysan jirin wax maraakiib ah oo ka gudbay xannibaadda” 24-kii saac ee ugu horreeyay, iyadoo lix maraakiib ganacsi lagu qasbay inay dib uga laabtaan Badda Cummaan.

    Heshiiska xabbad-joogta ah ee u dhexeeya Maraykanka iyo Iiraan, ee uu Cabdullaahi tixraacay, ayaa lagu dhawaaqay 8-dii Abriil, ka dib ku dhowaad lix toddobaad oo uu socday iska horimaad u dhexeeyay Iiraan iyo dhinacooda Maraykanka iyo Israa’iil.

    Wareegii koowaad ee wada-xaajoodyada u dhexeeyay Iiraan iyo Maraykanka ayaa fashilmay — in kasta oo Donald Trump uu sheegay in wadahadallada Maraykanka iyo Iiraan ay dib u bilaaban karaan labada maalmood ee soo socota. Iiraan weli ma xaqiijin arrintaas.

17. 8 Saacadood ka horMuxuu ahaa codsiga Trump u diray Shiinaha ee ku saabsan Iiraan ee uu maanta sheegay?

    

    Xigashada Sawirka, EPA/Shutterstock

    Waraysiiga Trump siiyey Fox Business Network, oo qeyb hore an sii daynay ayna la yeellatay Maria Bartiromo ayuu madaxweynaha Mareykanka Donald Trump uu siiyay in haddii Iiran loo ogolaado hubka nukliyeerka, "dunidu ay qarxi doonto."

    Wuxuu intaas ku daray in marka la soo afjaro dagaalka lala galay Iran, qiimaha shidaalka uu si weyn hoos ugu dhici doono, isagoo sidoo kale sheegay in qiimaha korontaduna uu yaraandoono.

    Trump wuxuu ku tilmaamay heshiiskii nukliyeerka ee Iran ee la saxiixay sanadkii 2015 inuu ahaa “heshiiskii ugu xumaa abid la sameeyo”, wuxuuna sheegay inuu dalka siiyay “waddo gaaban” oo ay ku heli karo hub nukliyeer ah.

    Wuxuu intaas ku daray in haddii Mareykanku uusan duqeyn xarumaha nukliyeerka Iran sanadkii hore, Iran ay isticmaali lahayd hub nukliyeer ah oo ay ku weerarto Israa’iil iyo deriskeeda Bariga Dhexe, sidoo kalena Mareykanka.

    Iran mar walba waxay sheegtaa in barnaamijkeeda nukliyeer uu yahay mid gebi ahaanba nabadeed, ayna weligeed isku dayin inay horumariso hub nukliyeer ah.

    Trump wuxuu sheegay in kaddib markii uu maqlay warar sheegaya in Shiinuhu hub siinayo Iran, uu warqad u qoray Madaxweyne Xi isagoo ka codsaday inuusan sidaas sameyn.

    Xi ayaa isna warqad ugu soo jawaabay Trump, isagoo “si guud” u sheegay in Shiinuhu uusan arrintaas sameyn, ayuu Trump ku daray.

18. 9 Saacadood ka horWar deg deg ah, Mareykanka oo qaadaya tallaabo kale oo uu cadaadis ku saarayo Iiraan

    Wargeyska Washington Post ayaa maanta soo wariyay, isagoo soo xiganaya saraakiil Mareykan ah oo la wargeliyay, in Mareykanku uu kumanaan askari oo dheeraad ah u diri doono Bariga Dhexe maalmaha soo socda si loogu cadaadiyo Iiraan inay heshiis gaarto.

    Hadalkaan ayaa imaanaya iyadoo madaxweyne Trump sheegay in maalmaha soo socda ay bilaaban doonaan wajigii labaad oo ah wadahadallada Mareykanka iyo Iiraan.

19. 9 Saacadood ka horWar deg deg ah, Milatariga Israa'iil oo amarro cusub soo saaray

    

    Xigashada Sawirka, Reuters

    Ciidamada Difaaca Israa’iil ayaa soo saaray amar cusub oo ku saabsan in dadku ay ka guuraan qaybo ka mid ah koonfurta Lubnaan, halkaas oo ay sheegeen in “duqeymo cirka ah ay ka socdaan.”

    IDF waxay sheegtay inay ka howlgallayaan aagga koonfureed ee webiga Zahrani iyagoo adeegsanaya “howl gal xooggan,” isla markaana dadka ku sugan halkaas ay si degdeg ah uga baxaan oo ay u jiheystaan dhanka waqooyi.

    “Qof kasta oo ku sugan meel u dhow xubnaha Xisbullah, xarumahooda, ama gaadiidkooda dagaalka, wuxuu halis gelinayaa noloshiisa,” ayay war-saxaafadeedka ku sheegeen.

20. 15 Abriil 2026War deg deg ah, Madaxweynaha Iiraan oo hadda ka hadlay go'aanka dowladdiisa

    

    Xigashada Sawirka, Iranian Presidency handout via Getty Images

    Madaxweynaha Iran Masoud Pezeshkian ayaa sheegay in isku day kasta oo ay Mareykanka ama Israel ku doonayaan inay Iran ku qasbaan inay “isdhiibto” uu “guul-darraysan doono, isla markaana shacabka Iran aysan waligood aqbali doonin dhaqankaas.”

    Isagoo ka hadlayay kulan uu la yeeshay masuuliyiinta adeegyada gurmadka degdegga ah ee Tehran saaka, Pezeshkian wuxuu sheegay in Tehran aysan doonayn dagaal ama xasillooni-darro.

    Taa beddelkeeda, madaxweynuhu wuxuu sheegay in “Iran ay mar walba adkaysay baahida loo qabo wadahadallo wax dhisaya iyo iskaashi lala yeesho dalal kala duwan.”

    Hadalladiisa waxay imaanayaan kadib markii Donald Trump uu sheegay in wadahadallada u dhexeeya Maraykanka iyo Iran ay dib uga bilaaban karaan Pakistan “labada maalmood ee soo socda,” balse Tehran weli kama aysan hadlin arrintaas.