TOOS, Mareykanka iyo Iiraan oo ku fashilmay inay heshiis gaaraan ka dib wadahadallo nabadeed oo taariikhi ah oo ka dhacay Pakistan

Tebin toos ah

1. 45 Daqiiqadood ka hormaxaa xiga oo dhici doona- Su'aasha muhiimka ah ayaa ah?

   Iyadoo ay jirto in labada dhinacba ay u yimaadeen wada-hadalladan iyagoo mid kastaaba sheeganayo inuu dagaalka ku guuleystay, helitaanka heshiis mar walba waxay ahayd wax adag.

   Ugu dambayntii, waxay u muuqataa inay taasi noqotay wax aan macquul ahayn. Labada dhinacba waxay ka tageen goobta iyadoo midba midka kale ku eedaynayo fashilka ku yimid wada-hadallada.

   Su'aasha muhiimka ah ayaa ah - maxaa xiga oo dhici doona?

   Xabbad-joojintii la isku raacay maalintii Arbacada waxay bilaabatay xilli ay jireen hanjabaado aad u waaweyn oo ka imanayay Madaxweynaha Mareykanka, isagoo sheegay inuu baabi'in doono ilbaxnimada Iiraan. Ma jirin wax lagu dhawaaqay oo ku saabsan in weeraradii lagu hayay Iiraan ay dib u bilaaban doonaan, laakiin hubaal fursadaha ay ku bilaaban karaan ayaa kordhay.

   Marka la eego Marinka Hormuz, oo ah marin biyood muhiim ah oo Iiraan si wax ku ool ah u xannibtay furitaankiisa iyada oo loo marayo wada-hadal ayaa u muuqda mid aan suurtagal ahayn hadda. Imaanshaha laba markab oo dagaal oo Mareykan ah oo Gacanka ku sugan ayaa muujinaya in Mareykanku uu eegayo waddo kale.

   Mareykanku wuxuu sababta fashilka ku sheegay in Iiraan ay ka gaabsatay inay ballan-qaaddo inaysan waligeed yeelan doonin hubka nukliyeerka, taasoo ahayd caqabadda ugu weyn.

   Iiraan mar walba way beenisay inay doonayso hubkaas ugu awoodda badan, balse laba dagaal oo dhacay hal sano gudaheed ayaa laga yaabaa inay sii xoojisay codadka taageeraya helitaankiisa.

   Wada-hadalladan fool-ka-foolka ah ee dhex maray Mareykanka iyo Iiraan waxay ahaayeen kuwo taariikhi ah… laakiin waxaa laga yaabaa in loo xasuusto inay ahaayeen fashil ku yimid diblomaasiyadda.

2. Saacad ka horWar ka soo kordhay Israa’iil

   Ciidamada Difaaca Israa’iil (IDF) ayaa sheegay inay duqeeyeen qalab gantaallada laga soo rido oo “diyaar u ahaa in lagu rido” Israa’iil, kaas oo ku yaallay koonfurta Lubnaan.

   Bayaan lagu daabacay Telegram, IDF waxay sheegtay in qalabkaas lagu arkay deegaanka Jouaiyya, kadibna “la duqeeyay oo la burburiyay” ka hor inta aan la fulin weerar.

   Waxay sidoo kale bayaanka ku lifaaqeen muuqaal muujinaya duqeynta.

   Waxaa weli jira is-afgarad la’aan ku saabsan in xabbad-joojinta u dhexeysa Mareykanka iyo Iiraan ay ku jirto Lubnaan ama in xabbad-joojintaas ay sii socon doonto kadib markii wada-hadalladii nabadda ee Pakistan ay fashilmeen.

   Israel iyo Lubnaan ayaa la filayaa inay wada-hadallo gaar ah ku yeeshaan Washington toddobaadka soo socda.

3. Saacad ka horHalkee Trump ku sugnaa intii wadahadallada ka socdeen Pakistan iyo sawrio laga helay

   

   Xigashada Sawirka, Reuters

   Intii wada-hadalladu ka socdeen Islamabad, Madaxweynaha Mareykanka Donald Trump wuxuu ka qaybgalayay ciyaar UFC ah oo ka dhacday Miami, isaga oo ay la socdeen dhowr xubnood oo qoyskiisa ah iyo sidoo kale Xoghayaha Arrimaha Dibadda Mareykanka Marco Rubio.

   Vance ayaa sheegay in uu Trump si “joogto ah” ula xiriiray intii ay wada-hadalladu ka socdeen Pakistan.

   “Ma garanayo inta jeer ee aan la hadalnay—laga yaabee lix jeer, ama xitaa dhowr iyo toban jeer 21-kii saacadood ee la soo dhaafay,” ayuu Vance yiri.

   Wuxuu intaa ku daray: “Waxaan si joogto ah ula xiriirnay kooxda, maadaama aan ku gorgortamaynay si niyad wanaagsan leh.”

   

   Xigashada Sawirka, Reuters

   

   Xigashada Sawirka, reu

   

   Xigashada Sawirka, Reuters

4. 2 Saacadood ka horPakistan oo war cusub hadda soo saartay

   Wasiirka Arrimaha Dibadda ee Pakistan ayaa soo saaray bayaan ka dib markii ay soo dhammaadeen wada-hadalladii nabadda, isagoo ku boorriyay labada dhinac inay "lagama maarmaan tahay in dhinacyadu sii wadaan ilaalinta ballanqaadkooda ku aaddan xabbad-joojinta."

   "Waxaan rajaynaynaa in labada dhinac ay ku sii socdaan niyad wanaag si loo gaaro nabad waarta iyo barwaaqo u soo hoyata gobolka oo dhan iyo meelo ka baxsanba," ayaa ku yiri qoraal uu soo dhigay bartiisa X.

   Qoraalka ayaa lagu soo gabagabeeyay in Pakistan ay sii wadi doonto inay door ka qaadato fududeynta wadada hadalka ee u dhexeeya labada dhinac "maalmaha soo socda."

5. 2 Saacadood ka horMareykanka iyo Iiraan oo bixiyey sababta ay u fashilmeen wada-hadalladii nabadda

   

   Xigashada Sawirka, Reuters

   Mareykanka iyo Iiraan waxay bixiyeen sababo kala duwan oo ku saabsan sababta ay u fashilmeen wada-hadalladii nabadda.

   Sida ay sheegtay warbaahinta dowladda Iiraan, “dalabyo aan macquul ahayn” oo ka yimid Mareykanka ayaa carqaladeeyay dadaalladii lagu doonayay in lagu soo afjaro dagaalka.

   “Inkastoo ay jireen dadaallo kala duwan oo ay soo bandhigeen wafdiga Iiraan, dalabaadka aan macquulka ahayn ee dhinaca Mareykanka ayaa hor istaagay horumarka wada-hadallada. Sidaas darteed, wada-hadalladu way dhammaadeen,” ayay idaacadda dowladda Iiraan ee IRIB ku sheegtay qoraal ay ku daabacday Telegram.

   Dhanka kale, Mareykanku wuxuu sheegay inay ahaayeen kuwo u “dabacsan” oo “u fududaynayay” wada-hadallada.

   JD Vance ayaa sheegay in madaxweynaha Mareykanka, Donald Trump, uu ku amray inuu “halkan yimaado isagoo niyad wanaagsan leh oo dadaalkiisa ugu fiican geliyo sidii heshiis loo gaari lahaa. Taas waan sameynay, nasiib darro se horumar ma sameynin.” Wuxuu sidoo kale sheegay inuu ka tagayay isagoo soo bandhigay “soo jeedin aad u fudud, hab is-afgarad ah oo ah dalabkeenna ugu dambeeya uguna fiican.”

   Ilaa hadda ma cadda tallaabooyinka xiga ee ku saabsan heshiiska xabbad-joojinta ee labada toddobaad ah ama in wada-hadallo kale la qorsheynayo.

6. 2 Saacadood ka horSidee ahaa xaalka gudaha iyo banaanka hotelka shirku ka dhacayey

   

   Xigashada Sawirka, AFP

   Daqiiqado yar kadib markii uu dhammaaday shirkii jaraa'id, annaga iyo dhawr suxufi oo kale oo ku sugnayn xarunta shirka, waxaan u soo gudbnay dhanka kale ee jidka si aan u aragno waxa ka dhacaya bannaanka huteelka uu Vance ka qudbaynayay.

   Markii aan halkaas gaarnay, waxaa durba la arkaysay kolonyo dheer oo baabuur ah oo oo diyaar u ah inay baxaan. Kolonyadaas waxay isugu jireen kuwa ammaanka ee Pakistan iyo sidoo kale kale ilaalada gaarka ah ee uu la safro madaxweyne ku-xigeenka Mareykanka.

   Waxaan sidoo kale aragnay baabuur uu ka babanayo calanka Mareykanka oo si degdeg ah uga baxaya huteelka. Sidaa darteed, waxaa loo qaadan karaa in Madaxweyne ku-xigeenka JD Vance uu diyaar u ahaa inuu magaalada ka baxo ka dib markii wada-hadalladii dheeraa ay ku guuldareysteen inay horseedaan heshiis.

   Hareeraheenna oo dhan, waxaa laga dareemayay niyad-jab xooggan oo ku aaddan natiijada wada-hadalladan.

   Dad badan ayaa xaqiiqsaday in labada dhinac oo gaara heshiis nabadeed ay ahayd fursad aad u fog, madaama ay jireen kala duwanaansho weyn oo u dhexeeyay mowqifyada Mareykanka iyo Iran. Laakiin haddana, qaar badan ayaa rajo ka qabay in marka loo eego miisaanka ergooyinka ay soo direen labada dhinac, ay taasi muujinaysay calaamad muujinaysa in qof kastaa uu dhab ka ahaa isku dayga in heshiis la gaaro.

   Dareenkaas niyad-jabka ah laguma koobnaan doono oo kaliya gudaha hoolkan shirarka, balse meelo ka fog ayaa laga dareemi doonaa.

7. 2 Saacadood ka horNetenyahu oo sheegay in ololaha Israa’iil ee ka dhanka ah Iiraan “wali uusan dhammaanin.”

   

   Xigashada Sawirka, Israeli Prime Minister's Office

   Isagoo hadlayey ka hor inta aan Maraykanku sheegin in wadahalladii ay la lahayeen Iiraan lagu fashilmay in heshiis lagu gaaro ayuu Ra’iisul wasaaraha Israa’iil Benjamin Netanyahu sheegay in ololaha Israa’iil ee ka dhanka ah Iiraan “wali uusan dhammaanin.”

   Bayaan ka soo baxay Ra’iisul Wasaaraha Israa’iil Benjamin Netanyahu oo uu ku sheegay inuu “oggolaansho” siiyay wada-hadallo nabadeed oo lala yeesho Lubnaan.

   Si kastaba, isla farriintaas gudaheeda, wuxuu sidoo kale muujiyay in ololaha ka dhanka ah Iiraan “uusan weli dhammaan” isagoo sheegay “wali waan la dagaallamaynaa”. Wuxuu intaas ku daray in “wali ay jiraan wax badan oo la qabanayo”.

   Bayaanka ayaa la soo saaray xilli Maraykanka iyo Iiraan ay ku jireen wada-hadallo nabadeed oo qoto dheer oo ka socday Pakistan.

   Netanyahu ayaa sidoo kale taxay dhowr “guulo” oo uu sheegay in lagu gaaray ololaha milatari ee Israa’iil, oo ay ka mid tahay burburinta barnaamijka nukliyeerka ee Iiraan.

   “Guulahaas weli ma dhammaan. Weli waxaa Iiraan ku jira walxo la hodmiyay. Sida uu sheegay Madaxweyne Trump, waa in laga saaraa. Ama heshiis ayaa lagu saari doonaa, ama siyaabo kale ayay ku bixi doonaan,” ayuu yiri.

8. 3 Saacadood ka horBayaanka Iiraan wax yar ka hor inta aan Maraykanku sheegin in lagu fashilmay in heshiis la gaaro

   

   Xigashada Sawirka, Atta Kenare via Getty Images

   Afhayeenka Wasaaradda Arrimaha Dibadda ee Iiraan, Esmaeil Baqaei, ayaa hadda soo saaray bayaan ku saabsan xaaladda wada-hadallada nabadeed ee u dhexeeya Maraykanka.

   Qoraal uu ku daabacay baraha bulshada, Baqaei wuxuu ku tilmaamay wada-hadallada kuwo “xooggan”, balse wuxuu sheegay in guusha wada-xaajoodyada socda ay “ku xiran tahay sida ay uga go’an tahay iyo niyadda wanaagsan ee dhinaca kale”.

   Baqaei sidoo kale wuxuu ugu baaqay Washington inay ka fogaato “dalabyo xad-dhaaf ah iyo codsiyo sharci-darro ah” isla markaana ay aqbasho “xuquuqda iyo danaha sharciga ah ee Iiraan”.

   Arrimaha uu sheegay in laga hadlayo waxaa ka mid ah marin-biyoodka Strait of Hormuz, barnaamijka nukliyeerka ee Iiraan, iyo “in si buuxda loo soo afjaro dagaalka ka socda Iiraan”.

   Waxaan dhowaan ka maqli doonnaa dhinaca Maraykanka xaaladda wada-hadallada, maadaama Madaxweyne-ku-xigeenka Maraykanka JD Vance uu qorsheynayo inuu hadal ka jeediyo shir jaraa’id oo ka dhacaya Islamabad.

9. 3 Saacadood ka horNuxurka hadaladii madaxweyne xigeenka Maraykanka ka sheegay shirkiisii jaraa'id ka hor safarkiisa

   Ku-xigeenka Madaxweynaha Mareykanka JD Vance ayaa hadda ka duulay dalka Pakistan, ka dib wadahadallo dheer oo xasaasi ahaa oo uu la yeeshay Iiraan, kuwaas oo ku guuldareystay inay horseedaan heshiis nabadadeed oo lagu soo afjarayo dagaalka.

   Vance oo ay garab taagnaayeen Ergeyga Gaarka ah ee Mareykanka Steve Witkoff iyo wiilka uu sodogga u yahay Trump ahna la-taliyaha Aqalka Cad Jared Kushner, ayaa la hadlay xubno ka tirsan saxaafadda ka hor int aanu bixin.

   Halkan waa qaar ka mid ah qodobbadii ugu muhiimsanaa ee shirka jaraa’id:

   • Wuxuu sheegay in 21 saacadood oo wadahadallo nabadeed ah oo ka dhacay Islaamabaad ka dib, Mareykanka iyo Iiraan ay ku guuldareysteen inay gaaraan heshiis lagu joojinayo dagaalka.
   • "Waxaan la yeelanay Iiraaniyiinta wadahadallo dhowr ah oo dhaxalgal ah, taasina waa warka wanaagsan. Warka xunse waa inaanan gaarin heshiis, waxaanan u malaynayaa in taasi ay u xun tahay Iiraan in ka badan inta ay u xun tahay Mareykanka," ayuu yiri Vance.
   • "Runtii uma suuragelin inaan gaarno xaalad ay Iiraaniyiintu ku aqbalayaan shuruudaheenna," ayuu raaciyay.
   • Madaxweyne ku-xigeenka ayaa sidoo kale muujiyay qadarinta uu u hayo Ra’iisul Wasaaraha Pakistan Shehbaz Sharif iyo Field Marshal Asim Munir, isagoo yiri "caqabad kasta" oo ku timid wadahadallada "kuma imaan reer Pakistan, kuwaas oo qabtay shaqo cajiib ah."
   • Wuxuu ahaa shir jaraa'id oo kooban iyadoo weriyayaashu ay weydiiyeen dhowr su'aalood oo kaliya.
   • Markii la weydiiyay awoodda Nukliyeerka ee Iiraan, Vance wuxuu ku jawaabay in ka hortagga dalkaas si uusan u helin hubka Nukliyeerka hadda iyo mustaqbalkaba ay tahay "yoolka koowaad" ee Madaxweyne Donald Trump.
   • Wuxuu intaas ku daray in Trump uu si firfircoon uga qeyb qaatay wadahadallada, isagoo sheegay inuu madaxweynaha la hadlay inta u dhaxeysa "lix jeer" ilaa "toban iyo laba jeer" muddadii ay wadahadalladu socdeen.
   • "Waxaan halkan uga tegaynaa soo-jeedin aad u fudud, taasoo ah hab lagu fahmayo in kani yahay dalabkayagii ugu dambeeyay ee ugu fiicnaa. Waxaan arki doonnaa haddii Iiraaniyiintu ay aqbalaan," ayuu ku soo gabagabeeyay hadalkiisa.

10. 3 Saacadood ka horMareykanku wuxuu ku yimid 'niyad-sami: Vance

    Madaxweyne xigeenka Maraykanka oo ka hadlayey dhankooda ayaa xusay in Mareykanku uu wadahadallada u yimid isagoo dabacsan isla markaana muujinaya "niyad-sami", balse ay tahay wax laga xumaado in labada dhinac ay heshiis gaari waayeen.

    "Waxaan halkan uga tegaynaa soo-jeedin aad u fudud, taasoo ah hab lagu fahmayo in kani yahay dalabkayagii ugu dambeeyay ee ugu fiicnaa. Waxaan arki doonnaa haddii Iiraan ay aqbasho."

11. 3 Saacadood ka horMadaxweyne xigeenka Maraykanka oo ka tagay Pakistan

    

    Xigashada Sawirka, Reuters

    Madaxweyne ku-xigeenka Madaxweynaha Mareykanka JD Vance ayaa hadda raacay diyaaradda Air Force 2.

    Isagoo saaran dusha sare ee jaran jarada diyaarada ayuu gacnata haatiyey ka hor inta diyaaradiisau aysan ka Kicin magaalada Islamabad ee Pakistan isaga iyo wafdiga kle ee Maraykanka oo u ambabaxay Washington.

12. 3 Saacadood ka horWadahadalladii Maraykanka iyo Iiraan oo fashilmay in heshiis lagu gaaro

    

    Xigashada Sawirka, Jacquelyn Martin via Getty

    Wadahadallo ay magaalada Islamabad ee dalka Pakistan ku yeesheen wufuud kala mataleysa Maraykanka iyo Iiraan ayaan lagu guulaysan inay dhinacyadu geshiis gaaraan.

    Wafdiga Maraykanka ee uu hoggaaminayey madaxeyne xigeenka Maraykanka ayaa sheegay "Waxaan ka wada hadalnay dhammaan arrimahaas," ayuu yiri Vance, iyo sidoo kale "arrimo dhowr ah oo intaas ka baxsan."

    "Runtii uma suuragelin inaan gaarno xaalad ay Iiraan diyaar u tahay inay ku aqbasho shuruudaheenna."

    Isagoo sifaynaya qaabka uu Mareykanku u wajahay wadahadallada, wuxuu weriyeyaasha u sheegay: "Waxaan u malaynayaa inaan aad u dabacsannayn, aadna u tanaasulnay."

    Wuxuu sidoo kale sheegay inuu dhowr jeer la hadlay Madaxweynaha Mareykanka Donald Trump intii ay socdeen saacadihii wadahadalka. "Ma garanayo inta jeer ee aan la hadalnay, waxay noqon kartaa lix jeer ama laba iyo toban jeer 21-kii saac ee la soo dhaafay."

13. 11 Abriil 2026Kulamo aad u xiiso badan oo ka dhacaya Islamabad iyadoo Mareykanka iyo Iiraan ay isugu imaanayaan wadahadallo nabadeed

    

    Xigashada Sawirka, Reuters

    Kahor wadahadallada saddex-geesoodka ah ee maanta, wufuudda Mareykanka iyo Iiraan ayaa sidoo kale si gooni gooni ah ula kulmay wakiillada Pakistan.

    

    Xigashada Sawirka, reu

    

    Xigashada Sawirka, Reuters

    

    Xigashada Sawirka, Reuters

14. 11 Abriil 2026Maxay yihiin shanta qodob ee ugu muhiimsan ee laga dooday wadahadallada u dhexeeya Mareykanka iyo Iiraan?

    

    Xigashada Sawirka, reu

    Wadahadallada u dhexeeya Mareykanka iyo Iiraan si loo soo afjaro dagaalka Bariga Dhexe ayaa maantay oo Sabti ah ka bilowday caasimadda Pakistan ee Islamabad.

    Iyadoo ay jiraan wadahadallo muhiim ah oo u dhexeeya Mareykanka iyo Iiraan, mas'uuliyiinta dowladda Pakistan ayaa rajo wanaagsan qaba, iyagoo sheegaya in, si ka duwan kuwa kale oo badan, ay ku qanacsan yihiin kalsoonida labada dhinac.

    Madaxweyne ku xigeenka Mareykanka J.D. Vance ayaa gaaray Islamabad isagoo ay weheliyaan Jared Kushner, oo ah wiilka uu soddogga u yahay madaxweyne Donald Trump ahna la-taliyaha sare, iyo sidoo kale ergeyga gaarka ah Steve Wittkopf, si ay uga qayb qaataan wadahadallada nabadda ee lala yeelanayo Iiraan.

    Taas bedelkeeda, Afhayeenka Baarlamaanka Iiraan Mohammad Baqer Qalibaf, oo hoggaaminaya wafdiga dalkiisa ee wadahadallada, dhawaanna ahaa shakhsi muhiim ah oo ka dhex muuqday dowladda, iyo Wasiirka Arrimaha Dibadda Abbas Araqchi ayaa gaaray Pakistan saqdii dhexe ka hor inta aysan bilaaban wadahadallada.

    Madaxweyne ku xigeenka Mareykanka ayaa sidoo kale u muuqday mid rajo wanaagsan qaba, isagoo ka hor inta uusan ka bixin Mareykanka yiri: "Haddii Iiraaniyiintu ay diyaar u yihiin inay si niyad wanaag ah u gorgortamaan, hubaashii waxa aan diyaar u nahay inaan gacan ka geysanno."

    Laakiin waxaa sidoo kale jiray digniin.

    "Haddii ay isku dayaan inay wax noo yeeriyaan, waxay ogaan doonaan in kooxda wadaxaajoodka aysan arimaasi ka ka falcelineyn."

15. 11 Abriil 2026Tirada dhimashada ee Lubnaan oo dhaaftay 2,000

    

    Xigashada Sawirka, Reuters

    Wasaaradda caafimaadka ee Lubnaan ayaa sheegtay in tirada dhimashada dalka tan iyo markii ay ku lug yeelatay colaadda ay hadda dhaaftay 2,000.

    Wakaaladda Wararka Qaranka ayaa ku warameysa in sida laga soo xigtay xarunta gurmadka degdegga ah ee caafimaadka ee wasaaradda ay dhinteen 2,020 qof, 6,436 qofna ay dhaawacmeen tan iyo 2-dii Maarso.

    Warbixintan ayaa timid ka dib markii wasaaraddu ay sheegtay in weerar Israa'iil ay ku qaadday magaalada Tuffahta ee koonfurta Lubnaan ay ku dhinteen siddeed qof, sagaal kalena ay ku dhaawacmeen, oo ay ku jiraan shan xaaladood oo halis ah.

16. 11 Abriil 2026Mar dhow marinka Hormuz ayaa furmi doona – Trump

    

    Xigashada Sawirka, Getty Images

    Donald Trump ayaa mar kale qoraal soo galiyay Truth Social iyadoo wadahadallo heer sare ah oo u dhaxeeya wufuud Mareykan ah iyo Iran ay ka socdaan Islamabad.

    Waxa uu ku celceliyay in Maraykanku uu burburiyay militariga Iran, "oo ay ku jiraan dhammaan ciidamadooda badda iyo cirka, iyo wax kasta oo kale".

    Wuxuu ku adkaysanayaa "Marinka Hormuz wuu dhawaan furmi doonaa" wuxuuna ku celceliyay sida uu ku sheegay qoraalladii hore ee ahaa in booyadaha saliidda ee faaruq ah ay ku soo wajahan yihiin Mareykanka si ay "u soo rartaan".

    Sida ku cad xabbad-joojintii shuruudda ahayd ee labada toddobaad ee Iran, Trump wuxuu sheegay inuu aqbalay "in la hakiyo duqeynta" haddii Tehran ay oggolaato inay dib u furto xannibaadda.

    Tehran ayaa marin biyoodka ka dib markii Mareykanka iyo Israa'iil ay bilaabeen duqeymo ka dhan ah dalka 28-kii Febraayo.

    Waa mid ka mid ah marinnada maraakiibta shidaalka ee ugu mashquulka badan, kaas oo qiyaastii 20% saliidda iyo gaaska dabiiciga ah (LNG) ay inta badan maraan.

    Warar dheeraad ah:

    Trump waa inuu "maya" ku dhahaa Netanyahu - Wargeyska The Independent

    Geelle oo mar lixaad ku guuleystay doorashada Jabuuti

17. 11 Abriil 2026Mareykanka oo ka hadlay wada-hadallada

    

    Xigashada Sawirka, Getty Images

    Sarkaal sare oo ka tirsan Aqalka Cad ayaa xaqiijiyay in wadahadallo fool ka fool ah oo saddex geesood ah ay u socdaan wufuudda Mareykanka iyo Iran ay la leeyihiin Pakistan. Ilo-wareedyo ka tirsan dawladda Pakistan ayaa mar hore sidan oo kale u sheegay BBC-da.

    Sarkaalku wuxuu bixiyay tafaasiil dheeraad ah oo ku saabsan cidda ku jirta qolka Maraykanka. Waxay yiraahdeen ergada xuddunta u ah, sidaan warbixintaan ku sheegnay, waxay ka kooban yihiin madaxweyne ku xigeenka JD Vance, ergeyga gaarka ah Steve Witkoff iyo wiilka uu Trump soddogga u yahay Jared Kushner.

    Sida laga soo xigtay sarkaal sare, wafdiga ballaaran ee Mareykanka waxaa ka mid ah la taliyaha amniga qaranka Andrew Baker, iyo la taliyaha arrimaha Aasiya Michael Vance.

    Khubarro Mareykan ah oo ku takhasusay mowduucyo kala duwan ayaa sidoo kale jooga Islamabad, sida uu sheegay sarkaalku, iyadoo khubareo kale ay taageerayaan Washington DC.

    Warar dheeraad ah:

    Trump waa inuu "maya" ku dhahaa Netanyahu - Wargeyska The Independent

    Geelle oo mar lixaad ku guuleystay doorashada Jabuuti

18. 11 Abriil 2026Israa'iil oo sheegtay in 24 saac gudahood ay ku duqeysay 200 oo bartilmaameed oo ay Xisbullah ku leedahay Lubnaan

    

    Xigashada Sawirka, Getty Images

    Iyadoo wadahadallo toos ah oo u dhexeeya Maraykanka iyo Iran uu Islamabad kula yeelanayo Pakistan, Israa’iil ayaa sheegtay inay sii wadayaan duqeymaha ay ku beegsanayaan bartilmaameedyada Lubnaan.

    Ciidamada difaaca Israa’iil ayaa sheegay in 24-kii saac ee la soo dhaafay ay duqeeyeen in ka badan 200 oo bartilmaameed oo ururka Xisbullah ay ku leeyihiin dalka Lubnaan.

    War qoraal ah oo ay soo saartay ayay ku sheegtay in ciidamadeeda cirka ay qaadayaan weerarro hor leh ayna taageerayaan ciidamada dhulka ee ka howlgala koonfurta Lubnaan. IDF waxa ay sidoo kale sheegtay in ay bartilmaansanayso qalabka wax soo saara si ay uga hortagto weerarro ka dhan ah Israa’iil.

    Wasaaradda caafimaadka ee dalka Lubnaan ayaa sheegtay in lix qof lagu dilay weerarro ka dhacay koonfurta Lubnaan, iyadoo shan kalena lagu dhaawacay.

    Dhanka kale, Israa’iil ayaa ka digtay duullaan diyaaradeed oo ka dhacay gobolka sare ee Galili ee waqooyiga dalkaasi. Ma cadda cidda soo qaadday weerarka.

    Warar dheeraad ah:

    Trump waa inuu "maya" ku dhahaa Netanyahu - Wargeyska The Independent

    Geelle oo mar lixaad ku guuleystay doorashada Jabuuti

19. 11 Abriil 2026War deg deg ah, Wadahadallo saddex-geesood ah oo toos ah oo u dhexeeya Iran iyo Mareykanka ayaa socda

    Ilo-wareedyo ka tirsan xukuumadda Pakistan ayaa BBC-da u sheegay in wadahadal saddex geesood ah oo toos ah oo u dhexeeya Maraykanka iyo Iran, oo Pakistan ay dhexdhexaadineyso, uu hadda socdo.

    Hadda ka hor, waxaan sheegnay in wadahadallada ay u socdeen si dadban, iyadoo loo marayo dhexdhexaadiyeyaasha Pakistan.

    Warar dheeraad ah:

    Trump waa inuu "maya" ku dhahaa Netanyahu - Wargeyska The Independent

    Geelle oo mar lixaad ku guuleystay doorashada Jabuuti

20. 11 Abriil 2026Trump: Iran "wax weyn bey lumineysaa"

    

    Xigashada Sawirka, Reuters

    Madaxweynaha Mareykanka Donald Trump ayaa sheegay in Iran ay “si weyn u luminayso” dagaalka, xilli wada-hadallo ka furmay Islamabad.

    Qoraal dheer oo uu ku soo dhigay baraha bulshada ee Truth Social ayuu Trump ku sheegay in warbaahintu “ay jeceshahay inay tiraahdo Iran ‘way guuleysanaysaa’, halka run ahaantii qof walba ogyahay inay si weyn u luminayso.”

    Waxa uu sii raaciyay sheegashooyin uu maamulka Mareykanku hore u soo bandhigay intii lagu jiray colaadda, isagoo yiri: “Ciidamadooda badda way burbureen, ciidamadooda cirka way dhammaadeen, nidaamkooda difaaca hawada ma jiro, raadaarkooduna wuu istaagay, warshadahooda gantaallada iyo diyaaradaha aan duuliyaha lahayn si weyn ayaa loo burburiyay, gantaalladii iyo diyaaradahaasna waa la baabi’iyay, waxaana ugu muhiimsan, ‘hoggaamiyeyaashoodii’ muddada dheer jiray ma sii jiraan—Ilaahay baa mahad leh!”

    Kadib markii uu xusay in Iran ay miinooyin badeed dhigaysay, wuxuu sheegay in Mareykanku hadda bilaabayo “nadiifinta Marinka Hormuz” si uu “wanaag ugu sameeyo dalalka adduunka oo dhan.”

    Warar dheeraad ah:

    Geelle oo mar lixaad ku guuleystay doorashada Jabuuti

    Maxay yihiin Shuruudaha hor-dhaca ah ee Iran ay soo bandhigtay wadaxaajoodka ka hor?