Xamaas oo aqbashay siidaynta maxaabiista Israa'iil

Tebin toos ah

1. 4 Oktoobar 2025Trump wuxuu rabaa in heshiiska nabadeed la dhameystiro, balse waa yididiilo aanan weli muuqan

   

   Xigashada Sawirka, Getty Images

   Trump mar walba waxa uu rabay hal shay oo ku weynaa, waana: in uu yiraahdo aniga ayaa soo daayay dhammaan maxaabiista oo dagaalka soo afjaray.

   Hadallada Xamaas, sida uu isagu u arko, waxay ku dhow yihiin in ay gaarsiiyaan yoolkaas. Waxa uu u sawirayaa jawaabta Xamaas in ay dirayso calaamad ah rabitaanka “nabad waarta”.

   Waa na mida sababtay in weedh layaab leh ay ka timaado madaxweynaha Mareykanka, taas oo ahayd in Israa’iil “ay isla markiiba joojiso duqeynta Qasa” si maxaabiista si degdeg ah loogu sii daayo.

   Hal waddo ayaanu ognahay in arrintan loo hirgelin doono, waana in la dhaho: “Wadahadallo faahfaahsan ayaa horey u socday si wax looga qabto arrimaha harsan.”

   Laakiin faahfaahintaas harsan ayaa ah furaha hirgelinta qorshahan oo dhan. Haddii Xamaas wareejiso dhammaan maxaabiista nool, waxay lumineysaa inta badan awooddii ay ku gorgortami lahayd. Taasna waxay muhiim u tahay marka la eego qaybta ugu dambeysa ee bayaankooda; taas oo muujinaysa in ay diidan yihiin dalabka Trump ee ah in ay hubka dhigaan oo ay qaxaan si heshiis nabadeed loogu dhammeeyo dagaalka.

   Waxa kale oo ay dalbanayaan in Israa’iil gebi ahaanba ka baxdo Qasa. Waxaan hadda joognaa waqti aad u xasaasi ah, Trump-na waxa uu doonayaa in arrinta isla markiiba la dhammeeyo, balse waa yididiilo aanan weli la gaarin.

2. 4 Oktoobar 2025Trump oo doonaya natiijo degdeg ah, taas oo adkayn doonta wadahadallada

   

   Xigashada Sawirka, AFP

   Trump dulqaadkii ayaa uga dhammaaday soo afjaridda colaaddan, wuxuuna rajeynayaa in uu degdeg ku arko natiijooyin muuqda.

   Waxaa aad u yar suuragalnimada in Trump uu oggolaado muranka iyo doodda ka dhalan karta shuruudaha heshiis buuxda oo laga yaabo inay bilooyin sii socdaan, wuxuuna u badan yahay inuu isku haleeyo dalalka sida Qatar iyo Masar ah in ay gacan ka geystaan dhexdhexaadinta.

   Arrintani waxay u muuqataa mid dhali doonta wadahadallo adag oo kulul.

3. 4 Oktoobar 2025Xamaas oo afka ka duwday dalabkii Trump ee ahaa inay hubka dhigto

   

   Xigashada Sawirka, Getty Images

   Bayaanka Xamaas ma xusin mana aqbalin si toos ah qorshaha 20-ka qodob ah ee Trump, balse waxa ay sheegeen inay “cusboonaysiiyeen heshiiskiisa ah in maamulka Qasa lagu wareejiyo hay’ad Falastiini ah oo madaxbannaan, taas oo ku dhisan heshiis qaran Falastiini ah isla markaana heysata taageerada Carabta iyo Islaamka.”

   Balse, bayaanku kama hadlin mid ka mid ah qodobada ugu waaweyn ee qorshaha Trump; oo ah in Xamaas ogolaato inay hubka dhigto isla markaana aysan door dambe ku yeelan maamulka Qasa.

   Su’aasha ugu weyn ayaa ah in ogolaanshaha lagu sii daynayo la haystayaasha ay ku filnaan doonto Donald Trump oo ku qanca in dagaalku uu u muuqdo mid soo afjarmaya.

4. 4 Oktoobar 2025Trump oo ka falceliyay jawaabta Xamaas ka bixisay qorshihiisa Qasa

   

   Xigashada Sawirka, Getty Images

   Madaxweynaha Mareykanka Donald Trump ayaa qoraal uu soo dhigay bartiisa Truth Social, uga falceliyay bayaankii dhawaan Xamas kasoo baxay ee ku saabsanaa qorshihiisa nabadeed ee Qasa.

   Bayaankaas oo ay Xamas ku muujisay inay oggolaan karto si shuruudaysan sii deynta dhammaan maxaabiista Israa’iil, haddii dagaalka la joojiyo lagana saaro ciidamada Israa'iil dhulka Qasa.

   Trump ayaa qoraalkiisa ku yiri:"Marka la eego bayaanka hadda Xamas soo saartay, waxaan aaminsanahay inay diyaar u yihiin NABAD waarta. Israa'iil waa inay isla markiiba joojisaa duqeynta Qasa, si aan maxaabiista si nabad ah oo degdeg ah ugu soo saari karno! Hadda, xaaladdu aad bay khatar u tahay in la sameeyo sidaas. Wadahadallo faahfaahsan oo arrintan ku saabsan waan wadnaa. Tani kaliya Qasa kuma saabsana, waa nabad muddo dheer laga sugayay Bariga Dhexe."

   Qoraalkan ayaa kusoo beegmaya iyadoo Trump uu horay u dejiyay waqti kama dambeys ah oo uu Xamaas ugu sheegay inay aqbalaan qorshihiisa nabadeed.

5. 3 Oktoobar 2025Mareykanka oo lacago ugu deeqay dowladda Lubnaan

   

   Xigashada Sawirka, Reuters

   Maamulka madaxweynaha Mareykanka Donald Trump ayaa ansixiyay lacag dhan 230 milyan oo doolar oo loogu talagalay ciidamada ammaanka Lubnaan usbuucan, xilli ay ku dadaalayaan inay hubka ka dhigaan kooxda awoodda leh ee Xisbullah, sida ay sheegeen ilo-wareedyo ku sugan Washington iyo Beirut.

   Ilo Lubnaani ah oo la socda go’aanka ayaa sheegay in maalgelinta ay ku jirto $190 milyan oo loogu talagalay ciidamada qalabka sida ee Lubnaan iyo $40 milyan oo loogu talagalay ciidamada amniga gudaha.

   Kaaliyeyaasha Dimuqraadiga ee Mareykanka ayaa sheegay in lacagaha la fasaxay wax yar ka hor inta uusan dhammaan sanad-maaliyadeedka Washington oo dhammaanayo 30.

6. 3 Oktoobar 2025Afghanistan: Sheekada naadirka ah ee dhexmartay gabadh wariye ah oo aan xijaabnayn iyo hoggaamiye Taliban ah?

   

   Xigashada Sawirka, Lyse Doucet

   "Ma ahi dilaa, laakiin markii la i kaa barayay ayaa laguu sheegay inaan dilaa ahay. Ma doonayo inaan ka hadlo siyaasad, laakiin aan wakhti idin raadiyo dhamaantiin, aan wada shaahno waxaana idinkaga sheekaynayaa gabayada," ayuu yiri isaga oo si tartiib ah u hadlaya oo dhoola cadeynaya.

   Tani ma ahayn wax aan ka filayay in aan ka maqlo xubin muhiim ah oo ka tirsan ururka Taliban.

   Lifaaqa hoose ku dhufo si aad faahfaahinta u hesho

   Linkhttps://www.bbc.com/somali/war-54201452

7. 3 Oktoobar 2025Masar oo ku caadaadinaysa Xamaas inay aqbasho qorshaha ee nabadda eeTrump

   

   Xigashada Sawirka, Reuters

   Wasiirka arrimaha dibadda Masar ayaa Khamiistii sheegay in dalkiisu uu kala shaqaynayo Qatar iyo Turkiga sidii Xamaas looga dhaadhicin lahaa inay aqbasho qorshaha Madaxweynaha Maraykanka Donald Trump uu ku doonayo in lagu soo afjaro dagaalka labada sano ku dhow eka socda Gaza. Waxaa uu ka digay in colaadda ay sii kordhi doonto haddii ay diidaan kooxda xagjirka ah.

   Badar Abdelatty oo ka hadlayay machadka xiriirka caalamiga ah ee Faransiiska ee ku yaala magaalada Paris ayaa sheegay in ay iska caddahay in Xamaas ay tahay in ay hubka dhigto Israa’iilna aan cudur daar loo siin si ay u sii wado weerarada ay ku hayso Gaza.

   Weerarada Israa’iil ayaa lagu dilay in ka badan 66,000 oo qof magaalada Gaza, sida ay sheegeen maamulka caafimaadka Falastiin.

   Aqalka Cad ayaa horraantii toddobaadkan soo saaray qorshe ka kooban 20 qodob oo ku baaqayay xabbad-joojin degdeg ah iyo in Xamaas dadka ay haystaan ay ku badashaan maxaabiista Falastiiniyiinta .

8. 3 Oktoobar 2025Maxaad kala socotaa qiimaha aadka qaaliga u ah ee lagu dhisay Xaramka, Maka?

   

   Xigashada Sawirka, Getty Images

   Xaramka iyo masaajidka ugu weyn adduunka ee ku yaalla magaalada barakeysan ee Maka, wuxuu sanad kasta qaabilaa Muslimiinta xujeyda ah oo gaareysa in ka badan 4 milyan oo qof, waxaana lagu qiyaasaa in dhismaha Xaramka la geliyay lacag gaareysa $ 100 bilyan oo doolar.

   Waxaana kharashkan inta badan uu ku baxay agabka nashqadeynta iyo dayactirka Xaramka xilli uu isbaddalayo dhaqaalaha adduunka.

   Waxaa sanad-ba sanadka ka dambeysa si kordha dadka u soo xajinaya taasi oo qasabta in markasta ballaarin lagu smaeeyo.

9. 3 Oktoobar 2025Putin oo digniin culus u jeediyay Mareykanka

   

   Xigashada Sawirka, EPA

   Madaxweynaha Ruushka Vladimir Putin ayaa Khamiistii ka digay in gantaalada Tomahawk ee Mareykanka la geeyo Ukraine ay horseedi doonto "heer gardarro cusub", iyo sidoo kale inay dhaawacdo xiriirka Ruushka iyo Mareykanka.

   Isagoo ka hadlayay kulan ka dhacay magaalada Sochi, Putin ayaa sheegay in tani aysan waxba ka bedelin xaaladda jiidaha hore ee dagaalka, halkaasoo Ruushka uu ku gaarayo horumaro, inkastoo uu ku socdo xawaare gaabis ah.

   "Isticmaalka gantaalada Tomahawk iyada oo aysan joogin ciidamada Mareykanka waa wax aan macquul aheyn, tani waxay horseedi doontaa heer cusub oo gardarro ah, iyo sidoo kale xiriirka Ruushka iyo Mareykanka oo xumaada," ayuu yiri Putin.

   Hoggaamiyaha Ruushka ayaa sheegay in xitaa haddii gantaallada Tomahawk ay waxyeello u geystaan ​​Ruushka haddii la geeyo Ukraine, difaaca hawada Ruushku uu si degdeg ah uga jawaabi doono khatarta cusub.

10. 3 Oktoobar 2025Boqoradii ugu saameynta badan taariikhda Islaamka ee 'saaxiradda' lagu naaneysay

    

    Xigashada Sawirka, Getty Images

    Aniga oo isticmaalaya barta bulsho ee X, ayaa ereayo af-carabi ah oo lagu dul xardhay sawirka kor ka muuqda oo leeyahay dugsi ku yaalla Wuqooyiga Afrika, ay dareenkeyga soo jiiteen.

    Lifaaqa hoose ku dhufo si ada faahfahainta u akhriso

    Linkhttps://www.bbc.com/somali/articles/cd1j8pj9r0po

11. 3 Oktoobar 2025Haweeney Mareykan ah oo lagu helay dambi ah inay biyo ku qarqiso gabadh Muslimad ah

    Haweeney ka soo jeeda gobolka Texas ee dalka Mareykanka ayaa lagu xukumay shan sano oo xarig ah kadib markii ay isku dayday in ay biyo ku qarqiso gabar 3-sano jir ah oo Muslimad Mareykan ah sanadkii 2024-kii, weerarkaas oo ay mas’uuliyiintu sheegeen in uu salka ku hayay cunsuriyad. Gabadha ayaa la sheegay in qoyskeeda ay ka so jeedeen Flaastiin.

    Diiwaanada maxkamada oo ay soo xigatay CBS News iyo Fort Worth Star-Telegram ayaa muujiyay garsoore Andy Porter inuu xukunka ku riday Elizabeth Wolf, 43 sano jir ah, ka dib markii ay qiratay dambiga isku day dil iyo halis galin ilmo.

    Wolf ayaa lagu soo oogay dacwad sannadkii hore ka dib weerarka, kaasoo uu cambaareeyay madaxweynihii xilligaasi Joe Biden. Sida laga soo xigtay warbixinnada booliiska, Wolf ayaa gabadha yarhooyadeed la murantay ka hor inta aysan waydiin halka ay qoysku ka yimaadeen.

    Kadib waxa ay damcday inay qarqiso wiilka 3 jirka ah waxa ayna isku dayday in ay qabto gabadha walaalkeed oo 6 jir ahaa.

    

    Xigashada Sawirka, Reuters

12. 3 Oktoobar 2025Xiisadda u dhaxeysa Venezuela iyo Mareykanka oo cirka isku sii shareertay

    

    Xigashada Sawirka, Reuters

    Wasiirka Difaaca Venezuela, General Vladimir Padrino, ayaa Khamiistii sheegay in shan diyaaradood oo kuwa dagaalka ah lagu arkay meel u dhow xeebaha dalkaasi, taasoo uu ku tilmaamay halis Mareykanka ka imanaysa.

    Waxa uu wasirku intaa ku daray in in xogta diyaaradaha lagu wargeliyay taawarka laga hago diyaaradaha. Joogitaanka diyaaradahan meel u dhow badda Kariibiyaanka ayuu ku tilmaamay arrin daandaansi ah, islamarkana khatar ku ah amniga qaranka.

    Aqalka cad wali kama uusan hadlin hadalka ka so yeeray Venezuela. Maraykanka ayaa koox maraakiib dagaal ah u diray jasiiradaha Caribbean-ka, hawlgal ay Washington sheegtay inay kula dagaalamayso ka ganacsiga daroogada.

    Mareykanka ayaa sidoo kale weeraray doomo dhowr ah oo uu sheegay in ay saarnaayeen daroogo laga keenay dalka Venezuela, waxaana la dilay dadkii la socday.

13. 3 Oktoobar 2025Faahfaahin ka soo baxaysa weerar lagu qaaday Macbad Yahuuda ay leeyihiin dalka UK

    

    Xigashada Sawirka, PA Media

    Labo nin iyo haweeney ayaa loo xiray weerar ay dda ku dhinteen oo lagu qaaday macbad ku yaalla magaalada Manchester ee dalka Ingiriiska.

    Booliska ayaa ninka weerarka geystay ku sheegay magaciisa Jihad al-Shamie oo haysta dhalashada Britain balse asal ahaan ka soo jeeda Suuriya. Ninkan ayaa waxaa markii dambe toogtay Booliiska.

    Ra'iisul wasaaraha Britain, Keir Starmer, ayaa mar sii horreysay sheegay in Britain ay tahay inay ka adkaato waxa uu ugu yeeray "naceybka sii kordhaya ee dadka Yuhuudda ah."

    Labo qof oo Yuhuud ah ayaa la dilay, saddex kalena waa lagu dhaawacay weerarka dhaawacay.