Hoggaamiyaha Kuuriyada Waqooyi oo kormeeray tijaabada gantaallo cusub, sida ay sheegtay warbaahinta dowladdu

Tebin toos ah

1. 24 Agoosto 2025War deg deg ah, Degdeg: Israa'iil oo weerar cirka ah ku qaadday caasimadda Yemen ee sanca

   Militariga Israa’iil ayaa maanta oo Axadd ah ku dhawaaqay in ay beegsadeen goobo ku yaalla caasimadda Yemen ee Sanca, kuwaas oo ay ka mid yihiin xarunta milatariga ee hoyga madaxtooyada, laba xarumood oo koronto, iyo goob kaydka shidaalka ah, sida lagu sheegay bayaan lagu baahiyay wakaaladda wararka ee Reuters.

   Arrintan ayaa timid kadib markii telefishinka Al Masirah ee ay maamulaan Xuutiyiintu uu sheegay in duqeymo ay Israa’iil fulisaymaanta ay ku bartilmaameedsadeen caasimadda Sanca. Dadka deegaanka ayaa sheegay in duqeymuhu ku dhaceen agagaarka xarunta madaxtooyada, saldhigyada gantaallada, iyo xarumaha saliidda iyo korontada.

   Dadka reer Sanca ayaa sheegay in weerarradu si gaar ah u beegsadeen meelaha u dhow xarunta madaxtooyada, saldhigyada gantaallada, iyo xarumaha shidaalka iyo korontada.

   Jimcihii, Xuutiyiinta ayaa ku dhawaaqay in ay gantaal ballistic ah ku rideen Israa’iil, waxaana saraakiil ka tirsan ciidamada cirka ee Israa’iil ay sheegeen in gantaalku u muuqday mid xambaarsanaa qalab qarxa oo dhowr qaybood ah oo loo diyaariyay in ay qarxaan marka ay dhulka ku dhacaan.

   “Waa markii ugu horreysay oo gantaal noocan laga soo rido Yemen," ayaa lagu yiri bayaanka ay werisay Reuters.

2. 24 Agoosto 2025Madaxweynaha Ukraine oo wacad ku maray in dalkiisu dagaalka sii wadayo

   

   Xigashada Sawirka, Public Broadcasting company of Ukraine

   Madaxweynaha Ukraine Volodymyr Zelensky ayaa sheegay in Ukraine ay sii wadi doonto dagaalka ay ugu jirto xorriyaddeeda, isaga oo khudbad u jeediyay shacabka dalkiisa maalinta madaxbannaanida.

   Waxa uu yiri: "Waxaan u baahan nahay nabad caddaalad ah, nabad mustaqbalkeennua aan go’aamino annaga oo keliya." Waxa uu intaas ku daray in Ukraine ay iska difaaci doonto Ruushka "ilaa iyo inta laga dhageysanayo baaqeeda nabadda."

   Wuxuu sidoo kale yiri: "Ukraine weli guul ma gaarin, balse sidoo kale ma aysan guuldareysan."

   Hadalka Zelensky ayaa yimid kadib markii Moscow ay sheegtay in Ukraine ay weerar ku qaaday xarumo koronto iyo tamar oo ku yaalla gudaha Ruushka, taasoo lagu eedeeyay duqeymo drone loo adeegsaday ay sabab u noqotay dab ka kacay warshad tamar nukliyeer ah oo ku taal gobolka Kursk ee galbeedka Ruushka.

3. 24 Agoosto 2025Dibadbaxyo ka socda Israa'iil oo lagu dalbanayo joojinta dagaalka Qasa

   

   Xigashada Sawirka, Reuters

   Kumanaan qof ayaa mar kale isugu soo baxay qaybo ka mid ah Israa’iil, iyagoo dalbanaya in dagaalka Qasa xabad-joojin lagu dhameeyo.

   Dadka mudaharaadaya ee Israa’iiliyiinta ah ayaa sheegaya in qorshaha milatari ee dowladoodu ay ku dooneyso in ay Qasa ku qabsato uu khatar galin karo nolosha la haystayaasha ku haray gacanta Xamaas.

   Wasiirkii hore ee Difaaca Israa’iil, Benny Gantz, ayaa ugu baaqay muwaadiniinta inay taageeraan qorshe lagu dhisayo xukuumad midnimo qaran si ay gacan uga gaysato sii deynta dadka wali xiran.

   Xukuumadda midnimada qaran ee hadda jirta oo uu hoggaaminayo Ra’iisul Wasaare Benjamin Netanyahu ayaa ku tiirsan taageerada xisbiyo adag oo aan taageersanayn in heshiis lala gaaro Xamaas si loo soo afjaro dagaalka socda.

   Wasaaradda caafimaadka ee Qaza ayaa sheegtay in 60 qof ay dhinteen Sabtidii oo keliya, kaddib weerarro Israa’iil qaaday iyo nafaqo-darro ay wajahayaan dadka reer Qasa.

4. 24 Agoosto 2025Ruushka oo Ukraine ku eedeyay in ay weerrartay mid ka mid xaruumihiisa nukliyeerka

   

   Xigashada Sawirka, EPA

   Mas’uuliyiinta dalka Ruushka ayaa sheegay in dab ka kacay warshad nukliyeer ah oo ku taalla galbeedka gobolka Kursk, ee Ruushka, la damiyey, sidoo kalena nidaamka difaaca cirka uu soo riday diyaarad drone ah oo laga leeyahay Ukraine.

   War lagu daabacay akoonka warshadda ee baraha bulshada gaar ahaan Telegram ayaa lagu sheegay in drone-kaasi uu qarxay isagoo dhulka kusoo dhacaya, taasoo keentay in uu dhaawaco qalab koronto (transformer), balse heerarka shucaaca ay caadi yihiin islamarkaana aysan jirin wax khasaare nafeed ah.

   Dhacdadan ayaa timid xilli Ukraine ay u dabaal-degayso Maalinta Madax-bannaanideeda 24-ka Agoosto, oo ah maalinta ay Ukraine ku dhawaaqday madax-bannaanideeda sanadkii 1991 kadib burburkii Midowgii Soofiyeeti.

   Hey’adda Qaramada Midoobay ee Caalamiga ah ee Tamarta Atomikada (IAEA) ayaa si isdaba joog ah ugu baaqaysay Ruushka iyo Ukraine in ay muujiyaan xakameyn buuxda maadama ay ku hareeraysan yihiin goobaha nukliyeerka, inta dagaalku socdo.

   Ukraine weli kama aysan hadlin eedeymaha Ruushka ee ku saabsan weerar drone ah oo lagu qaaday goob nukliyeer ah oo ku taalla Kursk, gobolkaas oo ay ciidamada Ukraine sanadkii hore ka fuliyeen weerar lama filaan ahaa oo militari.

5. 24 Agoosto 2025Jeneraal Maraykankan ah oo shaqada looga cayriyey arrin la xiriirta Iiran

   

   Xigashada Sawirka, Reuters

   Xoghayaha difaaca Mareykanka, Pete Hegseth, ayaa shaqada ka eryay madaxa hay’adda sirdoonka ee Pentagon-ka, toddobaadyo un kadib markii Aqalka Cad ka horyimid warbixin qiimeyn ah oo la xiriirtay saameynta weerarada Mareykanka ku yeesheen Iran.

   Lt Gen Jeffery Kruse ma sii ahaan doono madaxa hay'adda sirdoonka difaaca Mareykanka (DIA), Pentagon-ka ayaa bayaan ku sheegay. Labo kale oo taliyeyaal sare oo militari ah ayaa sidoo kale waxaa xilka ka qaaday Pentagon-ka.

   Waaxda difaaca Mareykanka weli ma aysan bixin wax sharaxaad ah oo rasmi ah oo ku saabsan sababta xil-ka-qaadista.

   Bishii Juun, Madaxweyne Donald Trump ayaa si adag uga jawaabay warbixin la dusiyay oo ay diyaarisay DIA, taasoo lagu sheegay in weerarada Mareykanka ee Iran ay dib u dhiggeen barnaamijka nukliyeerka Iran oo keliya dhowr bilood. Aqalka Cad wuxuu warbixintaas ku tilmaamay mid “si buuxda u khaldan.”

   Trump ayaa ku dhawaaqay in goobihii Nukliyeerka ee Iran ay “gebi ahaanba burbureen”, wuxuuna ku eedeeyay warbaahinta “isku day lagu doonayo in lagu dhimo mid ka mid ah weerarradii militari ee ugu guulaha badnaa taariikhda”.

   In shaqada laga eryey Kruse waxaa markii ugu horresay warisay Washington Post.

   DIA, waa qayb ka mid ah Pentagon-ka waxayna ku takhasustay sirdoonka milatariga si ay u taageeraan hawlgallada. Waxay ururisaa xaddi badan oo sirdoon farsamo ah, laakiin way ka duwan tahay hay'adaha kale sida CIA.

6. 24 Agoosto 2025Riyada oo lagu biyo-baxo ma calaamad ayay u tahay dhalmo la'aanta?

   

   Xigashada Sawirka, Getty Images

   Marka ninku riyoodo (biyo baxo) inta uu hurdada ku jiro, khubaradu waxay xaaladdan ku tilmaamaan "riyo baraarug leh" (lucid dream). Rag badan way ka welwelaan arrintan, iyaga oo u arka calaamad hore oo tusinaysa in shahwadoodu yar tahay ama xitaa ay noqon karaan madhalays.

   Dhakhaatiirtu waxay sheegayaan in biya baxa intaad hurdo ay tahay arrin caadi ah oo mar walba dhacda.

   Hay'adda Caafimaadka Adduunka (WHO) waxay leedahay marka wiilku gaaro da'da qaangaarnimada, heerka hormoonka ragga ee testosterone ayaa kor u kaca, taasoo keenta inuu riyoodo, xilliga hurdada.

   Halkan ka sii akhriso sheekada oo dhamaystiran

7. 24 Agoosto 2025Trump oo qorshaynaya inuu ciidamo ku daabulo magaalo kale oo Maraykanka ah

   

   Xigashada Sawirka, Getty Images

   Qorshaha madaxweyne Donald Trump uu ku doonayo in uu ciidamo ku geeyo Chicago waa ku takri fal awoodeed, guddoomiyaha xisbiga Dimuqraadiga ee gobolka Illinois ee dalka Mareykanka ayaa sheegay.

   Ma jirto xaalad degdeg ah oo caddaynaysa in Ilaalada Qaranka loo dirayo Illinois madaxweynaha Maraykankuna "isku dayayo inuu soo saaro xiisad," JB Pritzker ayaa bayaan ku sheegay.

   Trump ayaa horey ugu daabulayey ilaa 2,000 oo askari magaalada Washington DC, halkaasoo sidoo kale dowladda hoose ay maamulaan xisbiga mucaaradka ah ee Dimuquraadiga, taasoo qeyb ka ah waxa uu ku tilmaamay mid ka dhan ah dambiyada ka dhaca magaalooyinka Mareykanka.

   Jimcihii, Trump wuxuu sheegay inuu siyaasadda ka hirgelin doono Chicago iyo New York - labada magaalo ee kale ee waaweyn ee ay Dimuqraadigu gacanta ku hayaan.

   Duqa magaalada Chicago Brandon Johnson ayaa ka jawaabay hadalka Trump, wuxuuna bayaan uu soo saaray ku sheegay in uusan helin wax macluumaad ah oo ku saabsan soo daabulidda ciidamada qaranka ee Chicago.

8. 24 Agoosto 2025Kuuriyada Waqooyi oo tijaabisay laba gantaal oo cusub

   

   Xigashada Sawirka, Getty Images

   Hoggaamiyaa Kuuriyad Waqooyi Kin Jong Un, ayaa kormeeray tijaabada ridida laba gantaal oo cusub oo difaacada hawada ah sid ay sheegtay warbaahinta dowladda.

   Hubku wuxuu lahaa "awood dagaal oo heer sare ah" wuxuuna adeegsaday "tiknoolajida gaar ah", Wakaaladda Wararka ee dalkaas ee KCNA, ayaa sidaas sheegtay iyadoon wax faahfaahin.

   Riditaanka ayaa dhacday sabtidii, ayaa "caddeysay in astaamaha tiknoolajiyadeed ee laba nooc oo gantaallo ah ay aad ugu habboon yihiin burburinta bartilmaameedyada kala duwan ee hawada sida diyaaradaha drone-ka iyo gantaalada cruise," sida ay KCNA sheegtay.

   Tijaabada ayaa timid saacado ka dib markii Kuuriyada Koonfureed xaqjiisay inay riday dabric digniin ah talla

   Tijaabada ayaa timid saacado kadib markii Kuuriyada Koonfureed ay xaqiijisay inay salaasadii rasaas digniin ah ku ridday askar ka tirsan Kuuriyada Waqooyi oo muddo kooban ka tallaabay aagga militariga ka caaggan ee kala soocaya waddamada.

   Taliska Qaramada Midoobay ayaa sheegay in ilaa 30 ka mid ah ciidamada Kuuriyada Waqooyi ay ka gudbeen xadka sida adag loo ilaaliyo ee u dhexeeya waqooyiga iyo koonfurta, sida ay sheegtay wakaaladda wararka ee Yonhap.

   Pyongyang ayaa ka jawaabtay iyada oo ku eedaysay Seoul "daandaansi ula kac ah".

   Kuuriyada Koonfureed iyo Mareykanka ayaa gobolkaasi wadajir ugu wada dhoolatus militari oo ballaaran.

   Madaxweynaha Mareykanka Donald Trump ayaa lagu wadaa in uu la kulmo madaxweynaha Kuuriyada Koonfureed Lee Jae Myung shir madaxeedka Isniinta ka dhacaya magaalada Washington.