Waa kuma Cumar Faatax, Soomaaliga ku guuleystay u tartamidda duqa magaalada Minneapolis?

Xisbiga Dimuquraadiga dalka Mareykanka laantiisa gobolka Minnesota ayaa taageeray ololihii Cumar Faatax ee gobolkaas ee uu u tartamayey duqa magaalada Minneapolis.

Xisbiga ayaa ka baaqsaday in uu taageero duqa xilka haya Jacob Frey, oo sidoo kale ah Dimuqraaddi.

Gobolka Minnesota ayaa waxaa ku badan Soomaalida islamarkaana xilal kala duwan ayay muddooyinkii u dambeeyay ka qabteen gobolkaasi.

Qoraal uu soo dhigay X, ayuu Cumar ku sheegay inay sharaf u tahay inuu noqdo musharraxa la ansixiyay ee duqa magaalada Minneapolis.

"Aqbaliddani waa fariin ah in reer Minneapolis ay ka daaleen ballamaha aan la fulin, diidmo qayaxan, iyo siyaasad sidii caadada ahayd. Waa waajib in la dhiso magaalo annaga dhan noo wada shaqaynaysa," ayuu yiri.

Madaxa ololaha ee duqa hadda Jacob Frey ayaa soo saaray bayaan ka dib codbixinta, isagoo leh, "Doorashadan waa in ay go'aamiyaan magaalada oo dhan halkii ay ka ahaan lahayd koox yar oo dad ah oo noqday ergooyin."

Ololaha Frey waxa uu damacsan yahay in uu cabasho u gudbiyo gobolka DFL.

Si loo helo taageero, musharraxa waa inuu helaa 60% codadka.

Cumar hore ayuu xil uga hayey baarlamaanka gobolka, waxuuna hadda doonayaa inuu hoggaamiyo magaalo ay ku nool yahiin haaf milyan qof oo la ciirciiraysa dad badan oo guryo la'aan ah, dembiyo hubaysan oo maalin walba dhacaya, magaalo soo galootigu ku badan yahay oo Madaxwayne Trump-na uu isha ku hayo.

Ninkan ayaa la kulmayay caqabado dhanka naceybka ah isagoo 14-kii bishan bartiisa X uga jawaabay qoraal Islaamka ka dhan ah oo uu soo qoray siyaasiga muxaafidka ah Charlie Kirk.

Faatax ayaa ka jawaabay qoraalka Kirk, isagoo yiri: "Minneapolis waa magaalo si qurxoon ay kala duwanaansho uga jirto taasoo si adag ugu taagan qiyamkeenna. Naceybka aan maanta arkay – iyo maalmo badan – ma aha waxa aan abid ahaan doonno."

Waa kuma Cumar Faatax?

Cumar Faatax, oo 35 jir ah, waa Dimuqraaddi, hadda waxa uu mar labaad u tartamayaa inuu noqdo Senator-ka gobolka Minnesota ee degmada 62aad isagoo u tartamaya inuu noqdo duqa xiga ee Minneapolis.

Ninkan oo ku dhashay Washington, D.C, waxa uu sheegay in uu yahay wiil ay dhaleen waaliddiin soo galooti ah oo ka yimid Soomaaliya, dhawaanna uu noqon doono aabbe.

Waxa uu shahaadada ee maamulka dadweynaha ka qaatay Jaamacadda George Mason, waxaana uu hore uga soo shaqeeyay khabiir ku takhasusay bulshada Minneapolis, iskuduwaha mashaariicda ee Waaxda Gaadiidka ee gobolka iyo falanqeeyaha ganacsiga ee Jaamacadda Minnesota.

Markii loo doortay Senator-ka gobolka 2020, Faatax wuxuu noqday qofkii ugu horreeyay ee Muslim ah iyo Soomaali Mareykan ah oo ku biira Senate-ka Minnesota. Hore wuxuu sanadkii 2018-kii olole guul-darro ah u galay kursiga senate-ka dowlad-goboleedka, isagoo lumiyay tartankii Dimuqraaddiga oo ay ku guuleysatay wakiilkii hore ee gobolka Hodan Xasan.

Isaga oo u tartamaya duqa magaalada, Cumar waxa uu u aqoonsan yahay hantiwadaag dimuqraaddi ah kaas oo ka mid ah siyaasadaha kale, wacad ku maray in uu wanaajin doono ilaalinta rideshare ee darawallada Uber iyo Lyft, la dagaallanka rabshadaha booliiska iyo kordhinta sahayda guryaha la awoodi karo.

Waxa uu ballan qaaday in uu kor u qaadi doono mushaharka ugu yar ee magaalada oo ahaa $15.97 oo uu gaarsiinayo ilaa $20 marka la gaaro 2028. Mushaharka ugu yar ee Minnesota waa $11.13 hadda.

Waxa uu sidoo kale wacad ku maray inuu is hortaagayo maamulka hadda talada haya ee Donald Trump, oo ay ku jirto inaan loo oggolaan doonin booliiska magaalada inay la shaqeeyaan Hay'adda Socdaalka iyo Dhaqangelinta Canshuuraha ee Mareykanka (ICE).