Chaidh an lorg air tràigh ann an sgìre Ùige sna h-1830an

Bha Tormod Dòmhnallach a' bruidhinn agus taisbeanadh de chòrr is 30 de na pìosan a' fosgladh ann am Museum nan Eilean ann an Steòrnabhagh.

Chan eil gin de na fir-tàlaisg, a chaidh a lorg sa ghainmhich air Tràigh Eadar-Dà-Fhadhail ann an Ùig sna h-1830an, gan taisbeanadh san eilean far an do lorgadh iad.

Thathas den bheachd gun deach an dèanamh ann an Nirribhidh san 12mh linn, agus iad air an snaidheadh ann an ìbhridh ualrais.

Tha a' chuid as motha dhiubh gan taisbeanadh aig Taigh-tasgaidh Bhreatainn ann an Lunnainn.

Ach tha an Comh. Dòmhnallach ag ràdh gur dòcha gun gabhadh feadhainn dhiubh cumail ann an taigh-tasgaidh ùr a tha san amharc ann an Caisteal Leòdhais.

"Tha e math dha-rìribh a' faicinn nam fear-tàlaisg a' tighinn air chuairt chun nan Eileanan aon uair eile," thuirt an Comh. Dòmhnallach.

"Tha grunn bhliadhnaichean bho bha iad ann an seo ron a seo, agus tha mi a' smaoineachadh gur e comharra math a th' ann gu bheil uidhir aca a' tighinn an turas seo, agus gu bheil iad gu bhith ann chun an t-Sultain.

"Tha an t-argamaid a' fàs nas treise fad an t-siubhail, airson co-dhiù feadhainn aca a bhith stèidhichte sna h-Eileanan làn-ùine.

"Tha mi a' smaoineachadh gum biodh cothrom ann leis an leasachadh a thathas a' dol a dhèanamh air Caisteal Leòdhais, ma 's e 's gun tig leinn le sin, dachaigh a thoirt dhaibh a dh'fhaodas iad fuireach ann fad na h-ùine - co-dhiù feadhainn aca," thuirt e.