Bidh telebhisean, air-loidhne agus rèidio an cois na seribheis ùir

Bidh sianal telebhisein Ghàidhlig ùr na phàirt dhen t-seirbheis.

Bidh i ri fhaighinn air càbal, saideil agus air a' bhann leathainn ach cha tèid a cur air Freeview aig an ìre seo.

Tha dùil gum bi rannsachadh poblach eile ann mus tèid Ceann a Tuath agus meadhan na h-Alba a ghluasad gu telebhisean didseatach ann an 2010 agus 2011.

Measadh Poblach

Nì seo measadh air dè cho soirbheachail 's a tha an t-sianal air a bhith a thaobh a bhith a' tàladh luchd-amharc, agus cuideachd nithear sgrùdadh air dòighean-obrach a' BhBC agus Seirbheis nam Meadhanan Gàidhlig.

Thèid beachdachadh an uair sin air an t-seirbheis a chraoladh air Freeview.

Rinnear co-dhùnadh gum bi prògraman Gàidhlig fhathast rim faotainn air BBC 2 Alba anns an eadar-ama.

Chuir am BBC agus GMS iarrtas a-steach chun an Urrais anns An Iuchar 2007, a' moladh seirbheis ùr chraolaidh agus air-loidhne.

Na chois bhathas a' moladh gum biodh sianal telebhisein Ghàidhlig ann a bhiodh a' craoladh airson suas ri seachd uairean a thìde san latha, seirbheisean BBC Radio nan Gàidheal agus gun deadh seirbheisean air-loidhne a leudachadh.

Bhathas a' moladh gum biodh iomadh seòrsa prògram ri fhaotainn an cois sheirbheisean naidheachd agus aimsir anns a' Ghàidhlig.

Thog an t-Urras teagamhan mun t-seirbheis nuair a rinn iad measadh poblach mu deidhinn an-uiridh.

Thuirt iad nach b' urrainn dhaibh airgead a bharrachd a chur ris aig an ìre sin seach nach robh dearbhadh aca gum biodh e gu buannachd mhunntir na h-Alba anns an fharsaingeachd.

Thathas dòchasach gun tèid an sianal ùr a chur air bhog tràth as t-samhradh 2008