Facal Oirbh, BBC Radio nan Gàidheal, 10 Samhain 2009

Seanfhacail agus Abairtean

A' toirt ceann an eich as an aimhreit

Nam biodh tu a' toirt ceann an eich as an aimhreit bhiodh tu a' feuchainn ris an t-sìth a ghlèidheadh air dòigh a choireigin.

Nuair a bhios tu fo bhuille na peat

'S dòcha nam biodh cuideigin ann nach gabhadh feart dh'fhaodadh tu cantainn ris, can ma bha e a' dol gu obair no gu sgoil no leithid, "Bheir mis' ort nuair a bhios tu fo bhuille na peat" a' ciallachadh "Ni thu an uairsin e".

Bho chailleach às a' Rubha, Leòdhas

'S ann ort a tha a' luathair-bheòil

Chanadh tu sin ri duine nach glèidheadh rud aige fhèin.

Cladhan na h-aibhne

Ma chì thu abhainn a' ruith a-mach air tràigh, agus làrach na h-aibhne as a' ghainmhich, sin cladhan na h-aibhne.

Cladhan do shinnsireachd

Chante seo ris a' cheangal a bha agad ri do shinnsireachd.

Chante "Thusa ag earbsa à cladhan do shinnsireachd!" ri duine nach robh 's dòcha cho comasach ri daoine a bha air a thighinn roimhe, ged a bhiodh e fhèin a' dèanamh uaill mar gum biodh as na daoine dom buineadh e.

Na bradain ri cladh

Chì thu a-mach deireadh na bliadhna na bradain a' feuchainn chun nan aibhnichean agus bradan fireann 's bradan boireann a' dol còmhla agus a' sìolachadh.

Chi thu an dà bhradan ri taobh a chèile as a' ghainmhich a-rithist agus sin na bradain ri cladh.

Dè a' raoilig a th' ort?

Nam biodh tu a' dol a-mach le rud ort nach robh uabhasach freagarrach airson na h-aimsir, chainte "Dè a' raoilig a th' ort a' sin?"

Cha tugadh e athamas do dhuine sam bith

Chante seo mu dhuine nach èisdeadh ri duine eile, duine nach gabhadh comhairle, nach gabhadh suim as a' rud a bhathas ag ràdh ris.

Le do theanga ann am pluic duine eile

Ma tha thu ann a' suidheachadh far a feum thu cuideachadh iarraidh air duine eile, oir chan eil dòigh agad an rud a dèanamh dhut fhèin, tha thu "le do theanga ann am pluic duine eile!"

Bho chailleach às a' Rubha, Leòdhas