'ਮੇਰਾ ਪਤੀ ਮੇਰਾ ਫਰਿਸ਼ਤਾ ਸੀ, ਫਿਰ ਉਸ ਨੇ ਮੇਰਾ ਬਲਾਤਕਾਰ ਕੀਤਾ'
ਮਿਸਰ ਦੀਆਂ ਔਰਤਾਂ ਸਰੀਰਕ ਹਿੰਸਾ ਦੇ ਆਲੇ ਦੁਆਲੇ ਖੜ੍ਹੀ ਚੁੱਪੀ ਦੀ ਕੰਧ ਨੂੰ ਤੋੜ ਰਹੀਆਂ ਹਨ ਅਤੇ ਵਿਆਹੁਤਾ ਜੀਵਨ ਵਿੱਚ ਬਲਾਤਕਾਰ ਉਪਰ ਖੁੱਲ੍ਹ ਕੇ ਗੱਲ ਕਰ ਰਹੀਆਂ ਹਨ। ਇਹ ਇੱਕ ਅਜਿਹਾ ਮੁੱਦਾ ਹੈ ਜਿਸ ਬਾਰੇ ਮਿਸਰ ਵਿੱਚ ਘੱਟ ਹੀ ਗੱਲ ਕੀਤੀ ਜਾਂਦੀ ਹੈ।
34 ਸਾਲ ਦੀ ਸਾਫ਼ਾ ਦੇ ਸੁਹਾਗ ਰਾਤ ਮੌਕੇ ਉਨ੍ਹਾਂ ਦੇ ਪਤੀ ਨੇ ਉਨ੍ਹਾਂ ਨਾਲ ਬਲਾਤਕਾਰ ਕੀਤਾ। ਇਸ ਯੌਨ ਹਮਲੇ ਵਿੱਚ ਉਨ੍ਹਾਂ ਦੇ ਗੁਪਤ ਅੰਗ, ਮੂੰਹ ਅਤੇ ਗੁੱਟ ਉੱਪਰ ਸੱਟਾਂ ਵੱਜੀਆਂ ਹਨ।
ਸਾਫ਼ਾ ਨੇ ਦੱਸਿਆ, 'ਮੇਰੇ ਪੀਰੀਅਡ ਚੱਲ ਰਹੇ ਸੀ ਅਤੇ ਮੈਂ ਸੈਕਸ ਲਈ ਤਿਆਰ ਨਹੀਂ ਸੀ। ਮੇਰੇ ਪਤੀ ਨੂੰ ਲੱਗਿਆ ਕਿ ਮੈਂ ਉਨ੍ਹਾਂ ਨਾਲ ਰਿਸ਼ਤਾ ਬਣਾਉਣ ਤੋਂ ਬਚ ਰਹੀ ਹਾਂ। ਉਨ੍ਹਾਂ ਨੇ ਮੈਨੂੰ ਮਾਰਿਆ ਮੇਰੇ ਹੱਥ ਬੰਨ੍ਹ ਦਿੱਤੇ, ਮੇਰਾ ਮੂੰਹ ਦੱਬਿਆ ਤੇ ਬਲਾਤਕਾਰ ਕੀਤਾ।'
ਸਮਾਜਕ ਬਦਨਾਮੀ ਦੇ ਡਰ ਕਰਕੇ ਸਾਫ਼ਾ ਨੇ ਆਪਣੇ ਪਤੀ ਖਿਲਾਫ ਮੁਕੱਦਮਾ ਦਰਜ ਨਹੀਂ ਕਰਵਾਇਆ।
ਮਿਸਰ ਦਾ ਸਮਾਜ ਮਰਦ ਪ੍ਰਧਾਨ ਹੈ ਅਤੇ ਪੀੜਿਤ ਔਰਤਾਂ ਉਪਰ ਹੀ ਦੋਸ਼ ਮੜ੍ਹਨ ਦੀ ਸੰਸਕ੍ਰਿਤੀ ਹੈ।
