10/09/2023

An Nowodhow, an 10ves a vis Gwynngala 2023
Dohajydh da, ha dynnargh dhe dhyllans an seythen ma ‘An Nowodhow’ war BBC Radyo Kernow.Tewlys yw Toll Gonsel yn Kernow dhe ynkressya a ogas ha pymp kansrann rag an nessa bledhen yn rew. An ynkressyans a beder kansran poynt naw naw yw an moyha alowys gans an governans heb edhom a referendom. Dell yw gwaytys, Kabinet Konsel Kernow a wra votya a’n ynkressyans pan vet ev an seythen a dheu rag dadhla kyns-skrif a brofyansow bojet, mayth yw res dhodho kavos naw warn ugens a vilvilyow a beunsow a erbysyon y’n vledhen a dheu. Res yw dhe’n awtorita kavos pymp ha dew ugens a vilvilyow a beunsow moy a erbysyon erbynn dew vil seyth warn ugens dhe eth warn ugens. An konsel re henwys posow arghansek ow pesya avel sewyans a hwarvosow bysel hag effeyth an pandemek Kovid.Islewydh yeghes poblek Konsel Kernow, Dr Ruth Goldstein hy hanow, re warnyas tus dhe vos warra, ha derivasow a gasys Kovid-19 owth ynkressya. Hi a leveris nag o kavadow niverow, drefen na brevir yn sodhogel, hag yn-medh hi “dell hevel, pubonan a aswon nebonan gans arwodhyow haval orth Kovid.” Dr Goldstein a gussulyas erbynn mos dhe leow leun a dus, hag a leveris y kodh dhe dus golghi aga diwla yn tien ha prederi yn fenowgh a wiska mask.Pons nowydh rag diwrosoryon, kerdhoryon ha marghogyon dres diwfordh bysi a dhalleth omdhiskwedhes. Pons Chi war Donn a wra treusi an A30 dhe’n soth a Grows Chi war Donn, avel rann a vri a lerghow nowydh ow pos gwrys yn Kernow. An pons a wra rann a’n Lergh Sens yntra Breanek ha Mentrimildir ryb Truru. Konsel Kernow a leveris bos an ober ow pesya ha, dell waytir, bos ygor mis Kevardhu 2023. Rann dhiblans an dowlen a Lergh Sens yntra Porthperan ha Goonhavar a ygoras mis Ebrel. Dileys veu brassa rann an dowlen a Lergh Sens mis Hwevrer 2022 awos kudynnow arghansel, ha’n rann ynter Breanek ha Mentrimildir an rann unsel a with hy furv dherowel.Dell yw gwaytys, deges vydh an A30 ynter Skorya ha Trielin rag peder nos, yntra ugens eur BST ha hwegh eur, dhyworth an unnegves a vis Gwynngala bys y’n peswardhegves, rag gwruthyl an dhiwfordh, dell leveris Konsel Kernow. Deges vydh ynwedh rag pennseythen dhyworth ugens eur an pymthegves a vis Gwynngala bys yn hwegh eur an etegves, dell geworras.Yn mysk an dewdhek gwerthji Wilko ha dew ugens tewlys dhe vos degys y’n seythen a dheu yma tri yn Kernow. An gwerthji yn Aberfala a dhege dy’Meurth, ha’n gwerthjiow yn Truru hag yn Sen Austel a dhege dy’Yow. An skorren Resrudh a wra pesya ygor. Dres an Ruvaneth Unys, yma Wilko owth anarveth moy es mil vayni.An Vorladron Gernewek re sinas arager keswlasek yonker kyns rag Alban, Josh King y hanow, rag ambos a unn vledhen. Dew warn ugens y oos, ev a yll gwari avel strother po yn mayni skoodhya hag yth esa ev yn para Alban yn-dann etek hag ev re warias rag para ‘A’ Dinedin. Yn-medh kochyas an Vorladron, Louis Tonkin, “Ni a grys Josh dh’agan desedha gwell. Dell hevel, yma dhodho dres eghen an teythi dhe vos Morlader brav.”
Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Wella Morris. Steve Harris o an pennskrifer. Bys dy’Sul nessa, dydh da dhywgh hwi oll.