16/07/2023

An Nowodhow: an 16a a vis Gortheren 2023

Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.

An dowlen dhe wellhe onan a’n fordhow an moyha bysi a Gernow re beu henwys rag pewas ynjynorieth.

An ragdres A30 a dhallathas y’n vledhen dew vil ugens hag yma govenek y fydh kowlwrys bys gwenton dew vil peswar warn ugens.

Yth yw onan a beswardhek towlen a-dreus an soth-west dhe vos henwys rag an Pewasow Ynjynorieth civil ICE dew vil tri warn ugens.

Yma ragres moy henwys yn Lulyn, le may feu esa eko-bili desinys yn arbennik gorrys yn le rag gwellhe bewdhiverseth arvorek.

Gwiasva an pewasow a henow rann a’n A30 ynter Krowsfordh Bowdir ha Krowsfordh Chi war Donn “an diwettha darn y’n gwari mildam” rag askorn keyn a Gernow.

Yth yw an diwettha tregh a unnfordh ynter an M5 yn Karesk ha Kammbronn.

An agwedh kowlwrys a’n ragres re beu profyes rag an pewasow, dhedha yth eus amkan drehevel aswonvos ynjynorieth civil y’n ranndir.

An fordh a wra degea nosweyth dhyworth an seytegves bys an kynsa warn ugens a vis Gortheren ynter an keschanj nowydh Krowsfordh Chi warn Donn ha Krowsfordh Bowdir.

Nyns eus degeans moy tewlys bys wosa an dy’golyow hav.

*

Benyn dhyworth Kernow re ygoras an pyth a grys hi dhe vos an kynsa klavji Kernow rag orsigow.

Angie Davey a leveris “godhevysi” y’n vedhegva gwariellow pluvek orth hy thre Tredhinas a gomprehendyas orsigow arnowydh ha koth.

Ha hi ow traylya hobbi dhe ober termyn-leun rag gwruthyl ewnansow yn tien ha daswul y leveris hi leurnedhow shyndys re beu gesys dell esens.

An tra an moyha posek o dhe enora kovyow, hi a leveris.

Yn-medh hi: “Nyns yw a-dro an arghans ragov, yth yw tresorya hag enora an kovyow kelmys yn pub tra dhrudh a dheu omma.”

Hi a leveris treweythyow rann a’n gwariellow shyndys a via gesys antevys yn despit dhe vos usys gans gwith.

“Moyha rann a’n orsigow, da yw gans an dus gwitha aga hovyow fastyas dhedha,” yn-medh hi. “Treweythyow an dus a wra leverel orthiv – my a wor hemm a’n jeves semblant nebes ankompes mes my a vynn gwitha hemma drefen ow mamm-wynn dh’y wul.”

*

Lester karg a rondyas ogas dhe wolowji dy’Lun re beu halyas orth dowrow moy salow.

An lester, Mazarine y hanow, a gollas gallos hag a rondyas ogas dhe wolowji An Welv, naw milder dhyworth Kernow.

Wosa bos dasneyjs ha dryftya rag lies our gans gweres skathow-sawya, an lester a veu halyas gans tennlester orth sawder a-ves Aberfala.

“Tennlester, gweresys y’n kynsa le gans skath-sawya an Lysardh hag a-wosa an huni dhe Aberfala, a halyas an lester dhe’n howldrevel an Lysardh,” a leveris kannas a’n Maynorieth Vorek ha Gwithysi Alsyow.

An lester a veu dros yn dowrow moy salow rag gul nebes hwithransow.

Oberadoryon an lester karg, Cldn, a leveris an para a dhew den warn ugens ha’n tri trethyas o salow ha heb shyndyans.

Skathow-sawya dhyworth Porthsenan ha Pennlegh eth orth le an grondyans hag a veu junyes gans an Gorhel Tan Enesow Syllan ow kemeres trethysi orth Syllan, erbynn edhom a worra nebonan war dir.

Tro askel a’n withysi alsyow a veu desedhas ynwedh.

Herwydh CLdN, an tankow-fastya war an lester a veu shyndys mes nyns esa defolyans ha’n lester o “fast.”

Yth esa an lester ow mos dhe Zeebrugge, Pow Belg, hag ev dhe gelli gallos.

*

Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy Kensa Broadhurst. An pennskrifer o Steve Harris. Bys dy’ Sul nessa, dydh da dhywgh hwi oll.