11/06/2023

An Nowodhow: an 11ves a vis Metheven 2023

Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.

*

Kaderyer Keffrysyans Tornyaseth Soth West, Alistair Handyside y hanow, re leveris y fydh res dhe negysyow tornyasek “oberi fest yn tiwysyk” dres an vledhen a dheu rag kressya ragarghasow.

Ev a geworras bos le a dus ow ragerghi aga dy’gol y’n Soth West es y’n vledhynnyow eus passyes drefen prederow a-dro dhe’n barras kost bewnans.

Spit dhe henna, ev a dherivas bos koffijiow, bostiow ha tylleryow tennvosek dhe dornysi bysi lowr.

Yn-medh ev, “An kynsa tra dhe leverel yw dhe wodhvos meur ras a’n gewer dres an dedhyow eus passyes a-gynsow. Nyns eus travyth a wra kenertha ragarghasow orth an diwettha mynysen es dell wra kewer deg”.

Ha nebes negysyow yn Lannvorek a dherivas yth esa prenoryon ow spena le es dell yw usys.

Perghenoges Pastiow Mary, Mary Torr, a leveris bos hy gwerthji “fol yn tien” y’n eur ma mes nag esa hy negys ow kul kemmys prow es kyns drefen kostys dhe gressya yn feur.

Yn-medh hi, “[An brenoryon] a enter ha prena onan tien ha’y treghi yn dew hanter, a-der prena dew basti”.

Dre gonter, Elleke Ross, a-barth Ostel Baya Lannvorek, a leveris, “An vledhen ma yw an kynsa bledhen mayth yw puptra normal arta ha ny wren ni klewes bos barras ow hwarvos”.

*

Kreslu Kernow ha Dewnens re dhegemeras pewas keswlasek awos aga ober awenek gans teknologieth-vappya dri D.

I a wrug devnydh a’n deknologieth nowydh hag i owth ombareusi rag an pennkuntelles G7 yn Porthreptor nans yw diw vledhen, hag i a lever aga bos an kynsa kreslu y’n bys dhe wul devnydh a’n deknologieth y’n fordh ma.

Mar vras o an oberyans diogeledh mayth esa edhom a elwel, yn sommen, a-dro dhe bymp mil sodhek dhe Gernow dhyworth pub tu a’n Ruvaneth Unys rag dyghtya an hwarvos.

Ytho, dres an misyow kyns an pennkuntelles, an kreslu a wrug devnydh a gameras arbennik rag gwruthyl mappa besyel a’n ostelyow ha drehevyansow, hag a-ji hag yn-mes, may fia synsys an kuntellesow ynna.

Dres henna, an kreslu a wrug devnydh a dhronys rag gwruthyl mappa tri D a Borthreptor hag a Borthia ynwedh.

Gans oll an derivadow ma, y hallas trenya sodhogyon an kreslu yn pub parth a’n Ruvaneth Unys heb edhom a’ga danvon dhe Gernow kyns an hwarvos.

An kreslu a leveris y hallsa gul devnydh a’n deknologieth ma y’n termyn a dheu rag dyghtya hwarvosow bras a bub eghen.

*

Yma an Servis Tan ha Sawyans owth ynia war eseli a’n poblek may kemerrons with gans flammow noth ha’n gewer hwath tomm ha sygh.

I re bysis an poblek, yn arbennik, a surhe bos aga barbakoa towladow difudhys yn tien kyns y dewlel yn atalgist.

Esther Lochrie, perghenoges Koffiji Treth Lynnyeyn Pryskelow yn Aberfala, a leveris bos hy negys namna kowlleskys wosa barbakoa dhe worra tan yn atalgist stegys dhe’n koffiji.

An Servis Tan a dhanvonas dew jynn tan mes, dell hevel, y feu an tan difudhys gans mayni an bosti hag eseli a’n poblek dre wul devnydh a gelornasow a dhowr mor.

Leveryades a-barth an Servis Tan ha Sawya, Nicola Bottomley, a warnyas ynwedh mayth esa peryl bras a danow gwyls y’n eur ma drefen an gewer sygh.

“Ni a vynsa pysi tus ma na wrellens tansysyow,” yn-medh hi. Ha hi a warnyas y hallsa tanow gwyls leski dres lies mis drefen aga bos mar gales dh’aga difudhi.

“Y’n eur ma, mar tallattha tan gwyls, pur sevur vydh ev,” a geworras hi.

*

Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Steve Penhaligon. An pennskrifer o Wella Morris. Bys dy’ Sul nessa, Duw genowgh hwi oll.