22/01/2023

An Nowodhow: an 22a a vis Genver 2023

Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.

*

Pennsodhek Kreslu Kernow ha Dewnens, Will Kerr, a gewsis an seythen ma a’n kudynnow orth y enebi yn y soodh nowydh.

Mester Kerr, neb a veu ordenys avel pennsodhek yn mis Kevardhu eus passyes, a leveris an kreslu dhe arveth meur a sodhogyon nowydh a-gynsow, ha lemmyn y’n jeva moy sodhogyon es bythkweth kyns.

Y’n gwettha prys, heb meur a brevyans yw an brassa rann anedha. Dell hevel, peswardhek kansran ha dew-ugens a’y sodhogyon re beu y’ga soodh dres teyr bledhen hepken po le. Ha nyns eus marnas pymthek kansran ha dew-ugens anedha a wor lewya yn-dann lugern glas.

Yth yw war dowl Mester Kerr restra “towlennow trenya manylys” rag dyghtya an kudynnow ma.

Ev a dherivas bos y amkan gul devnydh a’n sodhogyon nowydh na rag batalyas orth fara gorth-socyal, droggys ha lewya yn tiantel.

Yn-medh ev, “Yma mall dhymm surhe may ryllyn dhe’n sodhogyon yowynk ha dhe eseli nowydh a’n mayni an sleynethow yw res dhedha rag omvyska yn kemenethow leel skaffa gallons”.

*

Yma Konsel Kernow ow tebatya profyans nowydh dhe janjya an system a feow-parkya a-dreus dhe Gernow.

Profys yw gorra pub park kerri dyghtys gans an konsel yn onan a dri nivel herwydh an le mayth esons.

Parkow kerri yn tylleryow tornyasek a via an moyha kostek mes isella via an feow yn parkow usys dre vras gans anedhysi leel. Rag ensampel, parkow kerri yn Porthbud po Marghasyow a via yn nivel A. Pennsans ha Porthia a via yn nivel B hag an lyha kostek a via an re yn trevow kepar ha Breanek ha Lyskerrys, yn nivel C.

Pur gompleth yw an system a-lemmyn hag yma moy es kans fe dihaval yn parkow kerri a-dreus dhe Gernow y’n eur ma.

Mar pe an janyow ma unverhes, dalleth a wrussens an kynsa a vis Ebrel.

*

*

An RSPCA yn Kernow re dherivas ev dhe dhegemeres fest moy kelyn forsakys es dell wrug kyns an goredhom Kovid.

Kresen sawya Sen Kolom Veur a leveris na wrug hi degemeres marnas unn kolyn y’n vledhen dew vil hag ugens, mes warlena hi dhe sawya peswardhek ha dew-ugens. Ha hevlena an gresen re dhegemeras unnek kolyn seulabrys.

Pennweythresoges an gresen, Emily Bowen, a leveris y tallathas lies den maga ha gwertha kelyn dres an pandemek drefen bos gorholeth bras rag enevales dov y’n eur na. Byttegyns, drefen agan bos lemmyn y’n mysk goredhom kost bewnans, yma meur a dus ow forsakya an keth enevales na. Y’n gwettha prys, yma meur a berghenogyon geun ow pesya maga kelyn na yllons i aga gwertha.

Ytho, Mrs Bowen a ynias war berghenogyon geun ma na bessyons maga kemmys kelyn drefen bos kales kavos trevow gwiw ragdha.

*

 .

*

Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Steve Penhaligon. An pennskrifer o Wella Morris. Bys dy’ Sul nessa, Duw genowgh hwi oll.