16/10/2022

An Nowodhow: an 16ves a vis Hedra 2022
Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.
*
Oberoryon kyttrin yn Kernow re synsas astelyow ober an seythen ma, hag yth yw war aga thowl restra moy astelyow y’n seythennyow a dheu.
Restrys veu an astelyow ober gans kesunyans lavur RMT avel rann a gedryn a-dro dhe wober ha studhyow.
Goderrys veu servisyow dyghtys gans First Group dy’Lun eus passyes hag yma towlow rag astelyow pella an kynsa warn ugens a vis Hedra, keffrys ha’n peswora hag ugensves a vis Du.
Yn-medh leveryas a-barth First Group, “Diswaytys yn feur on ni, spit dhe dhadhlow hir, na wrussyn hedhes gorfen hegar dhe omgussulyansow”.
Ev a geworras y hwrussa eseli a’n RMT denagha profyans an kowethyans dhe gressya gober gans eth poynt hwegh kansran yn mis Gwynngala hevlena, sewys gans kressyans aral a eth poynt tri hansran yn mis Ebrel y’n vledhen a dheu.
Byttegyns, Mick Lynch, skrifennyas ollgemmyn an RMT, a worthebis y hwrussa First Group budhow a dhew kans, hwegh warn ugens a vilvilyow a beunsow warlena, mes na wrussons i profya marnas unn peuns moy pub our dh’aga mayni. 
Yn-medh ev, “Yma First Group ‘ow neuvya’ yn arghans hag y halsa gans es pe oberoryon kyttrin kressyans resnadow a wra dyghtya yn rann an goredhom kost bewnans usi ow kwethhe”. 
*
Herwydh derivas dyllys gans an kreslu, kressya re wrug an niver a alweythow kas yn Kernow ha Dewnens gans ogas ha dew gansran warn ugens dres an vledhen eus passyes, bys dhe ogas ha dew vil, naw kans oll war-barth.
Galweyth kas yw drogober gwrys erbynn nebonan awos aga agh, kryjyans, reydh, reydholedh po evredhder.
Rakhenna, Kreslu Kernow ha Dewnens re restras Seythen Warneth Galweyth Kas.
Gorwolyas Anthony Hart a leveris yth esa an kreslu ow skoodhya fethesigow a alweyth kas hag ev a vynnas “danvon messach fest krev na vydh galweyth kas perthys kammen vyth”.

*
Yma aluseneth St Petrocs ow restra kevres a dhiskwedhyansow rag displegya an prevyansow a dus dhiannedh dres an pandemek.
An aluseneth, hag a veu selys rag skoodhya tus ha dhedha kaletterow anedhyans, re dheklaryas y fynn hi kevrenna an hwedhlow a neb deg den ha tri-ugens yn Kernow dre nebes diskwedhyansow a bortrayansow skeusennek. Keffrys ha henna, yth yw war aga thowl dyllo gwiasva ha lyver y’ga hever.
Y talleth an kynsa diskwedhyans orth Gwithti Kernow Riel an ethves a vis Du, ha dew dhydh a-wosa, ygerys vydh diskwedhyans aral orth an Edenva, mes y fydh an nessa diskwedhyans ma displetys mes a ji.
Yma dyghtyoryon an hwarvosow ma ow hwilas tylleryow erel a-dreus Kernow rag ostya an portrayansow.

*
Lewyer kyttrin re leveris ev dhe oberi gordermyn rag provia deg koon rostys ha tri-ugens heb kost dhe deyluyow usi ow patalyas orth an goredhom kost bewnans.
Josh Formby Hugh a geginas oll an konyow y honan ha, gans gweres y gespares, Emma, ha’ga fleghes, ev a lesrannas an voos dhe deyluyow edhommek yn Resrudh, le may mons i trigys. Gweresys veu Josh ynwedh gans gorvarghas leel ha tus an dre.
Yn-medh ev, “Yth eson ni yn plit heb par kyns, may ma tus ow strivya tommhe aga chi, gorra boos war platys rag aga theylu, ha dhe’m breus vy, fest trist yw hemma, ha res yw dhe bubonan kesoberi ha gul neppyth yn y gever”.
Yth yw war dowl Josh restra hwarvosow a’n keth par y’n termyn a dheu hag yma govenek dhodho may fo ev junys gans tus erel ha provia hwath moy konyow. *

Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Steve Penhaligon. An pennskrifer o Steve Harris. Bys dy’ Sul nessa, Duw genowgh hwi oll.

•