17/07/2022

An Nowodhow: an 17ves a vis Gortheren 2022 [ENGLISH LANGUAGE VERSION AT THE END] Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow. *An possybylta a vargen tir gwyns a-ves dhe’n arvor Kernow re voyas pas ogassa wosa kavos arghasans governans, herwydh mestrysi an towl.Negys Swedek, Hexicon y hanow, a dowl ynstallya aga system TwinHub, gans an govenek ev dhe allos dalleth oberi yn vledhen ugens pymp warn ugens.Ev a vydh desedhys a-dro dhe dheg mildir a-ves Heyl.Herwydh skodhoryon an dowlen y halsa bos kenerth dhe’n ekonomieth leel ha gweres ow fastya Kernow y’n ranngylgh nerth nowedhadow, an pyth usi ow tevi.Nyns yw an nombers dyllys, mes yn gwiryonedh konvedhys yw arghasans an governans re fastyas pris stag rag an nerth TwinHub a wra askorra dres pymthek bledhen, ytho ow kul an towl hewul erbysek.Hexicon a leveris yn bos kammbras yn viaj rag towlow brassa y’n Mor Keltek hag a alsa dalleth an ranngylgh gwyns a-ves an avor y’n soth-west a Bow Sows.Lewydh TwinHub, James Brown y hanow, a leveris an ober dhe gomprehendya ynstallyans dew durbin war unn sel aval rann amkan an negys hag i owth “assaya lehe agan ol troos kerghynedhel.”Ev a vydh selyes ogas dhe’n Wave Hub, an ragdres “kraw” yn-dann an mor desedhys a-ves Heyl, prenys gans Hexicon an vledhen usi passyes.Ha’n towl owth oberi, ev a alsa dinythi a-dro dhe dhewdhek megawatt warn ugens, tredan lowr rag nertha a-dro dhe bymp mil ha dew ugens a drevow, y leveris an negys.
Mar po oberansek, an towl a wrussa omjunya gans kadonyow provians leel kepar ha Porth Aberfala, hag a alsa gul rann posek yn y dhisplegyans, oberyans ha mentons.
Esel Senedh Truru hag Aberfala, Cherilyn Mackrory hy hanow, a leveris y halsa bos an “kynsa kamm yn an pyth a alsa bos diwysyans nowydh pur yntanus rag an dus a Gernow.”
*Dew dhiskwedhyans amethel a Gernow re dhewelis rag an kynsa tro a-dhia an pandemek Kovid-19.
Yth o an setegves tro ha pymp ugens Diskwedhyans Lyskerrys dh evos synsys.
An vledhen ma yth esa kansow a dhispletyansow ha gwerthjiow byghan ha “meur a brofyansow y’n klassow rag bughes, deves, mergh hag asenes,” a leveris an restroryon.
“Pur lowen” o an diskwedhyans dhe dheweles wosa an powes dew-vledhen, a leveris Becky Breyley, skrifenyades an diskwedhyans.
An brassa diskwedhyans amethel unn jydh yn Kernow re dhewelis ynwedh.
Diskwedhyans Stedhyans, re beu synsys ogas ha heb powes a-dhia mil eth kans peswardhek warn ugens, a synsis niver a diskwedhyansow ha kesstrifow enevales dy’Lun.
Yth esa didhan ilowek, displetyansow ha gwerthjiow byghan kreft ha kenwerth, ha ferla herwydh mestrysi.
Lewydhes an diskwedhyans, Susan Knight hy hanow, a leveris “y fydh neppyth rag pubonan” ha’n gewer deg a wrussa gweres an vushys ow tehweles dhe’n hwarvos.
Diskwedhyans Gowir a veu synsys y’n vledhen ugens onan warn ugens.
*Kresen Dhiskwithans hag oyn-dann wodros degeans a vydh perghenegys gans kowethyans bern kemeneth, Konsel Kernow a lever.An gresen yn Ponswad re beu enebys gans degeans wosa hy oberador GLL a leveris na alsa affordya hy dyghtya.Herwydh an konsel Kowethyans Bern Kemeneth Kresen Dhiskwithans Ponswad a wra perghengi mis Gwynngala.An gresen Ponswad o yn kynsa le unn a bymp komodyta yn-dann wodros degeans wosa GLL dhe leverel yth esa edhom dhedha a weres arghansek moy rag pesya aga dyghtya.Mer an dre, Amanda Pennington hy hanow, a twytyas hi dhe vos“dres an loor” an bagas re bia grontyes an kevambos.
*Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy Kensa Broadhurst. An pennskrifer o Steve Harris. Bys dy’ Sul nessa, dydh da dhywgh hwi oll.