27/02/2022

Dohajydh da, ha dynnargh dhe dhyllans an seythen ma ‘An Nowodhow’ war BBC Radyo Kernow.
Konsel Kernow re gomendyas y vojet rag an vledhen arghansek a dheu, y’ga mysk ynkressyans a dhew poynt naw naw kansran rag taloryon toll gonsel. Ynkressyans a hwetek diner ha peswar-ugens orth an seythen rag anneth bagas D yw an sewyans, mes an recknow leun a wra kregi war gentelyow an kreslu, an tanlu hag an konselyow cita, tre ha pluw. Ynkressyans Konsel Kernow a gomprehend unn gansran rag kentel tevesikwith socyal, hag an bojet a syns ynno pymp ha dew-ugens a vilvilyow a beunsow moy rag gonisyow tevesikwith socyal. An bojet a gomprehend ynwedh onan poynt tri bilvil a beunsow a gevarghow kevalav, y’ga mysk “skoodhyans rag towlennow tevyans erbysek a wrello anedhow hag oberow rag trigoryon ha dastewynnya aga ragwiryow,” yn-medh bagas rewlya Mentenour. Y leveris Linda Taylor, ledyer an konsel, wosa an kuntelles dy’Meurth, an bojet dh’agan “lewya war-tu ha’n termyn splanna a dheu” ha “kowlwul an ragwiryow posek” a “gemenethow bewek, salow ha skoodhyansek” hag a “Gernow sewen ha sostenadow.” Wosa an kuntelles y leveris Jayne Kirkham, konselor Lavur, bos tevesikwith socyal pysys a wul troghow a dhew warn ugens a vilvilyow a beunsow. Yn-medh hi, “Yth eson ni ow kelli kresennow dydh ha gonisyow hedh, hag yth eder ow treghi niverow a wodrigow-gwith rag an dus. Yma ow tiberth gwithysi socyal ha praktysoryon with. Dileys sodhow gwith socyal, ny wren ni aga daskavos.” Konseler Leigh Frost, ledyer erbysiedh rag bagas Livrel Gwerinel, a leveris bos “hackyes ... gonisyow essensek”. An Konsel a gomendyas ynwedh ynkressyans a dheg kansrann warn ugens orth tollow Pons Tamar ha Kowbal Penntorr; an sewyans a vydh toll karr dhe ynkressya dhyworth dew beuns dhe dhew beuns tri-ugens diner. Kowlwrys vydh an ynkressyans na mis Genver a dheu, dell yw gwaytys.
A-varra an seythen ma, naw mil den re sinsa petisyon ow nagha profyans Konsel Kernow a feow-parkya yn Park Powdir Tihydin, ogas dhe Gammbronn. Mars yw komendyes, an feow a via bew ynter eth eur vyttin ha pymp eur androweyth, ha kostya ispoynt a dhew beuns rag dew our. Yn-medh Lucie Sominka, dhyworth Resrudh, neb a lever hi dhe vysytya yn fenowgh, “Hemm yw onan an taklow treweythus a yll y wul an dus voghosek heb bos gweskys y’ga focket.” Philip Desmonde, esel an kabinet rag karyans, a leveris bos an towl dhe dhaskavos kostys mentons ha dyghtyans an parkow powdir Kernow.
Synsys veu ogas ha seyth kans a lewyoryon ow spedya gans kamera dres y gynsa seythen a oberyans, dell leveris bagas sawder fordhow Hunros Mann Soth-West (Vision Zero South-West). An kamera-spedya nowydh a vir orth lewyoryon y’n dhew du yn fordh A tri-naw-peder a dheg mildir warn ugens war our yn Goonhir, yntra Pennryn ha Hellys. Dell leveris Hunros Mann Soth-West – hag a gonsist a niver a gowethyansow, y’ga mysk Kreslu Kernow ha Dewnens, Konsel Kernow ha Fordhow Meur Kenedhlek – an towl yw dhe lettya pub kesskwat marwel ha sevur erbynn dew vil dew-ugens. Y leveris bos ledhys peswar den ha dew-ugens ha bos shyndys yn sevur hwegh kans peswar warn ugens yn fordhow Kernow ha Dewnens yn dew vil ugens.
Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Wella Morris. Steve Harris o an pennskrifer. Bys dy’Sul nessa, dydh da dhywgh hwi oll.