20/02/2022

An Nowodhow: an 20ves a vis Hwevrer 2022
Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.
*Aluseneth selys yn Tewynblustri rag gweres boghosoghyon an ranndir na re dherivas hi dhe weles “kressyans kowrek” y’n niver a dus ow hwilas skoodhyans dhyworti.
Acheson an kressyans ma yw, heb mar, an goredhom Kovid, hag an aluseneth, DISC hy hanow, a leveris hi dhe bareusi ha dyllo moy es pymp kans mil sand dhe dus leel a-dhia dhalleth an pandemek.
Dres henna, res yw lemmyn dhe’n aluseneth ri gweres arghans dhe nebes tus na yll tyli aga reknow gas ha tredan.
Dyghtyores an aluseneth, Monique Collins, a leveris, ‘Kyns Kovid, yth esa neb hanterkans a dus pub seythen. Lemmyn, y hyllir bos kemmys ha mil, pymp kans den pub seythen a wren ni aga gweres. Henn yw kressyans kowrek a wrussyn y weles, hag yma ev ow tos ha bos gweth.’
*
Konsel Kernow a dhellos gwarnyans a-dro dhe vessajys tekst fug a hevel dos dhyworth system NHS Test and Trace (system Previ ha Tresya yn Kernewek).
Danvenys yw an messajys dhyworth niverow klappkodh, hag yma an konsel ow kussulya eseli a’n poblek a ‘dybi diwweyth kyns klyckya kevren po diskudha kedhlow personel’.
Elizabeth Kirk, sodhek an konsel a-barth savonow kenwerth a leveris, ‘Y hyll an tekstow ma heveli bos pur wiryon, mes ny wrussa an NHS, na Yeghes Poblek Kernow, danvon messajys a’n par ma dhyworth klappkodh’.
Hi a warnyas y halsa virus po neb eghen a vedhelweyth dregynnus bos iskergys dre glyckya kevren fug, ha gasa dhe falswesyon trovya geryow tremena dhe akontow arghanttiow, po dhe wiasvaow erel, hag yw gwithys y’gas pellgowsell.
Kussul a’n konsel dhe seul a glyck kevren a’n par ma dre wall yw dhe dhegea an wiasva, chanjya pub ger tremena, nowedhi system oberi an klappkodh ha lettya an niver a wrug danvon an messach. I a dal ynwedh danvon manylyon a’n messach dhe Action Fraud.
*
 *
Kok-draylya Kernewek re dorras an rekord rag an kachyans an moyha talvosek dhe vos dres dhe dir yn Lulynn.
An kok, Enterprise y hanow, a gemeras puskes, moy es seyth mil ha peswar-ugens a beunsow aga thalvosogeth, yn unn viaj unnik a eth dydh.
Herwydh Nathan Marshall, kapten an Enterprise, y hwrussons terri an rekord gans moy es unnek mil beuns, ow keworra, ‘Alinys o an ster’.
An kok-draylya, tri meter ha dew-ugens y hirder, yw an brassa a’y eghen yn Lulynn hag an moyha nowydh ynwedh, prenys, dell veu, warlena.
Dres an viaj, an mayni a gemeras kans, peswardhek warn ugens a gistyow a worleyth keffrys hag eghennow erel a bysk kepar ha meyl ha korrvarvus.
Mester Marshall a leveris na veu oll an puskes na kemerys war unn dro mes res o dhedha oberi dres eth dydh war an keth hes. Ev a geworras pub esel a’n mayni dhe dhegemeres rann a’n lesow, ha bos minhwarth efan war bub enep, heb mar. 
*
Klub Gyg Brennyas Heyl re dhegemeras skath-revya nowydh gans gweres a arghasans dhyworth Sport England.
Y’n eur ma, yma Sport England ow profya grontys dhe gowethasow sport dyghtys gans eseli an gemeneth rag aga gweres owth omdhrehevel wosa an goredhom Kovid.
An skath nowydh, Gwinear hy hanow, a veu benygys, henwys ha lonchys orth solempnita war an slynkva yn Heyl. 
Revyades, Ellie Spiers, a leveris y fedha an gyg nowydh pur bosek rag an klub y’n termyn a dheu. Hi a geworras bos hemma “chons yntanus” a wrussa gasa dhe’n klub komendya an sport dhe lies den moy.
*
Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Steve Penhaligon. An pennskrifer o Wella Morris. Bys dy’ Sul nessa, dydh da dhywgh hwi oll.