23/01/2022

Dohajydh da, ha dynnargh dhe dhyllans an seythen ma ‘An Nowodhow’ war BBC Radyo Kernow.
Dy’Meurth y teklaryas Konsel Kernow hwarvedhyans troboyntel yn gwith socyal, rag esya tennans y’n system yeghes. Andy Virr, synsyas portfolio rag gwith ha sewena, a leveris y halla fardellow gwith chanjya dhyworth peswar vysytyans orth an jydh bys dew, pan y’n breussys salow dh’y wul. Dell waytir, an hwarvedhyans troboyntel a wra gweres ow rydhhe mil weli klavji. Yma delays ow tiskarga godhevysi a glavji drefen nag yw kavadow fardellow gwith. Mr Virr a keworras y halla kentrevogyon ha bodhogyon gweres yn nebes kesstudhyow. Mis Hedra y teklaryas Trest Klavjiow Kernow Riel hwarvedhyans troboyntel, hag a bes hwath.
Bagas kaskyrgh Rebellyans Difeudhans a guntelas yn-mes a Lys Kernow yn Truru rag merkya tressa penn-bloodh an deklaryans goredhom hin. Yn-medh diskwedher Tim Snell, “Nans yw teyr bledhen y teklaryas Konsel Kernow goredhom hin, ha ny welsyn ni gwrians lowr yn tevri dres an termyn na. Ass yw sevur an goredhom. Ny yllyn ni gortos dres teyr bledhen moy a wrians lent na vo lowr yn ewn.” Mr Snell a’n deskrifas avel “fest bismerus” yma Konsel Kernow ow tyli ogas ha £500,000 dhe skoodhya an neyj Kevambos Gonis Poblek (PSO) dhyworth Tewynblustri bys yn Gatwick, mayth yw a-lemmyn orth dalghuster a 48%. Martyn Alvey, synsyas portfolio rag kerghynnedh ha chanj an hin, a leveris bos nowydh an servis, ha bos an Konsel “darbollys an mell ayr dhe Loundres dhe vos posek rag erbysiedh Kernow.” Mr Alvey a leveris an konsel dhe avonsya yn lies fordhow dhe strivya erbynn chanj an hin, y’ga mysk ow keworra panellow howlek orth 600 annedh Anedhyans Kernow. Yn-medh ev: “Ni a’gan beus an kevarghow a wrussyn yn nerth tesel dororiethel, an kevarghow yn nerth gwyns arvorel ow neuvella eson ni ow kul – hag ynwedh y skwychyas Konsel Kernow yn fyw y gynsa tyrbin gwyns konnyk. Mr Alvey a leveris ynwedh bos 150 moy a boyntys karga a garr tredanek gwaytys dhe vos yn fyw yn parkow kerri an awtorita, ow kul an niver kowal bys 360.
Deklaryes veu an seythen ma kasys Koronavirus yn Kernow ha Syllan dhe lehe y’n seyth dydh bys an 15ves a vis Genver dhyworth 1004 dhe 653 orth 100,000 a dus. Le yw hemma es an kresek a 965 rag Pow Sows ha Kernow war-barth. Wosa deklaryans an Pennmenyster an seythen ma, brassa rann an fronansow Kovid a vydh gorfennys dy’Yow a dheu, ha maskow bejeth na hwath ordenys yn tylleryow poblek. Y fydh byttegyns gorholeth laghel dhe omenysega mar per prevys posedhek a Govid.
Gwydh nadelik re beu gesys yn stretys wosa bos an servis tewlys dh’aga huntel nasyes gans mayni estrigys klav gans Kovid-19. Yn-medh leveryas Konsel Kernow, “Estrigow kovid a nasyas towlow dhe guntel gwydh nadelik, mes ni re guntelas moy es 10,000 a wydh. An ragwir o dhe surhe hwarvos dell yw usys an pennkuntellow atal hag eylgylghyans.” Y leveris ynwedh y kodh dhe ragbrenoryon kuntellow atal lowarth gasa aga gwedhen yn-mes gans an atal lowarth. Piwpynag aral a yll y dherivas avel kuntel fyllys yn wiasva Konsel Kernow, po kemeres y wedhen dh’y nessa kresen eylgylghyans atal mayni.
Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Wella Morris. Steve Harris o an pennskrifer. Bys dy’Sul nessa, dydh da dhywgh hwi oll.